АҞӘА, ԥхынҷкәын 3 — Sputnik. Аԥсны азыхиоуп Урыстәылатәи Афедерациахь инанашьҭуа амандаринақәа рхышәа-ҵышәа аизҳатәра, ҳәа азгәеиҭеит Аԥсны Ақыҭанхамҩа аминистр ихаҭыԥуаҩ Владимир Дауров.
2016 шықәса ԥхынҷкәын 1 инаркны Урыстәылаҟа ҭырқәтәылатәи атауарқәа рыхәҭак ралагалара азин аанкылахоит, урыстәылатәи аҳаирплан Су-24 акажьра инамаданы. Аембарго иаҵанакит амандаринақәагьы.
"Ҳәарада ҳара иаразнакы иҳалшом Ҭырқәтәылантәи иаауаз ацитрустәқәа рхарҭәаара, аха сынтәатәи ашықәс азы иҳагәҭакуп Урыстәылаҟа 40 000 тонна рҟынӡа амандарина ашьҭар", — иҳәеит Дауров.
Иара иазгәеиҭеит амандарина шықәсырацәала изызҳауа ҵиааны ишыҟоу, атауар ахышәа-ҵышәа аизырҳаразы ирҿыцны рышьаҭа шарктәу. Аминистр ихаҭыԥуаҩ иажәақәа рыла Аԥсны азыхиоуп иахәҭаны иҟоу аалыҵ анашьҭра, аҭиреи аԥаразоужьреи рызҵаарақәа рылацәажәара.
