АҞӘА, ԥхҷ 18 – Sputnik. Роберт Џьапуа, Алиас Корсаиа. 20 тонн амандаринқәеи, 10 литрак аӡрыжәтәи, афатә-ажәтә, амаҭәа-ҩыҭәа, ашьаҵатәи, ахәмаргақәеи – абарҭқәа зегьы еидыркылеит Аԥсны ауааԥсыра Донеки, Лугански рыуаажәлар рзы. Иааидкыланы агуманитартә еидара акапан 50 тонн аҟынӡа инаӡоит. Абри атәы ҳзааицҳауеит Аҭагылазаашьа ҷыдақәа рзы аминистр Лев Кәыҵниа.
Аидара зқәу амашьынақәа Украинаҟа амҩа иқәлоит иааиуа амшқәа руак азы.
"Шәара ижәдыруеит шаҟа рҭагылазаашьа уадаҩу арҭ ареспубликақәа рҿы инхо ауааԥсыра. Уа аибашьра ахаҭаҵәҟьа цоит. Арахь аӡынра ҳҭагылеит. Сгәыӷуеит, иҳалшаз амаҷ акәзаргьы, џьара ирыхәап ҳәа", – иҳәеит Кәыҵниа.
Агуманитартә цхыраара аидкыларазы акциа хацыркын Аԥсны аҭагылазаашьа ҷыдақәа рзы аминистрра аԥшьгарала, иара убас Аԥсны аказакцәа реидгылеи, Афганистан аибашьра аветеранцәа рхеилаки радгыларала. Адкыларатә пунктқәа аартын Аԥсны араионқәеи ақалақьқәеи зегьы рҿы. Агуманитартә цхыраара аҭыԥ аҟынӡа инаргоит Аԥсны аҭагылазаашьа ҷыдақәа рзы аминистрра аусзуҩцәа алархәны.
