Аԥсны атәылауаа Урыстәыла аус рыулоит апотент ала

Аԥсны атәылауаа Урыстәыла аус рулоит апатент ала

32
(ирҿыцуп 16:33 19.01.2015)
Урыстәыла азакәан "Урыстәыла инхо аҳәаанырцәтәи атәылауаа рзинтә ҭагылазаашьа" иалагалаз аԥсахрақәа инақәыршәаны, Аԥсны атәылауаа Урыстәыла аус руртә аҭагылазаашьа роуеит патентла.

АҞӘА, жьҭ 19 – Sputnik, Наала Аҩӡԥҳа. Урыстәыла азакәан "Урыстәыла инхо аҳәаанырцәтәи атәылауаа рзинтә ҭагылазаашьа" аԥсхрақәа алагалан, уи инақәыршәаны 2015 шықәса ажьырныҳәа акы инаркны аҳәаанырцәтәи атәылауаа аҭагылазаашьа роуеит Урыстәыла аусуразы апатент ашьаҭала. Абри атәы аанацҳауеит Аԥсны иҟоу Урыстәыла Ахаҭарнакра аофициалтә саит.

Ари азакәан ахь иаҵанакӡом Урыстәыла атәылауаҩшәҟәқәа змоу, иҳәеит Аџьеи, асоциалтә хьчареи рминистр Сурен Керселиан, Sputnik акорреспондент даниацәажәоз.

"Азакәан иалагалоу аԥсахрақәа ззынархоу аҳәаанырцәтәи атәылауаа роуп. Аԥсны атәылауаа Урыстәыла атәылауаҩшәҟәқәа змоу ари азакәан иаҵанакуам", — иҳәеит азакәан аԥсахрақәа ртәы дазааҭгыло Керселиан.

Апатент аиуразы Урыстәыла аҳәаа ахыҵра ашьҭахь 30 мшы рыҩнуҵаҟа Урыстәылатәи Афедерациа амиграциатә усбарҭа ашҟа арзаҳал ҩтәуп. Адокументқәа рпакет анаҩс, апатент заур зҭаху жьҭаара акы 2015 шықәса рынахыс аҳәаанырцәтәи атәылауаа рзы аурысшәа адырразы ихымԥадатәиу аԥышәара иахысроуп (зԥышәа ҳараку аспециалистцәа рыда).

Аҳәаанырцәтәи атәылауаа Урыстәыла аус руразы азин рыҭахоит амиграциатә картаҿы, Урыстәылаҟа рцара мзызс иамоу аусура шакәу, аилыркаага ҟарҵоит Аԥсны иҟоу Урыстәыла Ахаҭарнакраҿы.

Апатент ала аус зуа аиуристтә хаҿқәа, ируалуп ҩымз ирҭагӡаны Урыстәылатәи ФМС ашҟа аиқәшаҳаҭра ахҩылаа ашьҭра.

Аусуразы азин рыҭахоит аусуразы аиқәшаҳаҭра аамҭа инақәыршәаны, аха шықәсык еиҳамкәа. Аиқәшаҳаҭра ацҵара зҭаху ирылшоит Урыстәыла дшыҟоу ФМС аҭыԥантәи аусбарҭахь арзаҳал аҩра. Апатент аиуразы иаҭаху ақьаадқәа зегь еицызар ауп. 
 

32