Абхазо-российская граница.

Аԥсны аветеринартә маҵзура аҳәааҟны аусура иалагеит

10
(ирҿыцуп 10:28 27.01.2015)
Аҳәааҿтәи агәаҭаратә-ветеринартә маҵзура Ԥсоу аҳәааҿы ҩаԥхьа аусура хацныркит.

АҞӘА, ажь 27 – Sputnik, Наала Аҩӡԥҳа. Аветеринартә маҵзура агәаҭаратә пунктқәа аҳәааҟны русура еиуеиԥшым ачымазарақәеи ӡхаҭабзиара лаҟәу афатәқәеи рҭалара иаԥырхагахоит, иҳәеит Аԥсны аҳәынҭқарратә ветеринартә маҵзура аиҳабы Ерик Аншба.

Аҳәааҿы иҟоу агәаҭаратә-ветеринартә маҵзура анаплак маҷқәа раалыҵ налак-аалакны агәаҭара иахрыжьуеит. Аншба иажәақәа рыла, аԥсшьаратә сезон ҿыц алагаанӡа аҳәаахысырҭа Ԥсоу аҟны амаҵзура иатәу рхатәы лабораториа аадыртырц ргәы иҭоуп.  Макьаназы апробақәа Гаграҟа иҳашьҭуеит ҳәа азгәалҭеит аҳәааҿы иҟоу агәаҭаратә-ветеринартә маҵзура аиҳабы Асида Кациа.

"Аҳәааҟны ҳхатәы лабораториа анааҳартлак ашьҭахь, ара, аҭыԥан иахәҭоу аҭҵаарақәа зегьы мҩаԥаҳгалартә еиԥш аҭагылазаашьа ҳауеит", – лҳәеит Кациа.

Аветеренартә маҵзура аусзуҩцәа еиҳарак агәҭынчымра рызцәырнагоит Аԥсныи Қырҭтәылеи рҳәааҟны иҟоу аҭагылазаашьа. Уаҟа аветеренартә маҵзура аус ахьынӡамуаз аамҭа иалагӡаны ачымазара ҿыцқәа хәба Аԥсныҟа иҭалеит.

"Аԥсуа қыҭақәа жәпакы рҿы акәты шьаҭра ыҟамкәа иԥсит. Акәҭқәеи акәакәышьқәеи Қырҭтәылантә иаханы иааргоит. 2007 шықәсазы уантә иҳауит аҳәақәа ықәызхуа африкатәи аҿкы, сынтәа – арахә рчымазара бааԥсы", – иҳәеит аветеринартә инспектор хада Ерик Аншба, Sputnik акорреспондент даниҿцәажәоз.

2015 шықәса ажьырныҳәа 15 рзы аҳәааҿтәи агәаҭаратә-ветеринартә маҵзура аусура хацныркит Ԥсоу аҳәааҿы, 2012 шықәсазы усҟантәи Аԥсны ахада Александр Анқәаб идҵала арҭ амаҵзурақәа русура аанкылан агәаҭаратә пунктқәа "Ԥсоу", "Егры" рҟны.

10