Флаг.

Аԥсны абираҟ раԥхьатәи аекземплиар амузеи аҟны ицәырыргеит

13
(ирҿыцуп 16:07 06.06.2017)
1992 шықәсазы ирӡахыз, Аԥсны абираҟ раԥхьатәи аекземплиар Аҟәа ақалақь аҟны еиҿкаау Владислав Арӡынба ихьӡ зху Аибашьратә фырхаҵара аҳәынҭқарратә музеи аҟны ицәырыргеит.

АҞӘА, ԥхынгәы 24 — Sputnik, Асҭанда Арӡынԥҳа. 1992 шықәсазы ирӡахыз, Аԥсны абираҟ раԥхьатәи аекземплиар, Владислав Арӡынба ҳамҭас ииҭеит абаза жәлар рхаҭарнак Олег Етлухов, 1992 шықәсазы имҩаԥысуаз, раԥхьатәи аԥсуа-абазатә Конгресс аҟны. Ҩеижәа шықәса рышьҭахь абираҟ хнырҳәын Аԥсныҟа, иахьа уи Аҟәа ақалақь аҟны еиҿкаау Владислав Арӡынба ихьӡ зху Аибашьратә фырхаҵара аҳәынҭқарратә музеи аҟны иҵәахуп ҳәа Sputnik акорреспондент илзеиҭалҳәеит амузеи адиректор Мзиа Беиаԥҳа.

"Лыхны имҩаԥысуаз Аконгресс аҟны Олег Етлухов Владислав Арӡынба диҳәеит уа иқәгылаз абираҟ ииҭарц. Арӡынба дақәшаҳаҭхеит. Арӡынба ихьчаҩ Владислав Григори-иԥа иеиҳәеит ари абираҟ раԥхьатәи аекземплиар шакәу, уи аҭакс Арӡынба иҳәеит Кавказ асас дызҳәаз иарбанызаалак зегь ширҭо. Абри атәы нарҭбааны еиҭеиҳәоит Олег Етлухов ишәҟәаҟны", — лҳәеит Мзиа Беиаԥҳа.

Абираҟ иануп Владислав Арӡынба ианҵамҭа. Амҩан, абираҟ рӷьычит ҳәа еиҭалҳәоит лара

"Абазашҭаҟа амҩа ианықәыз абираҟ ыӡит. Абираҟ аԥшаара ҩымз инарзынаԥшуа иаҿын. Етлухов иажәақәа рыла ԥшҩык иалҳәеит абираҟ ыҟазар ахьалшоз. Убри ашьҭрала абираҟ ԥшаан", — еиҭалҳәоит Беиаԥҳа.

2013 шықәса рзы Аԥсны аҳәынҭқарратә бираҟ раԥхьатәи аекземплиар Аԥсны аиҳабыра ирыҭан. Амузеи адиректор лажәақәа рыла иара аҭыԥ ааннакылараны иҟоуп Аԥсны жәлар Рџьынџьтәылатә еибашьра иазку аекспозициаҟны.

"Ҳара, аибашьра алагара амш иазкны ацәыргақәҵа ҿыц аиҿкаара ҳагәҭакуп. Раԥхьатәи абираҟгьы иара иахәҭакхоит. Уи адагьы ацәыргақәҵаҿ аҭааҩцәа идырбахоит акомандирцәа рыхсаалақәа, урҭ руак ареспублика арратә военком иҳаиҭеит. Ҳара иара убасгьы ацәажәарақәа ҳамоуп Совмин иахадыргылаз абираҟгьы аԥсадгьыл ахь архынҳәразы. Иахьазы иара Нхыҵ Кавказ иҟоуп", — еиҭалҳәоит Беиаԥҳа.

Ҳаамҭазтәи Аԥсны Аҳәынҭқарратә бираҟ шьақәырӷәӷәан 1992 шықәса ԥхынгәы 23 рзы, Аԥснытәи АССР Иреиҳаӡоу Асовет аилатәараҟны, 1978 шықәсатәи Аԥснытәи АССР Аконституциа аусура аанкыларази 1925 шықәсазтәи Аԥснытәи ССР Аконституциа аиҭашьақәыргыларази аӡбра анрыдыркыла ашьҭахь.

13