Визит В.А. Чирикба в ЮО.

Аԥсны Адәныҟатәи аусқәа рминистрра Аахыҵ Уаԥстәыла имҩаԥнаго авизит

8
2015 шықәса нанҳәа 16 рзы аминистр Виачеслав Чрыгба хадас дызмаз Аԥсны Адәныҟатәи аусқәа рминистрра аделегациа Аахыҵ Уаԥстәыла иаҭааит. Аԥсны Аҳәынҭқарра Адәныҟатәи аусқәа рминистри Аахыҵ Уаԥстәыла Адәныҟатәи аусқәа рминистри рнапы аҵарҩит Аԥсни Аахыҵ Уаԥстәылеи ртәылауаа визада реиҭанеиааиразы Аиқәшаҳаҭра.

АҞӘА, нанҳәа 18 — Sputnik. Адәныҟатәи аусқәа рминистр Виачеслав Чрыгба, аминистр ихаҭыԥуаҩ Олег Аршба, Аминистрра аҟәша аиҳабы Адгәыр Чегьиа злахәыз, Аԥсны Аҳәынҭқарра Адәныҟатәи аусқәа рминистрра аделегациа Аахыҵ Уаԥстәыла иаҭааит ҳәа аанацҳауеит Аԥсны Адәныҟатәи аусқәа рминистрра.

Аминистрра ишаанацҳауа ала Аԥснытәи аделегациа идикылеит Аахыҵ Уаԥстәыла Апрезидент Леонид Тибилов. Иара инаҵшьны иазгәеиҭеит ари авизит шымҩаԥысуа Аԥсни Аахыҵ Уаԥстәылеи разхаҵара амш аламҭалазы.

"Аԥсны Аҳәынҭқарра Адәныҟатәи аусқәа рминистр Виачеслав Чрыгбеи Аахыҵ Уаԥстәыла Адәныҟатәи аусқәа рминистр Казбулат Цховребови рнапы аҵарҩит Аԥсни Аахыҵ Уаԥстәылеи ртәылауаа визада реиҭанеиааиразы Аиқәшаҳаҭра", — ҳәа аанацҳауеит аминистрра.

Иара убасгьы Аахыҵ Уаԥстәыла иҟоу Аԥсны Аҳәынҭқарра Ацҳаражәҳәарҭаҟны имҩаԥысит Ацҳаражәҳәаҩ Алан Елбакиеви аделегациа алахәылацәеи реиԥылара. Иалацәажәан Ацҳаражәҳәарҭа имҩаԥнаго аусурақәеи ԥхьаҟатәи апланқәеи ртәы.

Абри ашьҭахь аиԥылара рыман Виачеслав Чрыгбеи, Аахыҵ Уаԥстәыла Адәныҟатәи аусқәа рминистр Казбулат Цховребови.

"Аиԥылараан аганқәа ҩ-ганктәи аизыҟазаашьақәа ирылацәажәеит, иазгәарҭеит реимадарақәа аҩаӡара ҳаракы рыманы ишыҟоу. Иара убасгьы ирылацәажәан ԥхьаҟатәи аусурақәа ртәы. Анапы аҵаҩын аусбарҭақәа рыбжьара 2015-2016шш. рзтәи аконсультациақәа Рыплан", — ҳәа аанацҳауеит Аԥсны Аҳәынҭқарра Адәныҟатәи аусқәа рминистрра.

Аԥснытәи аделегациа авизит иацҵахоит.

8