Администрация г. Сухум.

Аҳҭнықалақь аҟны адгьыл участокқәа рыҭара апроцедура 30 мшы еиҳахом

12
(ирҿыцуп 16:06 16.10.2015)
Аҟәа ақалақь аҟны ақалақь Ахадара аӡбрала ишьақәырӷәӷәоуп адгьыл участокқәа рыҭара арегламент.

АҞӘА, жьҭаара 16 — Sputnik, Асҭанда Арӡынԥҳа. Ақалақь аҟны адгьыл участокқәа рыҭара арегламент ҿыц аус адулоуп абри азҵаараҟны административтә процедурақәа рырмариаразы, урҭ рынагӡара аҿҳәара аркьаҿразы ҳәа ҳкорреспондент илзеиҭеиҳәеит  архитектуреи аргылареи рзы Аусбарҭа анџьныр хада Вахтанг Қәаранӡиа.

Административтә регламент ишьақәнаргылоит  арзаҳал ахәаԥшразы иазоушьҭу аҿҳәара,  апроцедурақәа реилазаареи реишьҭагылашьеи иҳәеит иара. Уаанӡа  асеиԥш иҟаз адокумент аҳҭнықалақь Ахадараҟны иҟамызт.

"Уаанӡа арзаҳал нарышьҭуан адгьылхәҭа аиуразы, иҟалалон иара аныӡуаз, уажәы усеиԥш иҟалом. Уажәы азыҳәа ҟазҵо ауаҩы идыруеит документқәас иаҭахны иҟоу, иарбан ҿҳәароу урҭ рыӡбара иамоу. Арзаҳал ахәаԥшразы азеиԥш ҿҳәара 30 мшы ирхымсыроуп", — ҳәа азгәеиҭеит Қәаранӡиа.

Арегламент азы ишьақәыргылоу адокументқәа рсиа инацҵаны аҽа документқәак аҭахны иҟам ҳәа азгәеиҭеит анџьныр.

"Ачынуаҩ уажә азин имам иарбоу адокументқәа инархырҳәҳәаны аҽа документқәак аҭахуп ҳәа аҳәара. Еиуеиԥшым аршаҳаҭгақәа урышьҭаланы аныҟәарагьы аҭаххом. Азыҳәа ҟазҵо ауаҩы ҳусбарҭахь дааиуеит, ҳара иахәҭаны иҟоу аконсультациа иаҳҭоит, адокументқәа зегьы рҿырԥшқәа иҳарбоит, иааигаз адокументқәа ҳадаҳкылоит. Зыӡбахә ҳамоу зых иақәиҭу адгьылхәҭақәа роуп", — ҳәа азгәеиҭоит иара.

Қәаранӡиа иажәақәа рыла, аԥҟарра ҿыцқәа инарықәыршәаны актәи аетап аан адгьылҭыԥқәа зегьы рыҭара алшоит  заанаҵтәи ахархәараз.

"Ус зыҟаҳҵо, адгьылҭыԥ заҳҭо ауаҩы  апроект заа иҟаиҵарц азоуп. Анормақәа ирықәшәо апроект аныҟаҵахалак ашьҭахь ауп  иааиԥмырҟьаӡакәа адгьыл ахархәаразы ианраҳҭо", — ҳәа азгәеиҭеит иара.

Аԥсны Адгьыл азы акодекс инақәыршәаны, адгьыл ажәлар иртәуп, аҭиреи аахәареи ҟалом, аха Аҟәа ақалақь аҟны азин ыҟоуп адгьыл ахархәараз аамҭала, ҿҳәарада, шьҭрақәлала аиура, аренда ҳасаблагьы абрахь иналаҵаны.

Арегламент шьақәдырӷәӷәеит ахаша, жьҭаара 14 рзы ақалақь Ахадара Ақәҵарала.

Адокумент атекст нагӡа Аҟәа ақалақь Ахадара аофициалтә саит аҟны иарбахоит.

12