Генеральный директор Черноморэнерго Аслан Басария.

Басариа: афымцамч Қырҭтәылаҟа киловатткгьы цом

9
"Амшынеиқәафымцамч" адиректор хада Аслан Басариа Жәлар Реизара адепутатцәа ирзеиҭеиҳәеит ареспублика аенергетика иамоу апроблемақәа ртәы.

АҞӘА, жәабран 3 — Sputnik, Саид Барганџьиа. "Амшынеиқәафымцамч" адиректор хада Аслан Басариа Жәлар Реизара адепутатцәа ирзеиҭеиҳәеит ареспублика аенергетика иамоу апроблемақәа ртәы. Афымцамч иахьатәи аамҭазы, Қырҭтәылаҟа киловатткгьы цом иҳәеит иара.

Басариа еиҭеиҳәеит афымцаелектрастанциа аӡынразы иоунажьуа афымца шмаҷу, аӡынразы Аԥсны 100 процентк рҟынӡа афымцамч ахы ианархәоит ҳәа.

"Аӡын ЕгрГЕС Аԥсназы мацара аус ауеит уҳәар ауеит", — иҳәеит адиректор хада.

Аслан Басариа иазгәеиҭеит 2015 шықәса аԥхын аахыс аӡҭачырҭаҟны аӡеизакра аганахьала апроблема шыҟоу. Иара убасгьы иҳәеит сынтәа аарҩара шыҟаз.

"Аԥхынгьы анорма аасҭа 13 метра еиҵан аӡы ашәара. Аиҳарак иара аныҭҭәаауа ааԥыни аԥхыни роуп", — иҳәеит "Амшынеиқәафымцамч" адиректор хада Аслан Басариа.

Иара убасгьы дазааҭгылеит асовет аамҭақәа раан аӡы ашәара 443 метра ианҩеилак афымцастанциа аусура шааныркылоз. Иахьазы абри аҩаӡараҟноуп иахьыҟоу аӡы ашәара иҳәеит иара.

Иара инаҵшьны иазгәеиҭеит аӡы ашәара 420 метра рҟынӡа илеир афымцастанциа аанкылатәхоит ҳәа.

"Аамҭа-аамҭала афымца арцәара азхоны иҟам аӡеизакразы. Аҭагылазаашьа лԥхала алҵразы аҽа ҩынтә еиҳаны аекономиа ҟаҳҵароуп, аха уи аҩыза алшара ҳамам", — иҳәеит Басариа.

Иара иазгәеиҭеит иахьазы аицәажәарақәа шцо Урыстәылатәи Афедерациа аӡынтәи аамҭазы афымца Аԥсны иазоурыжьларц, аԥхын – арантәи уахь иҳашьҭларц.

9