Светлана Корсаиа

Корсаиа: ахыҵхырҭақәа раԥхьа игылаз Дырмит иоуп

437
(ирҿыцуп 13:26 21.02.2016)
Аԥсуа сахьаркыратә литература ауасхыр азышьҭаҵаҩ, аԥсуа “Анбан“ аиқәыршәаҩ, рапҳьатәи аетнограф, рапхьатәи аԥсуа газеҭ “Аԥсны“ аредақтор, раԥхьатәи атеатртә труппа аиҿкааҩ Дырмит Гәлиа имш ира азгәарҭоит иахьа, жәабран 21 аҽны.

АҞӘА, жәабран 21 — Sputnik, Рада Ажьиба. Аԥсуа интеллигенциеи, ашәҟәыҩҩцәа ҿарацәеи, ажурналистцәеи, аетнографцәеи, ажәакала, иабжьагажәа зҭахыз зегьы ахьеизоз абри аҩны аҟны ауп. Абри аҩны даараӡа ачеиџьыка ҩнын, асас изы ашәа аартын, аԥсуара алыжж иҟан, ҳәа лҳәеит Дырмит Гәлиа иҩны-амузеи аиҳабы Светлана Корсаиа.

"Традициала, есшықәса имш ира аҽны, ихатәроу ашәҟәыҩҩцәеи, аҿарацәеи, аԥсуа аинтеллигенциеи иара дрылагылоушәа иазгәарҭоит, имҩаԥыргоит алитературатә хәылԥазқәа. Дырмит Гәлиа иԥсҭазаара даналҵ анаҩсан, иҟаз атрадициақәа ирыцҵо иахьагьы иааҳгоит. Аԥсуа доуҳатә культураҿы уанызхәаԥшлак, ухы наздуклак зегьы иара инапы иҵаҵит, ахыҵхырҭақәа раԥхьа игылаз Дырмит иоуп. Иара зегьы гәҭыхас иман", — ҳәа азгәалҭеит Корсаиа.

Дырмит Гәлиа ихьыӡ акамыршәраз иаԥҵоуп аҵарауаа рыбжьара апремиа, ашколқәеи, амҩақәеи, аҵараиурҭақәеи ихьыӡ рхыуп.

"Дырмит Гәлиа иеиԥшу маҷуп, иҟаиҵаз даара ирацәоуп, аԥсуа сахьаркыратә литература ауасхыр азышьҭаҵаҩ, аԥсуа “Анбан“ аиқәыршәаҩ, рапҳьатәи аетнограф, раԥхьатәи аԥсуа газеҭ “Аԥсны“ аредақтор, раԥхьатәи атеатртә труппа аиҿкааҩ Дырмит Гәлиа даниз амш, аԥсуа жәлар ҳзыҳәан ныҳәа мшуп, акультурахь, ацивилизациахь ҳназгаз, ихьыӡ акамыршәра ҳашьҭазар ауп", — ҳәа азгәалҭеит Корсаиа.

"Дырмит Гәлиа иааԥсара пату ҳзақәзарц азы иҟаҵатәугьы макьаназ ирацәоуп", — ҳәа ацылҵеит уи.

Дырмит Есыф-иԥа Гәлиа диит 1874 шықәсазы, жәабран 21 аҽны Уарча ақыҭан, аԥсуа ҭаацәараҿы. Ихәыҷратә шықәсқәа раахыс ауадаҩрақәа рацәаны ишихигазгьы, иара есымша дашьҭан аԥсуа жәлар аҵара рҵарц азы алшара рыҭара.

Дырмит Гәлиа иаԥҵамҭақәа аԥсуа литератураҿы, иааизакны ҳкультураҿ ианнакыло аҭыԥ даара акраҵанакуеит. Ԥсра зқәым аҩымҭақәа иреиоуп ановелла «Атәым жәҩан аҵаҟа», ароман «Камаҷыҷ».

437