Атаман Чирков Андрей.

Гәылрыԥшь араион аказақцәа реилазаара атаманс далхуп Андреи Чирков

14
Ҟәбантәи аказақцәа рыр Аҟәатәи аҟәша ҷыда Гәылрыԥшь араион аказақцәа реилазаара атаманс далхуп Андреи Чирков.

АҞӘА, хәажәкыра 15 — Sputnik, Роберт Џьапуа. Ҟәбантәи аказақцәа рыр Аҟәатәи аҟәша ҷыда Гәылрыԥшь араион аказақцәа реилазаара атаманс далхуп Андреи Чирков.

"Сгәы иаанагоит зегь маншәалахап ҳәа. Араион аҟны аусура бзиа избо ауаа нхоит. Аҿар апатриотизм рылааӡара ҳҽазаҳшәап. Шәыцхыраара сақәгәыӷуеит", — иҳәеит Чирков.

Ҟәбантәи аказақцәа рыр Аҟәатәи аҟәша ҷыда атаман инапынҵақәа назыгӡо Андреи Журавлиов иажәақәа рыла алхрақәа мҩаԥысит Гәылрыԥшь араион аказақцәа реилазаара атаман Владимир Москаленко иҭахара инадҳәаланы.

"Алхрақәа мҩаԥгатәхеит Гәылрыԥшь араион аказақцәа реилазаара атаман Владимир Москаленко иҭахара инадҳәаланы", — иҳәеит Журавлиов.

Иара убасгьы иазгәеиҭеит Владимир Москаленко Ҟәбантәи аказақцәа рыр Аҟәатәи аҟәша ҷыда атаман инапынҵақәагьы шынаигӡоз. Убри инадҳәаланы араҟагьы лассы алхрақәа мҩаԥысраны ишыҟоу.

"Макьаназы аҽазыҟаҵаратә уснагӡатәқәа мҩаԥысуеит. Макьаназы иалкаан кандидатк иӡбахә ҳәам. Апроцесс ацара иаҿуп. Алхрақәа мшаԥымза анҵәамҭа ма лаҵарамза алагамҭаз имҩаԥгахоит", — иҳәеит Андреи Журавлиов.

Андреи Чирков Ҟәбантәи аказақцәа рыр Аҟәатәи аҟәша ҷыда Гәылрыԥшь араион аказақцәа реилазаара атаманс далырхит Гәылрыԥшь араион аказақцәа реилазаара изаамҭанытәим аизараҟны, хәышықәса ҿҳәарас ҳәа иҭаны. Атаманрахь акандидат 35 шықәса дреиҵамзароуп, 65 шықәсагьы деиҳамзароуп.

Ҟәбантәи аказақцәа рыр Аҟәатәи аҟәша ҷыда атаман Владимир Москаленко шьҭрала Гәдоуҭа араион Бақлановка ақыҭа датәын. Аԥсны жәлар Рџьынџьтәылатә еибашьра далахәылан. Изныкымкәа ахәрақәа иоухьан. Дҭахеит 2016 шықәса жәабран мза 13 рзы Каман ақыҭан.

14