Sputnikи Акультура аминистрреи апроект Атеатри аԥсҭазаареи хацдыркит

Sputnikи Акультура аминистрреи апроект "Атеатри аԥсҭазаареи" хацдыркит

27
(ирҿыцуп 19:37 27.03.2016)
Атеатр адунеизегьтәи амш азы Sputnik Аԥсни Акультра аминистрреи еицаԥырҵаз авидеопроект аҳәаақәа ирҭагӡаны, актиорцәа атеатр аԥсҭазаашьа атәы еиҭарҳәоит, иара убас, бзиа ирбо апиесақәа рцыԥҵәахақәа ирыԥхьоит.

АҞӘА, хәажәкыра 27 – Sputnik. Аинформациатә маҵзуреи арадио Sputnik Аԥсни Акультура аминистрреи ихацдыркит есымчыбжьатәи апроект "Атеатри аԥсҭазаареи". Атеатр адунеизегьтәи амш азы излагаз апроект шьақәгылоуп актиорцәа рмонологқәа рыла, уи рхы аладырхәит Самсон Ҷанба ихьӡ зху атеатр, Аурыс драматә театр, Аҿар ртеатр актиорцәа. Апроект иалагӡаны атеатралтә сцена азҟазацәа еиҭарҳәоит урҭ рыԥсҭазаараҿы атеатр ҵакыс иамоу, иазааҭгылоит рзанааҭ иадҳәалоу ахҭысқәа, иара убас, ирыԥхьоит бзиа ирбо апиесақәа рҟынтәи ацыԥҵәахақәа.

Ельвира Арсалиаԥҳа, Аԥсны акультура аминистр: "Аԥсны акультура аминистрреи Sputnik Аԥсни русеицура ҵакыс иамоуп – ахәаԥшҩы атеатр ашҟа ихьарԥшра, аҿар рыбжьара атеатр аҳаҭыр ашьҭыхра. Апроект авидеомонологқәа актиорцәа ражәабжьқәа рылоуп ишышьақәгылоу. Урҭ еиҭарҳәоит азанааҭ иацу ауадаҩрақәа ртәы, еиҳа бзиа ирбо арольқәа, ажәакала, ахәаԥшцәа рзы абжьааԥны имаӡоу, акыр аинтерес зҵоу ажәабжьқәа. Ҳгәыӷуеит, атеатралтә ҟазара бзиа избо уи иазкны инарҭбааны аилкаара роуп ҳәа.

Инал Лазба, Sputnik Аԥсны аиҳабы: "Sputnik Аԥсны иҭнажьуа астатиақәа рыбжьара азҿлымҳара ду рымоуп акультуратә хҭысқәа ирызку ажәабжьқәа, избанзар урҭ амилаҭ рдоуҳатә ԥсҭазаара иахәҭакуп. Иахьа, ареспубликаҿы атеатр азҿлымҳара еизҳауеит, ҳара ҳвидеопроект уи аус иацхраауеит, аҿар атеатр иаднаԥхьалоит".

Амина Лазԥҳа, апроект "Атеатри аԥсҭазаареи" автор, апортал Sputnik Аԥсны апродиусер: "Ари апроект ала Sputnik Аԥсны аԥхьаҩцәа ирызнанагар аҭахыуп Аԥсны атеатр иамоу ауадаҩрақәа иамоу ашҟа. Атеатралтә ԥсҭазаара амилаҭтә хаҿра шьақәзыргыло ахәҭақәа ируакуп. Иахьатәи атеатр даҭахыуп ахәаԥшҩы ҿыц, убри аҟнытә иахьа акыр аҵакы амоуп атеатр ашҟа азҿлымҳара ашьҭхра, уи аӡыргара.

Атеатр адунеизегьтәи амш – атеатр аусзуҩцәа зегьы рзанааҭтә ныҳәоуп, есышықәса хәажәкыра 27 рзы иазгәарҭоит. Ари аныҳәа абри адевиз ала имҩаԥысоит "Атеатр адунеи ажәларқәа реилибакаареи рҭынч нхареи аҳасаб ала".   

 Sputnik (sputniknews.com) — жәларбжьаратәи аинформациатә маҵзуреи арадиои атәылақәа жәпакы рҟны амультимедиатәи аинформациатәи хабқәа амоуп. Sputnik ашҟа иаҵанакуеит асаитқәа, арадиодырраҭарақәа, амобилтә хархәагақәа, иара убас, асоциалтә каҭақәа рҟны адаҟьақәа. Анапаҵаҩцәа рзы Sputnik, англыз, араб, аиспан, акитаи бызшәақәа рыла иҭыҵуеит.

27
Атемақәа:
"Атеатри аԥсҭазаареи" (18)