АҞӘА, мшаԥымза 21 — Sputnik, Саид Барганџьиа. Апарламент адепутатцәа рыбжьы рҭиит Алмас Џьапуа ирыдигалаз атәымтәылауаа анхарҭаҭыԥқәа раархәаразы азин аанкылара азҭо азакәан апроект иаҿагыланы.
Амаратори иаҿагыланы аԥхьатәи аԥхьараҟны рыбжьы рҭиит 15-ҩык адепутатцәа, 10-ҩык уи иақәшаҳаҭхеит, 5-ҩык ақәҿырымҭит, 3-ҩык рыбжьы рымҭиӡеит. Аилатәара иалахәын 34-ҩык адепутатцәа.
Адепутат Алмас Џьапуа аҳәара ҟаиҵеит актәи аԥхьарала еиҭамҵуа амазара аикәыршара аанкылараз азакәан рыдыркыларц.
"Анхарҭаҭыԥқәа атәымтәылауаа раархәаразы азакәан азинтә гхақәа рацәаны иамоуп", — иҳәеит Џьапуа.
Адепутат Аслан Кобахьиа иазиԥхьаӡоит иахьазы еиҭамҵуа амазара аҭира азин ҟазҵо азакәан адкылара алшом ҳәа.
"Ҳара ҳҟны анхарҭатә џьармыкьа хәыҷуп, ҳтәылауаагьы аконкуренциа ҟарҵартә иҟам. Адепутатцәа ргәыԥк атәымтәылауаа еиҭамҵуа амазара раархәаразы азҵаара анцәырырга ашьҭахь ахәқәа ҩынтәны еиҳахеит. Ҳара ҳҟны 80 процент ауааԥсыра нанамгацәоуп уҳәар ауеит", — иҳәеит Кобахьиа.
Асааҭ 11 инарзынаԥшуан Апарламент ахыбрахь ауаа анеира ианалагоз. Урҭ еиҭамҵуа амазара аҭира иаҿагылоу роуп.
15 минуҭ рҟынӡа ианыԥшы ашьҭахь ирыӡбеит Адраматә театр аҿаԥхьаҟа ииасны адепутатцәа ирыдыркыло аӡбра иазыԥшырц. Еизаз ирҳәоит арахь рааира хатәгәаԥхарала шакәу ишымҩаԥысуа.
"Аԥсны еиҭамҵуа амазара аҭира иаанаго атәыла тәымтәылауаала арҭәроуп. Урҭ уаҵәы ареспублика иатәылауаахоит, ҳҳәынҭқарра алахьынҵагьы рыӡбо иалагоит. Аԥсуа етнос ашәарҭара иҭаргылахоит", — ҳәа азиԥхьаӡоит академик Ҭимур Ачыгәба.
Абри азакәан адкылара атәыла асуверенитет иаԥырхаганы дахәаԥшуеит Ачыгәба.
"Ҳара аԥсуа ҳәынҭқарра аиқәырхара ҳгәы иҭазар, ари азҵаара зынӡаск алацәажәара аҭахны иҟаӡам. Сгәы иаанагоит Апарламентгьы уи амҩа иқәларым ҳәа", — иҳәеит иара.
Иҟан еизаз рахьтә маҷк еиҭакны ихәыцуазгьы. Аҵарауаҩ Валери Бигәаа иазгәеиҭеит иалкаау аҭагылазаашьақәа ҟалар шалшо.
"Еиҭамҵуа амазара рааурхәар ауеит аҳәынҭқарра ахәарҭа азҭо ахаҿқәа. Арахь иаҵанакыр алшоит абизнесуаа. Аха массала анхарҭаҭыԥқәа рыҭира зынӡаск иҟалом ҳәа исыԥхьаӡоит", — иҳәеит иара.
Аҿар рхаҭарнакцәа иргәаԥхоит Апарламент абри азҵаара иахьалацәажәо.
"Апарламент абри азҵаара иахьалацәажәо аҵакы аманы избоит. Уи ҳкылнагоит азакәанқәа ишахәҭоу еиԥш ианрыдыркыло аамҭахь", — иҳәеит еизаз рҟынтәи Лаврик Фет-оӷлы.
Амаратори аҟны иарбам еиҭамҵуа амазара ахааназ атәымтәылауаа рзыҭира ҟалом ҳәа. Уаҟа иарбоу аҳәынҭқарраҟны иазхом аус ишахәҭоу еиԥш аиҿкааразы азакәанқәа ҳәоуп, иҳәеит Апарламент адепутат Алмас Џьапуа.
