Денис Саманба.

Денис Воронежтәи иҩызцәа ицхрааит

13
(ирҿыцуп 11:14 24.06.2016)
Амаланыҟәарныҟәаҩ Денис Саманба дымҩаԥызгоз автомашьына Воронежтәи аобласт аҟны иԥхасҭахеит.

АҞӘА, рашәарамза 24 – Sputnik, Бадри Есиава. Амаланыҟәарныҟәаҩ Денис Саманба дымҩаԥызгоз автомашьына Воронежтәи аобласт аҟны иԥхасҭахеит. Уи ацынхәрас Денис иаб иҩызцәа акоманда ирырҭеит амҩаԥгаратә автомашьына. Абри атәы ҳзааицҳаит амарафон алахәыла Арлен Лашәриа.

"Воронежтәи аобласт ақыҭа Бобров ҳнеиуаны ҳмашьына ԥхасҭахеит. Аҭыԥантәи ауааԥсыра рыцхыраарала уи аремонт ахьазыруаз инаагеит, аха уаҟагьы иагыз рзыҟамҵеит. Денис иаб аҭел дизасны иҟалаз иеиҳәеит. Гарик Саманбагьы Воронежҟа иҩызцәа аҭел дырзасит ацхыраара ҳарҭарц", — иҳәеит Арлен.

Денис иакәзар 280 км дахысит. Иаарласны Тула днеираны дыҟоуп. Аҳауатә ҭагылазаашьа акәзаргьы рацәак ишоурам, уи иара ицхраауеит, иҳәеит Лашәриа.

Дениси иҩызцәеи рашәарамза 24 рзы Москва анеира рыгәҭакуп.

Амаланыҟәарныҟәаҩ Денис Саманба ималаныҟәатә марафон Аҟәа-Москва хацыркхеит асабша, рашәарамза 18 рзы, 4:30 ашьыжь.

Денис Саманба игәҭакуп 2500 километра ахысра, Аҟәа инаркны Москванӡа иахысрала аԥснытәи аҿар амаланыҟәатә спорт радыԥхьалара. Уи адагьы зегьы идирбар иҭахуп ауаҩы иҭаххар дыззымиааиуа акгьы шыҟам.

13