Детский эстрадно-музыкальный театр Каданс на сцене Русского театра

"Каданс" аурыс драматә театр аҟны икәгылеит

6
(ирҿыцуп 14:05 24.06.2016)
Аурыс драматә театр аҟны иқәгылеит ҳаамҭаз ирылаҵәоу амузыкеи ашәақәеи, ароки, аџьази, аблиузи назыгӡо ахәыҷтәы естрадатә-музыкатә театр "Каданс".

АҞӘА, рашәарамза 24 – Sputnik, Анжелика Бениаԥҳа. Аурыс драматә театр аҟны имҩаԥысыз аестрада-музыкатә театр "Каданс" раԥхьатәи аконцерт қәҿиарала ирыдыркылеит ахәаԥшыҩцәа, ҳәа ҳаиҳәеит агәыԥ анапхгаҩы Алик Алавердиан.

Иара иажәақәа рыла атеатр асценаҟны амузыкантцәа қәыԥшцәа агәыԥ еиҿкааужьҭеи ҩы-шықәса ирылагӡаны ирҵаз, рҟазара, рҟыбаҩ ишалшоз ала иаадырԥшит.

Детский эстрадно-музыкальный театр Каданс на сцене Русского театра
© Sputnik / Томас Тхайцук
Детский эстрадно-музыкальный театр "Каданс" на сцене Русского театра

"Уажәы ирацәаҩуп афонограмма ала иқәгыло. Ҳара уи мап ацәаҳкуеит. Аҽазыҟаҵарақәа раангьы ашәа ҳҳәоит фонограммада. Ахәыҷқәа иаразнакы амузыка ду иаҳаршьцылоит", — иҳәоит Алавердиан.

Артистцәа қәыԥшцәа инарыгӡеит 18 композициа. Урҭ иахьазы ирылаҵәоу амузыкеи ашәақәеи, ароки, аџьази, аблиузи роуп. Инарыгӡон аԥсуа, аурыс, англыз, аиталиа бызшәақәа рыла.

Агәыԥ алахәыла Софиа Ҭарԥҳа аа-шықәсоуп амузыка лнапы алакуижьҭеи. Амузыкатә школ далгахьеит. Аабатәи акласс аҟны аҵара лҵоит. Илыгәҭакуп лаԥхьаҟатәи лыԥсҭазаара амузыка иадылҳәаларц.

Детский эстрадно-музыкальный театр Каданс на сцене Русского театра
© Sputnik / Томас Тхайцук
Детский эстрадно-музыкальный театр "Каданс" на сцене Русского театра

"Агәыԥ "Каданс" аҟны рок-н-ролл анагӡаразы авокалист данаҭахха, сара исыдыргалеит. Сара даара исгәаԥхоит сызҿу. Уаанӡагьы агәыԥ "До ре ми" аҟны ашәа сҳәон. Уаҟа сара асцена сашьцылеит. "Каданс" аҟны егьырҭ амузыкантцәа аус рыцура сҵеит, асинтезатор аҟны ахәмарра салагеит. Уажәы агитара арҳәара сҽазысшәоит", — лҳәеит лара.

Амузыкант Абзагә Марыхәба аконцерт Barista time аҟынӡа агәыԥ "Каданс" аӡбахә имаҳацызт.

Детский эстрадно-музыкальный театр Каданс на сцене Русского театра
© Sputnik / Томас Тхайцук
Детский эстрадно-музыкальный театр "Каданс" на сцене Русского театра

Иахьатәи аамҭазы агәыԥ "Каданс" иалахәуп 18-ҩык амузыкантцәа. Урҭ реиҳараҩык ныҟәоит Константин Ковач ихьӡ зху ахәыҷтәы ҟазаратә школ №1 ашҟа. Абри ашкол аҟноуп иахьаԥҵаз агәыԥгьы.

6