Владислав Арӡынба ибаҟа ашьақәыргыларатә усурақәа ахырқәшарахь инеиуеит

Владислав Арӡынба ибаҟа ашьақәыргыларатә усурақәа ахырқәшарахь инеиуеит Гагра

21
Владислав Арӡынба ибаҟа ашьақәыргыларазы нап зыркыз аусурақәа, хара имгакәа ихырқәшахоит Гагра.

ГАГРА, нанҳәамза 12 — Sputnik, Саида Жьиԥҳа. Аԥсны Аҳәынҭқарра раԥхьатәи Ахада Владислав Григори-иԥа Арӡынба ибаҟа ашьақәыргыларазы Гагра имҩаԥысуаз аусурақәа ахырқәшарахь инеиуеит. Ааигәа иара официалла иаартхоит. Уи авторцәас иамоуп аскульпторцәа Руслан Габлиеи Амиран Адлеибеи.

Ҵыԥхтәи ашықәс азы, Гагратәи Ахьӡ-аԥша амемориалтә комплекс аханы ишьҭаҵан, Владислав Арӡынба игәалашәара иазкыз ахаҳә. Усҟан, араион Анапхгареи адепутатцәеи рыла ишьақәгылаз акомиссиа иазырыӡбеит, ари аҭыԥ аҿы ишыргылахо абаҟа.

2016 шықәса алагамҭаз уи анагӡара нап аркын.

Иахьазы, абаҟа иакәыршаны ишьҭаҵоуп зхаҭабзиара ҳаракыу амармалташь хаҳә. Иаанхаз абиуст апастамент аҟны ақәыргылара ауп.

"Ҳара абиуст ачаԥара ҳаналагоз хықәкыс иҳаман зегьы еицырдыруа Владислав Арӡынба иԥшра мацара акәымкәа, иуаҩшьеи игәаӷьреи аарԥшра. Раԥхьанатә абиуст ҳчаԥеит анышәаԥшь ала, анаҩс ииаҳгеит агипс ахь. Акраамҭа иҭҵааны иаҳгеит Ростов, уаҟа ацәахьы ииаҳгеит, аҵыхәтәаны аџьаз ахь", — иҳәеит Руслан Габлиа.

Аскульптор иажәақәа рыла, абиуст аура 1,5 инархыҳәҳәоит.

"Ианакузаалак, абиустқәа анышьақәдыргыло анапқәа адырбаӡом, аха ҳара иаҳҭаххеит, Владислав Арӡынба иполитикатә ҩаӡареи иӷәӷәареи аарԥшызарц. Убри инамаданы, иҩнапык аҳарбеит. Акаҟны икуп ақьаад егьи аҟны ираҵәоуп иҭаҷкәым", — инаҵишьит абаҟа авторцәа иреиуоу Руслан Габлиа.

Хара имгакәа Владислав Арӡынба ибаҟа аргылара иадҳәалоу аусурақәа шьаҭанкыла ихырқәшахоит.

Ахьӡ-аԥша амемориалтә комплекс ақалақьуаа рзы иԥшьоу ҭыԥхеит. Ааигәа уи харҭәаахоит ҳхақәиҭра иасимволхаз, Аԥсны Аҳәынҭқарра раԥхьатәи Ахада Владислав Арӡынба ибаҟа ала.

21