Пицундатәи ауахәама

Аконцерт-спектакль Пицунда имҩаԥысуеит

6
Москватәи аконсерваториа апрофессор Евгениа Кривицкаиеи актиор, арежиссиор Петр Татарицкии Пицундатәи ауахәамаҟны цәыббра 26 асааҭ 5 рзы иқәдыргылараны иҟоуп аконцерт-спектакль.

АҞӘА, цәыббра 16 – Sputnik, Анжелика Бениаԥҳа. Москватәи аконсерваториа апрофессор Евгениа Кривицкаиеи актиор, арежиссиор Петр Татарицкии Пицундатәи ауахәамаҟны цәыббра 26 асааҭ 5 рзы иқәдыргылараны иҟоуп аконцерт-спектакль. Абри атәы Sputnik иазеиҭалҳәеит аурӷанарҳәаҩ, Москватәи аконсерваториа апрофессор Евгениа Кривицкаиа.

"Пицундатәи ақәгыларақәа еснагь агәыхыҭхыҭра рыцуп. Асеиԥш иҟоу аҭыԥ аҟны ақәгылара ҭакԥхықәроуп. Уажәазтәи сыпрограмма уаанӡатәиқәа иреиԥшым – дуеттә программоуп", — лҳәеит Кривицкаиа.

Аконцерттә программа "Именем Мадонны" – апоети аԥҳәызба ԥшӡеи рромантикатә ҭоурых ауп. Иззышәаҳәоугьы ицқьоу, иҳараку бзиабароуп.

Аурӷанарҳәаҩ, Москватәи аконсерваториа апрофессор Евгениа Кривицкаиа длыцықәгылоит актиор, арежиссиор, Урыстәылатәи амилаҭтә музыкатә премиа "Овация" заҭәашьо Петр Татарицки.

Акомпозициа иалагалахоит Франческо Петраркеи Виктор Гиугои рсонетқәа, Джироламо Фрескобальди, Джованни Баттиста Червеллини, Иоганн Себастиана Бах, Ференц Лист, Леон Боельман ауарӷан азы рырҿиамҭақәа.

Амузыкант иазгәалҭеит ауахәама архитектура акәзаргьы аҽакы еиԥшымкәа аконцерт-спектакль аформат ишанаало. Уи амузыка аҽаԥшьны апублика аромантикатә дунеи ахь иқәыргалоит.

Актиор, арежиссиор, Урыстәылатәи амилаҭтә музыкатә премиа "Овация" заҭәашьо Петр Татарицки 50 рҟынӡа роль акинои атеатри рҿы дыхәмархьеит. 20 шықәса рҟынӡа арежиссиор-ақәыргылаҩ ҳәа аус иухьеит.

Евгениа Кривицкаиа – дуарӷанарҳәаҩуп, дырҵаҩуп, музыкатә критикуп. Иара убасгьы, аҟазараҭҵаара адоктор, Москватәи аконсерваториа апрофессор ҳәа дыҟоуп, ажурнал "Музыкальная жизнь" редактор хадас дыҟоуп, Урыстәыла иакны иҟоуп ажурнал ҷыда "Ауарӷан" дашьаҭаркҩуп.

6