Аԥсны актәи аҵарадырратә салон

Аԥсуа бызшәа аиқәырхара иазку адискуссиатә клуб мҩаԥысит

17
(ирҿыцуп 16:02 18.11.2016)
Раԥхьатәи "Аԥснытәи аҵаратә салон" ареспубликаҿы имҩаԥысуеит.

АҞӘА, абҵара 18 – Sputnik, Бадраҟ Аҩӡба. Аԥсуа бызшәа аиқәырхареи арҿиареи ирызку адискуссиатә клуб мҩаԥысит Аҟәа абҵара 18 рзы. Аиԥылара иалахәын Аԥсны араионқәа рҟынтәи арҵаҩцәа жәпаҩык, иара убас, иреиҳау аҵараиурҭақәа рҿы аус зуа арҵаҩцәеи. Адискуссиа аҟны ирылацәажәеит аԥсуа бызшәа иамоу ауадаҩрақәеи, урҭ рыӡбаразы иҟаҵатәуи ртәы.

"Иахьа ҳалацәажәеит аԥсуа бызшәа ашколқәа, ахәыҷбаҳчақәа, иреиҳау аҵараиурҭақәа рҿы аҭагылазаашьа зеиԥшроу. Ҳалацәажәон аԥсуа бызшәа аиқәырхара азҵаара, ашкол аҟны аԥсуа бызшәа здыруеи иззымдыруеи рызнеишьа. Урҭ еидыхны аҵара дырҵатәума, мамзаргьы арҵаратә процесс даҽакала ишьақәыргылатәума уҳәа абас еиԥш иҟоу азҵаарақәа ҳарзааҭгылеит", — азгәалҭеит афилологиатә ҭҵаарадыррақәа рдоктор, апрофессор Альдона Ажьиԥҳа.

Ари апроблема аҵарауаҩ излалҳәо ала даараӡа акыр ахыҵуеит.

"Аԥсуа бызшәа здыруеи иззымдыруеи еидыртәаланы аҵара дурҵар ауӡом, урҭ еидыгатәуп, урҭ аҵара зларҵо апрограммақәа еиԥшымзар ауп. Араҟа аиҿыхара ҟалеит, џьоукы ишырҳәаз ала, абызшәа здыруеи иззымдыруеи џьара класск аҟны еилартәаны идырҵатәуп, уи еиҳа иманшәалоуп абызшәа аҵараҿы ҳәа", — азгәалҭеит аҵарауаҩ.

Альдона Ажьиԥҳа лажәақәа рыла, аԥсшәа ззымдыруа аҵаҩцәа хазы агәыԥқәа еиҿкааны уаҟа идырҵалатәуп.

Афорум аҽалархәразы Аԥсныҟа иааит Урыстәыла, Приднестровие, Аахыҵ Уаԥстәыла уҳәа рҵаратә усҳәарҭақәа рхаҭарнакцәа. 

Абҵара 18 рзы имҩаԥысит Аԥсны, Урыстәыла, ИАР атәылақәа рҵаратә еиҿкаарақәа рцәыргақәҵа аусура.

17