Аԥсны анапхгара Семион Григориев идашшылеит

Аԥсны анапхгара Семион Григориев идашшылеит

10
Андреи Карлов иԥсҭазаара далҵит ашәахьа, Анкара ақалақь аҟны, иоуз ахәрақәа ирыхҟьаны. Урыстәыла Адәныҟатәи аусқәа рминистрра иҟалаз ахҭыс терактуп ҳәа азырҳәеит.

АҞӘА, ԥхынҷкәын 22 — Sputnik, Бадри Есиава. Аԥсны Ахада ихаҭыԥуаҩ Витали Габниа, Аԥыза-министр Беслан Барцыц аҳәынҭқарратә усҳәарҭақәа рнапхгаҩцәа Аԥсны иҟоу Урыстәылатәи Афедерациа Ацҳаражәҳәаҩ Семион Григориев идашшылеит Анкара ақалақь аҟны аҭыԥ змаз атеррористтә акт инадҳәаланы.

"Аԥсны анапхгара рыхьӡала Урыстәылатәи афедерациа ажәлари анапхгареи ҳрыдашшылоит. Шықәсқәак раԥхьа ҳаргьы иаҳхаагеит абри аҩыза аҭагылазаашьа, Аԥсны иҟаз Урыстәыла авице-консул ишьраан. Ари арыцҳара аиааира зылшо иӷәӷәоу аҳәынҭқарроуп", — иҳәеит Габниа.

Семион Григориев, Андреи иԥсҭазаара дахьалҵыз инамаданы иҟаҵаз адышшылара ҭабуп ҳәа ахиҳәааит. Иҳәеит раԥхьатәи асааҭқәа инадыркны Ацҳаражәҳәарҭахь адышшыларақәа шынарышьҭуа Аԥсны иқәынхо ауаажәлар. Иара убасгьы иазгәеиҭеит Андреи Карлов Аԥсназы гәыкала дшыҟаз.

"Имаӡам Андреи Г еннади-иԥа еицырдыруаз ипломатны дшыҟаз. Иара даара Аԥсны гәыкала дазыҟан, дадҳәалан. Илшоз зегь ҟаиҵон аконсултә департамент анапхгара аназиуаз ареспублика ауаажәлар апаспортқәа рыҭара арманшәаларазы, Шьамтәылатәи арепатриантцәа рганахьала акәзаргьы аџьабаа ибахьан", — иҳәеит Григориев.

Семен Григориев иҳәеит агәрагара шимоу ацәгьа зуз иахәҭоу ишақәшәо азы.

10