Атәыла Ахада аспортсменцәа ҿарацәа дырԥылеит

Атәыла Ахада аспортсменцәа ҿарацәа дырԥылеит

15
Ашәахьа, ԥхынҷкәын 26 рзы Аԥсны Аҳәынҭқарра Ахада дырԥылеит аԥсуа спортсмен ҿарацәа.

АҞӘА, ԥхынҷкәын 27 — Sputnik, Анжелика Бениаԥҳа. Еиуеиԥшым аспорттә хкқәа рганахьала жәларбжьаратәи аицлабрақәа рҟны аԥхьахәқәа аанызкылаз аспортсменцәеи урҭ разыҟаҵаҩцәеи ашәахьа, ԥхынҷкәын 26 рзы Аԥсны Аҳәынҭқарра Ахада Рауль Ҳаџьымба дырԥылеит.

"Аԥсны еснагь хылаԥшра арҭон аспорт. Асовет аамҭақәа рзы аԥсуа спортсменцәа рыхьӡқәа еицырдыруа иҟан. Сгәы иаанагоит иахьагьы иргәалашәоит ҳәа Виктор Санеев, Владимир Маршьан, Рашь Хәытаба, Витали Дараселиа, Харлам Симониа уҳәа ирацәаҩны рыхьӡқәа. Урҭ рҟынтәи ирацәаҩуп иахьазы азыҟаҵаратә усурақәа мҩаԥызго", — иҳәеит Ҳаџьымба.

Иара убасгьы иазгәеиҭеит аспортсменцәа еиҳа-еиҳа рхыԥхьаӡара ишазҳауа.

"Иазгәоумҭарц залшом ҳаспортсменцәа реизҳара. Адунеи аҟны еицырдыруа иҟалеит: Денис Царгәыш, Ален Аҩӡба, Ахра Кәыҵниа, Амина Аншԥҳа, Саид Смыр уҳәа ирацәаҩны. Даара акраҵанакуеит аспортсменцәа рхаҭақәа аԥсуа бираҟ иаҵагыланы жәларбжьаратәи аиндаҭларақәа рылахәра рҭахны иахьыҟоу", — иҳәеит иара.

Аԥсны аспорти абаҩырҵәыреи рзы аҳәынҭқарратә еилакы ахантәаҩы Баграт Хәытаба иҳәеит аҳәынҭқарра ацхыраарала ишалшо иҵегь еиҳау аҩаӡарақәа рызнеира.

"Ауадаҩрақәа ыҟоуп, аха ҳара иҳалшоит урҭ риааира. Ҳара иҳамоуп алшарақәа ҳбираҟ раԥхьатәиқәа ирылагылартә еиԥш аҟаҵара", — иҳәеит Хәытаба.

Атәыла Ахада аспортсменцәа аҳамҭақәа риҭеит.

15