Гәында Кәыҵниаԥҳа

Гәында Кәыҵниаԥҳа: ҳдиаспора ахьынхо рҭаара, сара сзы даара акраҵанакуеит

54
(ирҿыцуп 13:51 09.01.2017)
Аԥсуа бызшәа арҿиара афонд аиҳабы Гәында Кәыҵниаԥҳа аԥсуаа Ҭырқәтәыла иахьынхоз дырҭаахьеит, уа аԥсуа бызшәа аҭагылазаашьазы лгәаанагара ҳацеиҩылшеит.

Sputnik, Сырма Ашәԥҳа

Сара хаҭала Ҭырқәтәыла сцахьеит, избахьеит ҳашьцәа рынхашьа-рынҵышьа, еиҵаҩҩы иҟоуп, аҿар рацәаҩуп. Ҭырқәтәыла иҟоу аԥсуа қыҭақәа акыр рыӡбахә саҳахьан,аха исымбацызт. Есма-Ҳаным ақыҭа акыр сыхнахит. Алшара сыман уи сцаны избартә еиԥш. Аԥсны ақыҭа даара еиԥшуп, иԥшӡоуп, ақыҭауаа аԥсышәала ицәажәоит. Уи уаҩы деигәырӷьаратәы иҟоуп. 

Абжьаратә абиԥара иаҵанакуа ҳџьынџьуаа ракәзар, рхатәы бызшәала ицәажәоит, аиҵбацәа рахьтә иҟоуп зынӡа иззымдыруа. Аҭырқәа бызшәала аҵара рҵоит, уи ахархәара амоуп аҩны, адәны. Ахатәы бызшәа амдырра иацу апроблема ҳара ҳҿаԥхьагьы иқәгылоуп Аԥсны. Аҳәаанырцә инхо ҳдиаспора рыҩныҵҟа еиҳагьы иӷәӷәоуп, уи уаҩы ибаратәы иҟоуп.

Ҩба-хԥа абиԥара рынахыс абызшәа ыӡыр алшоит, убри аҩыза ашәарҭара иҭагылоуп. Убри аҟынтә, Аԥсны ҳзызхәыцша рацәоуп, иҟаҳҵаша рацәоуп, аҳәаанырцә инхо ҳдиаспора рзы иҷыдоу апрограмма аус ауа иҟалароуп, уахгьы-ҽынгьы ҳамч-ҳалша адаҳҵалароуп. Аԥхьашьеи аҩышьеи дырҵара рапхьатәи ахықәкқәа ируакны иҟазароуп ҳәа сахәаԥшуеит.

Аԥсуа ихатәы бызшәа иманаҵы даԥсыуоуп, дызтәышьҭроу амилаҭ деиуоуп. Ибызшәа анихашҭ, дшаԥсыуоугьы ихашҭуеит. Ахәыҷкәа аҩны рҭаацәа аԥсышәала ирацәажәалар даара ибзиахоит ҳәа сгәы иаанагоит, ашьҭыбжь гәнырымкылар залшом усҟан. Ахәыҷқәа абызшәа адырра маҷк ирыцәхьысҳауп, уи аҩыза ауадаҩра арагьы иҟоуп.

Ҭырқәтәыла аҭырқәа школқәа роуп изылго, убри аҟынтә иахьраҳауа аҭыԥқәа маҷуп. Аҩнаҭаҿы ираҳауа, ирҳәо иалагар, агәыбылрагьы абызшәа ауп иҟазҵо ҳәа сгәы иаанагоит.  Ахатәы бызшәа ауаҩы данхәыҷӡоу инаркны ишьҭикаауазароуп, идыруазароуп.

Убасҟан ауп ҳҳәынҭқаррагьы, ҳаԥсадгьылгьы ҳацхраартә ҳаныҟало, аҭагылазаашьа анҳауа. Ҳбызшәала ҳцәажәозароуп, ҳхәыцуазароуп. Лассы-лаасы Аԥсныҟа иаауа, инхо-инҵуа иалагар ҳашьцәа, уи еиҳау иарбан гәырӷьароу иҟоу?! Рыԥсадгьыл аҿы еснагь ҳарзыԥшуп.

Ахыԥхьаӡара анмаҷу, абызшәагьы ыиаӡаауеит. Ҳара ҳанырацәо, ҳбызшәа анаҳҳәо, ҳкультура ҳаназхәыцуа, ҳанацхраауа, убасҟан ауп Аԥсныи аԥсуааи адунеи аҟны еицырдыруа ианыҟало, иӷәӷәангьы ианыҟало. Ҭырқәтәыла ҳдиаспора ахьынхо рҭаара, сара сзы даара акраҵанакуеит. 

54