Коралиов изкыз афильм Аҟәа идырбан

Коралиов изкыз афильм Аҟәа идырбан

14
Ажьырныҳәа 12 рзы 110 шықәса ҵит асовет ҵарауаҩ, аконструктор Сергеи Коралиов диижьҭеи.

АҞӘА, ажьырныҳәа 13 — Sputnik, Амра Амҷԥҳа. Адокументалтә фильм "Земному притяжению вопреки" азкуп аҵарауаҩ ду Сергеи Коралиов 110-шықәса ихыҵра. Иара дырбан Аҟәа, Россотрудничество ацхыраарала.

"Ажьырныҳәа 12 рзы 110 шықәса ҵит асовет ҵарауаҩ, аконструктор Сергеи Коралиов диижьҭеи. Абри амш ианшьаланы ҳара имҩаԥаагоит иахьатәи ауснагӡатә. Адокументалтә фильм аинтерес ду аҵаны иҟоуп, аиҳаракгьы аҿар рзы. Ҳара лассы-лассы имҩаԥаагоит асеиԥш иҟоу ауснагӡатәқәа", — иҳәеит Россотрудничесво аусзуҩ Дмитри Кононов.

Кононов иазгәеиҭеит Россотрудничество афильмотекаҿ 160 рҟынӡа фильм шыҟоу.

"Афильмқәа аԥҵоуп Урыстәылатәи Афедерациа акультура аминистрра анапхгарала. Иара убасгьы ирацәоуп Афедералтә агентра Россотрудничество анапхгарала иҭыху", ҳәа дцәажәоит Кононов.

Россотрудничество акиноклуб аҟны афильм иахәаԥшыр рылшоит изҭаху зегьы. Ара иҟоуп Иури Никулин ифильм "Бриллиантовая рука" еиԥшу афильмқәа.

"Ажьырныҳәа 26 рзы Аҟәа араион аҵара аҟәшаҟны ҳара имҩаԥаагараны ҳаҟоуп аҵаҩцәеи арҵаҩцәеи рзы асеминарқәа, ҳалацәажәоит аелектронтә библиотека аус шадулатәу. ԥхьаҟа егьырҭ араионқәа рҟнгьы ҳусура иацаҳҵоит", — иҳәеит Дмитри Кононов.

Сергеи Королев иԥсҭазаара далҵит 1966 шықәса ажьырныҳәа 14 рзы, Москва.

14