"Битломаниа" аԥсыуала

© AFP 2023 / CENTRAL PRESSThe Beatles
The Beatles - Sputnik Аҧсны
Анапаҵаҩра
Ажьырныҳәа 16 рзы амеломанцәа иазгәарҭеит "Битлз" адунеизегьтәи Амш. Абри амш аҽны, 1957 шықәса рзы Ливерпуль иаадыртыз аклуб Cavern аҟны раԥхьаӡа акәны иқәгылеит агәыԥ.

Sputnik, Анжелика Бениаԥҳа.

Ажьырныҳәа 16, 1957 шықәса рзы Ливерпуль иаадыртыз аклуб "The Cavern" аҟны раԥхьаӡа акәны иқәгылеит Джон Леннон, Пол Маккартни, Джордж Харрисон злахәыз агәыԥ "Битлз". Аамҭақәак рышьҭахь урҭ дрыцлеит Ринго Старр.

Амеломан, асахьаҭыхыҩ Гарри Дочиа иҳаиҳәеит "Битлз" ашәақәа "Yesterday", "Yellow Submarine", "Let It Be" уҳәа егьырҭгьы иара уажәгьы бзиа ибаны дшырзыӡырҩуа.

"Битлз" – ҳара ҳқәыԥшроуп, иклассикоуп. 60-тәи ашықәсқәа раан уи аӡәгьы мап ацәикӡомызт. Агәыԥ зегь раасҭа аԥыжәара арҭон. Иахьа иарбанызаалак амузыка азыӡырыҩра азини алшареи анумоу оумашәа иубаргьы агьама аӡра мариахеит. Аҿар ирҳәоит "Битлз" – иацтәи амш ауп ҳәа, аха ус уҳәарц азы урҭ рашәақәа уаҳахьазароуп" — иҳәеит Дочиа.

"Битлз" — иахьагьы зегь раасҭа иеиӷьу гәыԥуп, рашәақәагьы аҽакы иазыԥсахуам ҳәа иԥхьаӡоит агәыԥ афанат Шамиль Бигәаа.

"Виктор Цои иинтервиуқәа руак аҟны иҳәоит "Битлз" ыҟамзар ссахьаҭыхыҩхон ҳәа. Ирацәаҩуп дара анырра зырҭаз. Сара исгәаԥхоит рмузыка, рашәақәа ртекстқәа. Раԥхьаӡа акәны жәашықәса раԥхьа исаҳаит урҭ рашәақәа. Исаҳаит – бзиагьы избеит. Ҳәарада "Битлз" иазыӡырыҩуа аиҳабыратә абиԥарақәа роуп аха иҟоуп аҿаргьы, "Yesterday", "Hey Jude", "Come Together" уҳәа ахитқәа зегьы ирылызкаауа" — иҳәеит Бигәаа.

"Битлз" ашьҭахь еиҿыркааз арок-гәыԥқәа рмузыкаҟнгьы иуԥылоит ҳәарада дара рмотивқәа. Арок-музыка бзиа иубозар, хымԥада уара убитломануп ҳәа ишьоит агәыԥ "Azamat Music Band" амузыкант Мате Цквитариа.

"Битлз" амузыка наунагӡатәиуп. Иара алахәылацәагьа аамҭеи аҭыԥи рҳәаақәа ирхысуа музыкантцәоуп" — иҳәеит иара.

Агәыԥ "The Beatles" Cavern аҟны ақәгылара мҩаԥысит жәабран 9 1961 шықәса рзы. Абри ауха акоманда аилазаара абасеиԥш иҟан: Леннон — Харрисон — Маккартни, иара убас амузыкантцәа Стиуарт Сатклифф, Пит Бест. Иаарласны агәыԥ The Beatles Cavern имҩаԥысуаз ақәгыларақәа зегьы ирылахәхеит. Абҵара 9 1961 шықәса рзы аклуб даҭааит абизнесуаҩ Браиан Епстаин (Brian Epstein). "The Beatles" ақәгылара аниба ашьҭахь ирыдигалеит рмениџьерс дҟаларц. 1962 шықәса, рашәарамзазы иара аилахәыра Parlophone Records драцәажәеит агәыԥ абжьаҭаҩразы. Иахьатәи аамҭазы "The Beatles" ажурнал "Rolling Stone аверсиала иреиӷьӡоу анагӡаҩцәа рыбжьара актәи аҭыԥ ааннакылоит. Ажьырныҳәа 16 рзы дара рыхьӡала имҩаԥыргоит еиуеиԥшым ауснагӡатәқәа, аконцертқәа.

Ажәабжьқәа зегьы
0