Аспектакль Ажьақәеи арқьымаҭқәеи апремиера аҿартә театр аҟны имҩаԥысран иҟоуп

Аспектакль "Ажьақәеи арқьымаҭқәеи" апремиера аҿартә театр аҟны имҩаԥысран иҟоуп

11
Аҳәынҭқарратә аҿартә театр ахәаҧшцәа ирыднагало ақәыргыламҭақәа реилкааразы Sputnik акорреспондент Рада Ажьиԥҳа уи анапхгаҩы Аслан Еныкь диҿцәажәеит.

АҞӘА, хәажәкыра 7 – Sputnik, Рада Ажьиԥҳа. Фазиль Искандер иҩымҭа "Ажьақәеи арқьымаҭқәеи" иалху аспектакль апремиера мҩаԥысраны иҟоуп хәажәкырамза 9-10 рзы. Абри атәы иҳәеит Аҳәынҭқарратә аҿартә театр аиҳабы Аслан Еныкь, Sputnik Аԥсны апресс-центр аҟны имҩаԥгаз аконференциаҟны.

"Ҩымз ҵуеит ари аспектакль ақәыргыларазы аҽазыҟаҵарақәа ҳаҿуижьҭеи. Амасштаб ала иҭбаау спектакльхоит. Ари аҩымҭа залаҳхыз уи ауп, иаҳәо атема актуалра амоуп, иахьатәи, иацтәи аамҭақәа ирыцнаҟәоит. Еиҳараҩык рҿахәы, рыгәҭакы аҳәоит ари аҩымҭа", — ҳәа иҳәеит Аслан Еныкь.

Аҿартә театр аиҳабы иажәақәа рыла, атеатр ҩышықәса шахыҵуагьы, уи аамҭа иалагӡаны иқәдыргылахьоу аспектакльқәа: "Анаурқәа", "Амцҳәаҩ даҭахуп", "Ҳаԥсыуаап ҳаԥсыуаа", "Ахәмарцәа ааиуеит", зегьы қәҿиарала имҩаԥысит. 

Фазиль Искандер иповест "Ажьақәеи арқьымаҭқәеи" ақәыргыларазы апиеса алылхит Аԥсны Жәлар рартистка Софа Агәмааԥҳа. Артистка лажәақәа рыла, Фазиль Искандер ифилософиа акырӡа илзааигәоуп.

"Хаҭала ари аҩымҭа бзиа исзырбаз ҳәоук сгәы иҭымҵәо ыҟоуп. "Аҟәышра аҳалалра зхымҿиаауа, еиҵнахоит ацәгьара амҩа", абри аҳәоу сгәы иҭоуп еснагь. Аҟәышра ацәгьара ирхылҿиауаа аамҭа иаҳнарбеит. Абри ахшыҩзцара Искандер иҟнытәи ауп ишсаҳаз, сархәыцит, саргәаҭеит. Еиҭазгазгьы сара соуп. "Ажьақәеи арқьымаҭқәеи" рыла иааирԥшыр иҭахуп аҟәышреи, агызмалреи, агыгшәыгреи, арҭ атемақәа актуалра амоуп иахьатәи ҳаԥсҭазаараҿы", —  лҳәеит Софа Агәмааԥҳа.

Аповест ипиесаны аҟаҵара акыр садхалеит лҳәеит артистка. Хықәкыс иҳамоу ахәаԥшцәа рархәыцра ауп, иџьаршьогьы ҟалоит хымԥада, лҳәеит лара.

"Ажьақәеи арқьыматқәеи ахы инаркны аҵыхәанӡа ҳреиԥшны иҟаҳҵоит аспектакль ҳәа хықәкыс иҳамаӡам. Детальқәак ааҳарԥшуеит акәымзар, еиҳарак иааҳарԥшуа ауаа-рхаҿсахьақәа роуп", — ҳәа азгәалҭеит атеатр асахьаркыратә напхгаҩы.

Софа Агәмааԥҳа инаҵшьны иазгәалҭеит ари аҩымҭа иалхны аспектакль акыр шықәса раԥхьа астудентцәа ишықәдыргылахьаз.

"Ари аҩымҭа дипломтә усумҭаны астудентцәарҟны иқәҳаргылахьан, аха усҟан иҟаҳҵаз иаҳҳәаз ҳзымхеит. Убри аҟынтә ҳаиҭазыхынҳәит ари аҩымҭа. Хгәы хыҭхыҭуа ҳазыԥшуп апремиера", — лҳәеит арежиссер.

Аспектакль адекорациақәа еиқәиршәеит асахьаҭыхыҩ Витали Қацәба.

"Адекорациақәа рырхиараан излауаз ала дҳацхрааит асахьаҭыхыҩ Витали Қацәба. Ицәажәо адекорациақәа ҟаҳҵеит, иаҳҳәарц иаҳҭаху аанарԥшып ҳәа ҳгәы иаанагоит", — иҳәеит Еныкь.

Фазиль Искандер иҩымҭа "Ажьақәеи арқьымаҭқәеи" иалху аспектакль апремиера мҩаԥысран иҟоуп хәажәкырамза 9-10 рзы аԥсуа драматә театр асценаҟны.

Аҿартә театр аԥҵан 2014 шықәса нанҳәа 20 рзы. Аилазаара шьақәгылоуп ААУ афилологиатә факультет "актиортә ҟазара" аҟәша аушьҭымҭацәа рыла.

11