Аԥсны Ахада Рауль Ҳаџьымба ибжьы иҭиит

Аԥсны Ахада Рауль Ҳаџьымба ибжьы иҭиит

5
(ирҿыцуп 14:06 12.03.2017)
Аԥсны имҩаԥысуа апарламенттә алхрақәа ирылахәуп 137-ҩык акандидатцәа. Урҭ рҟынтәи 25-ҩык аполитикатә партиақәа рҟынтәи иқәгылоуп.

АҞӘА, хәажәкыра 12 — Sputnik, Бадраҟ Аҩӡба. Аԥсны Ахада Рауль Ҳаџьымба ибжьы иҭиит Аҟәатәи алхратә округ аҩбатәи алхратә ҭыԥ аҟны.

"Сгәыӷуеит зегьы маншәаланы имҩаԥысып ҳәа. Жәлар Реизарахь инеироуп адырра змоу ауаа", — иҳәеит Аԥсны Ахада ибжьы аниҭи ашьҭахь.

Апарламент амчрақәа еиҳа ирҭбаатәума ҳәа ирҭаз азҵаара ашьҭахь, иара иҳәеит ари азҵаара аганахь ала игәаанагара аҽшеиҭанамкыц.

"Сара иазысыԥхьаӡоит ареформақәа ирыцҵатәуп ҳәа. Иахәҭоуп амчрақәа реихшара, аха иара убри аан апрезиденттә мчра аформа шыҟац напхгаратә форманы иаанхароуп", — иҳәеит иара.

"Шәыбжьы ззышәҭиида?" ҳәа азҵаара аҭакс "Аԥсны ԥхьаҟатәи аԥеиԥш азы", — иҳәеит Ҳаџьымба.

Аԥсны Жәлар Реизарахь алхрақәа мҩаԥысуеит хәажәкыра 12 рзы 35 алхратә ҭыԥқәа рҿы. Дииааит ҳәа дыԥхьаӡоуп 50% + 1 бжьы зауз акандидат. Ариаҟара бжьы иқәгылаз акандидатцәа рҟынтәи аӡәгьы имоузар, аҩбатәи атур мҩаԥгахоит. Алхрақәа шьақәгылеит ҳәа иазыԥхьаӡоуп абжьыҭиҩцәа рааира 25% артәазар.

5
Атемақәа:
Аԥсны Жәлар Реизарахь алхрақәа (54)