Sputnik, Рада Ажьиԥҳа
Аҟәатәи абжьаратә школ №6 ашҭаҟны еизеит XVI аспартакиада алахәылацәа. Раԥхьаӡа акәны сынтәа, ашколхәыҷқәа рықалақьтә спартакиада апрограмма иаларҵеит амилаҭтә хәмаррақәа: аҵәы аршәра, аҭыԥ аҟынтә ҵәҩанҵәы аԥара, ахаҳәырԥа, алабоу ахалара. Амилаҭ спорттә хәмаррақәа иҷыдоу амчра, аласра, аццакра рҭахуп.
Аҳҭнықалақь ашкол №2 абаҩрҵәыра арҵаҩы Ирина Хлыбова аспартакиада алахәылацәа ирзеиҭалҳәоит аԥҟаррақәа.
"Апрограмма иалаагалеит амилаҭтә хәмаррақәа. Асеиԥш ҟаҳҵеит ахәыҷқәа рмилаҭтә хәмаррақәа рхамшҭырц", — лҳәеит Ирина Хлыбова.
Аспортсменцәа ражәақәа рыла зегь раасҭа ирлахҿыхганы ирбаз аҭыԥ аҟынтәи ҵәҩанҵәы аԥароуп, акыр иргәаԥхеит алабоу ахалара, иуадаҩны иршьеит аҵәыршәра.
Алабоу ахалара уадаҩуп. Избанзар ашьапқәа уцырхыраара ҟалом, напыламацароуп ушхалаша.
Аҟәа ақалақь Ахадара аҵара Аусбарҭа аиҳабы Лиудмила Адлеиаԥҳа лажәақәа рыла аспартакиада апрограмма амилаҭтә хәмаррақәа реиԥш иалоуп итрадициатәу ахәмаррақәагьы: амҵәышәмпыл, ашьапылампыл, анапылампыл, ашахмат.
"Ашколхәыҷқәа реиндаҭлара мҩаԥысуеит ашықәс аҩныҵҟа. Зҽалызкаауа ахәыҷқәа аспорттә секциақәа рахь рхы ҳархоит, ареспубликатә спартакиада иазыҟаҳҵоит", — лҳәеит лара.
Иреиӷьыз алҵшәақәа аадырԥшит ашкол №10 (актәи аҭыԥ), ашкол № 13 (аҩбатәи аҭыԥ), ашкол № 12 (ахԥатәи аҭыԥ) ркомандақәа.
