Архивтә фото

Хәытаба: Аԥсны ақыҭақәа рҟны аспорт аҿиара апрограмма аус адулоуп

14
Жәларбжьаратәи аспорт амш аҽны Аԥсны абаҩырҵәыреи аспорти рзы аҳәынҭқарратә еилакы ахантәаҩы ареспубликаҿ аспорт аҿиара атәы даҳзалацәажәеит.

АҞӘА, мшаԥымза 6 – Sputnik, Бадраҟ Аҩӡба. Жәларбжьаратәи аспорт амш аҽны Аԥсны абаҩырҵәыреи аспорти рзы аҳәынҭқарратә еилакы ахантәаҩы Баграт Хәытаба ареспубликаҿ аспорт аҿиара атәы даҳзалацәажәеит. Иара иажәақәа рыла аилак аҟны иазырхиоуп ареспублика ақыҭақәа рҟны абаҩырҵәыреи аспорти рыҿиара иазырхоу апрограмма.

"Абиԥарақәа ргәабзиара", ҳәа хьӡыс измоу апрограмма 10-мш рыҩныҵҟа ихацыркхоит. Апрограмма ибзиоуп ҳәа ахырҳәааит атәыла Ахадеи Аԥыза-министри", — иҳәеит иара.

Апрограмма инақәыршәаны Аԥсны ашколқәа спорттә инвентарла еиқәыршәахоит.

"Аԥсны иҟоуп 116 школ. Урҭ зегьы инвентарла еиқәыршәахоит ашықәс нҵәаанӡа. Абри аус аҟны иҳацхраауеит Аԥсны Аҵареи аҭҵаарадырреи рминистрра", — иҳәеит Хәытаба.

Апрограмма аԥара азоунажьуеит Абаҩырҵәыреи аспорти рзы аҳәынҭқарратә еилакы.

Адунеи зегьы аҟны аспорт аҭагылазаашьа далацәажәо Хәытаба иҳәеит, иахьатәи аамҭазы аспорти аполитикеи шеидырҳәало.

"Қырҭтәыла иҟанаҵо аҽазышәарақәа ирхырҟьаны аԥсуа спортсменцәа изныкымкәа рымҩақәа адыркхьеит. Иара убри аан ООН адунеи зегьы аҟны аҭынчреи аспорт аҿиареи рзы иқәгылоит. Аспорт амацара адагьы ахәыҷқәагьы аполитика иалархалоит. Ҳәарада, аспорт шыспорту иаанхар зегьы рзы еиӷьхон, иаргьы аҿиара еиҳа иӷьацон", — иҳәеит Хәытаба.

Ареспубликаҿ аспорт аҭагылазаашьа далацәажәо Хәытаба иҳәеит аҵыхәтәантәи ашықәс азы аспорт еиҳа-еиҳа аҿиара аиуа ишалагаз.

Хаҭала дазааҭгылеит Аԥснытәи акоманда атәыла абираҟ иаҵагыланы карате кекусинкаи азы Азиа иаарту Ачемпионат актәи атурнир аҟны иқәгылараны ишыҟоу.

"Атурнир аатраны иҟоуп мшаԥымза 21 рзы, Ҟазахсҭан. Акоманда аилазаара шьақәыргылоуп", — иҳәеит иара, иагьазгәеиҭеит Қырҭтәыла акыр ҽышәарақәа шымҩаԥнагаз абри ачемпионат аҟны Аԥсны абираҟ иаҵагыланы акоманда ықәыдмыргыларц.

"Ҟазахсҭан иҟоу Қырҭтәыла аконсулра даара аҽышәарақәа мҩаԥнагеит абри аганахь ала, аха адкылара мҩаԥызгоз аган уи аҭакс иаҳәеит, ақырҭуа ган иҟанаҵо адҵа иарбанызаалак зинҵаҵӷәы шамам", – иҳәеит Хәытаба. Атурнир иалахәхоит 15-16 шықәса зхыҵуа аҿар. Иара убасгьы Ҟазахсҭан иалацәажәараны иҟоуп 2018 шықәса рзы карате кекусинкаи азы Азиа иаарту аҩбатәи ачемпионат Аԥсны амҩаԥгара азҵаара.

Нанҳәа 23 2013 шықәса рзы ООН Ассамблеиа Хада ишьақәнаргылеит мшаԥымза 6 Жәларбжьаратәи аспорт амш (International Day of Sport for Development and Peace) ҳәа.

14