Баграта Шьынқәба ибарельеф дахьынхоз аҩнаҿы икыдырҵеит

Баграта Шьынқәба ибарелиеф дахьынхоз аҩнаҿы икыдырҵеит

14
(ирҿыцуп 15:45 12.05.2017)
Д.И.Гәлиа ихьӡ зху аҳәынҭқарратә премиа занашьоу Ҟабарда-Балкариеи Адыга тәылеи жәлар рышәҟәыҩҩы, “Ахьӡ-Аҧша” аорден актәи аҩаӡара акавалер, Аҧснытәи Аҭҵаарадырратә Академиа академик Баграт Уасил-иҧа Шьынқәба диижьҭеи 100 шықәса аҵра инамаданы Аԥсны имҩаԥысуеит еиуеиԥшым ауснагӡатәқәа.

АҞӘА, лаҵарамза 12 – Sputnik, Бадри Есиава. Баграт Шьынқәба ибарелиеф кыдырҵеит апоет дахьынхоз аҩны аҭӡаҟны. Абри аҩнаҟны Баграт Шьынқәба дынхон 1968 – 2004шш. рзы (Кәыдрытәи амҩаду № 13).

"Баграт Шьынқәба ибаҟа гылоуп ақалақь Аҟәа агәҭа, Ҷлоутәи абжьаратә школ ихьӡ ахуп, ааигәа апоет дахьиз-дахьааӡаз аҩны аҳәынҭқарратә ҩны-музеи астатус арҭеит", ҳәа еиҭалҳәоит Аҟәа ақалақь Ахадара аҵара Аусбарҭа аиҳабы Лиудмила Адлеиаԥҳа.

Памятная доска Баграту Шинкуба
© Sputnik / Томас Тхайцук
Памятная доска Баграту Шинкуба

Абарелиеф (аскульптор Цира Ахԥҳа) аадыртит апоет имаҭа Ҭамара Шьынқәырԥҳаи Беслан Шьынқәбеи.

Аԥсу Иашахаҵаратә уахәама аиҳабы Аб Виссарион игәалаиршәоит ашәҟәыҩҩи иареи реиԥыларак.

"Сара Лыхнытәи ауахәамаҿ амаҵура саналагаз ауп. Баграт Шьынқәба уи аниаҳа иара иахь саарц сзынеицҳаит. Аҟәаҟа сааит саргьы. Ҳаибадырит. Сызлагаз аус касмыжьырц сабжьигеит", ҳәа игәалаиршәоит иара.

Аԥсны Ашәҟәыҩҩцәа Реидгыла ахантәаҩы Вахтанг Аԥҳазоу иҳәоит абарелиеф аартра ареспублика акультуратә ԥсҭазаараҿы акыр шаҵанакуа.

Атәыла Ахада иабжьгаҩ, апоет, апублицист Владимир Занҭариа иҳәеит Баграт "аԥсуа Пушкин" ҳәа ишишьҭоу.

"Баграт иаҳзынижьыз арҿиаратә беиара иаҳнаҭоит азин "Баграт Шьынқәба иепоха" ҳәа ҳҳәартә еиԥш. Иара инапы иҵигоз зегьы шедеврхон", — иҳәоит Занҭариа.

Баграт Шьынқәба 100-шықәса ихыҵра иазку аныҳәатә уснагӡатәқәа рхы рыладырхәырц Аԥсныҟа иааиит Нхыҵ Кавказынтәи асасцәа. Афилологиатә наукақәа рдоктор Мадина Хакуашева илҳәеит "Ацынҵәарах" данаԥхьа инаркны Баграт Шьынқәба зегьы ирылылкаауаз шәҟәыҩҩны дшыҟалаз.

Апоетесса Лариса Шебзухова иазгәалҭеит Баграт Шьынқәба иҟазара ашьхақәцәақәа ирхыҳәҳәо ишыҟоу.

Шьынқәыраа рыжәла ахаҭарнак ҳәа дықәгылан дцәажәеит Аполлон Шьынқәба. Иара иҭабуп ҳәа реиҳәеит ауснагӡатә аиҿкаара зыбзоуроуи иалахәызи.

Апоет иԥа, Бенуар Шьынқәба иакәзар зегь анаԥхьара риҭеит Ҷлоуҟа, Баграт Шьынқәба 100-шықәса ихыҵра аныҳәахь.

14
Атемақәа:
Баграт Шьынқәба диижьҭеи 100 шықәса ҵит (14)