Давид Магариани Амир Джагаеви

Ршьапы иқәыргылатәуп: Давиди Амири зыхә ҳараку аоперациа рзутәуп

9
ДЦП змоу Аԥснытәи ахәыҷқәа ҩыџьа рзы 370 000 мааҭ еизгатәуп Ереван аоперациа рзуразы.

АҞӘА, лаҵарамза 19 – Sputnik, Роберт Џьопуа. Давид Магариани Амир Джагаеви аоперациа рзутәуп лҳәеит Афонд "Ашана" аусзуҩы Мактина Џьынџьалԥҳа.

"Давид ҩы-шықәса раԥхьа Москва, амедицинатә технологиақәа ринститут аҟны аҽыхәышәтәра дахысит. Иани аҳақьымцәеи ражәақәа рыла ахәыҷы иҭагылазаашьа еиҳа еиӷьхеит. Еревантәи аҳақьымцәа ракәзар ирҳәеит, ахәыҷы иныҟәараан ицыркьра еиҳа еиҵахарц азы аоперациа иҭахуп ҳәа. ДЦП змоу аҩбатәи ахәыҷы Амир иакәзар, уажәазы зынӡа дызныҟәаӡом, аха Еревантәи аҳақьымцәа ражәақәа рыла аоперациа ашьҭахь раԥхьатәи ишьаҿақәа еихигар алшоит", — лҳәеит Афонд аусзуҩ.

Давид иан Сиузанна Саакиан дгәыӷуеит аоперациа лхәыҷы ихәап ҳәа, иҩызцәа зегь реиԥш дҟалап ҳәа.

"Давид ашкол дҭоуп. Ицәгьамкәа аҵара иҵоит. Лассы-лассы дсазҵаауеит: "Избан зегьы сызреиԥшым" ҳәа", — еиҭалҳәоит ан.

Амир иан Илона Перцхьелиаԥҳагьы гәыӷроуп илымоу. Уи лхәыҷы зынӡагьы дызныҟәаӡом.

"ДЦП имоуп. Дызныҟәаӡом. Аӡынразы Ереванынтәи Аԥсны иҟаз аҳақьымцәа ирҳәеит аоперациа иҭахуп ҳәа. Иара анбанқәа идыруеит, даԥхьоит, асахьа ҭихуеит", ҳәа еиҭалҳәоит Амир иан.

Мактина Џьынџьалԥҳа лажәақәа рыла Давид Магариани Амир Джагаеви рыхәышәтәразы 370 000 мааҭ аҭахуп.

9
Атемақәа:
Ҳаидгыланы аԥсҭазаара еиқәҳархап (32)