АҞӘА, ԥхынгәы 20 – Sputnik, Амра Амҷԥҳа. Жәларбжьаратәи амотофестиваль "Абхазский берег 2017" мҩаԥысраны иҟоуп Аҟәа, Ареспубликатә стадион аҟны ԥхынгәы 28-29 рзы. Иара иалахәхоит 500-ҩык рҟынӡа амотоциклистцәа. Абри атәы ҳкорреспондент илзаалыцҳаит ателеканал "Неформат" акреативтә директор Наталиа Булдакова.
Лара лажәақәа рыла есышықәса афестиваль рҽаладырхәуеит Уралтәи амотоциклистцәа. Лара иазгәалҭеит, афестиваль аиҿкаара хықәкны иамоу амотоциклистцәеи амотоциклқәа бзиа избои реинырра арҭбаара.
Афестиваль аҟны имҩаԥгахоит амотобол азы амотоклубқәа реиндаҭлара, абокс азы аиндаҭлара, аканат аимырххара.
"Имҩаԥгахоит еиуеиԥшым ауснагӡатәқәа – ахәаԥшыҩцәа ргәы змырҿыӷьуа. Ҳара иҳалшон астантраидерцәагьы абри аус радыԥхьалара, аха Ареспубликатә стадион усеиԥш иҟоу иҷыдоу атриукқәа мҩаԥугартә еиԥш еиқәыршәам" — лҳәоит Булдакова.
Уи адагьы афестиваль алахәылацәа рзы иара уа астадион аҟны еиҿкаахоит апалаткатә лагер.
"Зегьы бзиа ирбаӡом асасааирҭақәа рҟны аангылара, ирацәаҩуп апалаткақәа зманы иныҟәо. Урҭ рзоуп алагер зеиҿаҳкаауа. Иара аус аулоит афестиваль мҩаԥысуанаҵы" — лҳәоит афестиваль аиҿкааҩ.
Наталиа Булдакова иазгәалҭеит афестиваль аԥсуа мотоциклистцәагьы шалахәхо.
"Аԥсынгьы иҟоуп амотоцикл абзиабаҩцәа. Иакымкәа иҩбамкәа измоу. 2012 шықәса раахыс дара афестиваль иацеиҿкааҩцәоуп. Ирацәоуп урҭ рылшарала аҭыԥ аҿы иҳаӡбо азҵаарақәа" — лҳәоит Булдакова.
Афестиваль асасцәа рҿаԥхьа иқәгылараны иҟоуп Урыстәылатәи асцена ашәаҳәаҩцәа Артур Беркути Валери Скородеди, иара убасгьы Кавказ еиуеиԥшым арегионқәа рҟынтәи амузыкатә коллективқәа.
Жәларбжьаратәи амотофестиваль "Абхазский берег 2017" мҩаԥысраны иҟоуп Аҟәа, Ареспубликатә стадион аҟны ԥхынгәы 28-29 рзы.
Амотофестиваль информациатә партнерны иҟоуп аинформациатә маҵзуреи арадиои Sputnik Аԥсны.
