Sputnik, Анжелика Бениаԥҳа.
Цәыббра 20 Иван Папасқьыр ихьӡ зху Аԥснытәи Амилаҭтә библиотека аиҳабы Борис Шалико-иԥа Ҷолариа 69 шықәса ихыҵит. Борис Ҷолариа ианаамҭаз еиқәирхеит, иахьа еихеиҳауеит Аԥсны акультуратә ихадоу хәышҭаара дуқәа руак, ҳәа азгәеиҭеит Аԥсны Ашәҟәыҩҩцәа Реидгыла ахантәаҩы Вахтанг Аԥҳазоу.
"Аԥсуа ҵарауаа, ашәҟәыҩҩцәа, аинтеллигенциа ҳаҭыр дула изыҟоуп Борис Ҷолариа. Аԥсны Аџьынџьтәылатәи еибашьраан, ашьҭахьгьы, аԥсуа милаҭтә культура ааха ӷәӷәа аиуит. Абиԥарақәа зааӡо, Аԥснытәи амилаҭтә библиотека есымша аҭааҩцәа аман. Аԥсны аҩнуҵҟеи, анҭыҵи ишақәнаго ицәыргандаз, ҳәа дазхәыцеит иара. Ашәҟәы, аԥхьаҩ, аҵара, абиблиотека, ари зегьы еимадоуп, уи ибзианы еиликаауеит Ҷолариа", – иҳәеит Аԥҳазоу.
Аԥҳазоу иазгәеиҭеит, Ҷолариа аибашьра ашьҭахь абиблиотека аҭагылазаашьа, ахыбра, афонд иахьатәи ҳаамҭа иақәнаганы аиҭашьақәыргылара шилшаз атәы. Иара убас, гәаартыла иҳәеит Борис Ҷолариа иеиҿкааратә баҩхатәра дшаҵашьыцуа атәы.
"Абиблиотекатә фондқәа рҟны аус руан ҳҵарауаа, ҳашәҟәыҩҩцәа, ҳжурналистцәа, ҳҿар. Ақырҭуа-аԥсуа еибашьраан абиблиотека ааха ӷәӷәа аҭан. Аибашьра ашьҭахь хәыҷы-хәыҷла абиблиотека аколлектив аиҭашьақәыргылара иалагеит. Иахьазы ауадаҩрақәа шьҭахьҟа иныжьуп, Амилаҭтә библиотека еиқәыршәоуп реиҳа иҿыцу атехнологиақәа рыла", — иациҵеит Аԥҳазоу.
Борис Шаликуа-иԥа диит 1948 шықәсазы, Тамшь ақыҭа Очамчыра араион. Дырмит Гәлиа ихьӡ зху Тамшьтәи абжьаратә школ далганы Аҟәатәи аиндустриалтә техникум дҭалоит. Абҵара 14, 1967 шықәсазы СССР арбџьармчқәа аррамаҵзурахьы днаԥхьан.
Ажьырныҳәа 8, 1970 шықәсазы Ҷолариа Аҟәатәи атипографиа №8 аҟны аусура далагеит. Анаҩс Аҟәатәи аҳәынҭқарратә педагогикатә институт абиолого-географиатә факультет аҟны иҵара иациҵоит.
1975 шықәса инаркны 1979 шықәсанӡа Ҷолариа рҵаҩыс аус иуан Аҟәатәи 10-тәи абжьаратә школ аҟны. Борис Ҷолариа имаҷымкәа аусуратә ҭыԥқәа иԥсаххьан иахьа дызлеицырдыруа аҭыԥ аникылаанӡа.
Ҷолариа Амилаҭтә библиотека дахагылоуп ажьырныҳәа 8, 1995 шықәса инаркны иахьа уажәраанӡа.
