ConIFA-2018 аԥхьагылаҩцәа ҳәа иԥхьаӡо ахҳәаа рзыҟаиҵеит Беслан Аџьынџьал

© Sputnik / Томас ТхайцукБеслан Аджинджал
Беслан Аджинджал - Sputnik Аҧсны
Анапаҵаҩра
Адунеи ачемпионат ConIFA-2018 мҩаԥысраны иҟоуп лаҵарамза 31 2018 шықәса рзы, Лондон.

АҞӘА, ажьырныҳәа 9– Sputnik, Амра Амҷԥҳа. Ашьапылампыл азы адунеи ачемпионат ConIFA-2018 фаворитцәаны иԥхьаӡоуп: Паданиа, Аҩадатәи Кипр, Пенджаб еизгоу ркомандақәа иҳәеит радио Sputnik Аԥсны аинтервиу азҭаз еизго аԥснытәи акоманда азыҟаҵаҩ хада Беслан Аџьынџьал, ConIFA-2018 аҵәҭаԥсара аихшьаалақәа рышьҭахь.

"Пенджаб акоманда ConIFA — 2016 аан ҳкоманда иацыхәмаруан. Акоманда ӷәӷәоуп. Ҳара ҳиааирагьы анцәа имҭаны ауп ишыҟалаз", — иҳәеит иара.

Аҵәҭаԥсара аихшьаалақәа рыла Аԥснытәи акоманда Аҩадатәи Кипри, Тибети, Фельвидеки ркомандақәа ргәыԥ иақәшәоит.

"Агәыԥ даара аҩаӡара ҳаракуп. Дареи ҳареи ҳаицыхәмархьеит азы, рыҩаӡара зеиԥшроу аадыруеит. Акомандақәа акыр еиҿкаауп. Аинтернет аҿы аинформациа ҳаԥшаауеит, рыхәмаршьа аметодқәа ҭаҳҵаауеит", — иҳәеит иара.

Ашьапылампыл азы адунеи ачемпионат ConIFA-2018 аҟны аԥсуа команда алшарақәа дрылацәажәо Беслан Аџьынџьал иҳәеит ахәмарра иаҳнарбап ҳәа.

Азыҟаҵаҩ иажәақәа рыла акоманда ахәмаррақәа макьаназ иаламгацт. Аҳәаанхыҵ ихәмаруа аспортсменцәа рааԥхьара иаламцәажәацт.

"Урҭгьы рхатәы турнирқәа рымоуп. Аха агәрагара сымоуп дарбанзаалак аԥсуа изы итәыла абираҟ даҵагыланы ақәгылара насыԥны ишизыҟоу. Алшара ҟалар, еизгоу ҳкоманда ишалахәхо агәра згоит", — иҳәеит азыҟаҵаҩ.

ConIFA аверсиала адунеи ачемпионат хацыркхоит Лондон, лаҵарамза 31 2018 шықәса рзы.

Актәи агәыԥ иалоуп акомандақәа: Барава, Каскадиа, Елан Ванин, Тамил Еелам. Аҩбатәи агәыԥ —Аԥсны, Аҩадатәи Кипр, Тибет, Фельвидека (Словакиа инхо авенгрцәа). Ахԥатәи агәыԥ – Паданиа, Кирибати, Матабелеленд, Сикеитәи атәылаҿацә. Аԥшьбатәи агәыԥ иалоуп: Пенджаб, Мраҭашәаратәи Ермантәыла, Кабилиа, Иапониа инхо акорееццәа.

ConIFA еиднакылоит 30 рҟынӡа команда.

Ажәабжьқәа зегьы
0