АҞӘА, рашәара 26, – Sputnik, Асҭанда Арӡынԥҳа. Аԥсны азыхиоуп адәыӷбақәа рыдкылара ҳәа Sputnik акорреспондент илеиҳәеит «Аԥсныеихамҩа» адиректор хада ихаҭыԥуаҩ Игор Марганиа.
"Ҳара уажәы ргәаҭара ҳаҿуп амҩақәа рҭагылазаашьа. Заа исҳәар сылшоит амшцәгьа амҩақәа аԥхасҭа рнамҭеит ҳәа. Гагра араион аҟны ҵлак каҳаит, уи уажәы акоммуналтә усзуҩцәа ақәгара иаҿуп", — азгәеиҭеит Марганиа.
Иара иажәақәа рыла актәи адәыӷба аамҭазы амҩаҟны иҟоу аԥырхагақәа зегьы аԥыххоит.
"Адәыӷба Москва-Аҟәа иарбоу аамҭала амҩа иқәуп, уажәы Цандрыԥшь иааихьеит. Амҩаҿ иҟоу аԥырхагақәа раԥыхра ҳахьӡоит. Аелектричка акәзар, аамҭала иагхоит, аха уи Адлер иаанкылахеит. Уаҟа авокзали адепои аӡы ихгылан. Убри инадҳәаланы иацы реис заҵәык акәын иҟаз – ашьыжьтәи", — иҳәеит Марганиа.
Аԥшьаша, Шәача ақалақь аҟны ақәаршҩы ӷәӷәа леит, ақалақь амҩақәа ӡыла иҭәит, ақалақьуаагьы ӡыдеи фымцалашарадеи инхеит. Реиҳа аԥхасҭа ҟалеит Адлер араион аҟны. Адыррақәа ыҟан ақалақь еиуеиԥшым аҭыԥқәа рҟны 400 инареиҳаны ҩны аӡы рыҵан ҳәа, 20 ҭаацәара рҭыԥ иахыган. Иара убасгьы иаанкылан 29 дәыӷбеи 32 ҳаиртә реиси.
