АҞӘА, абҵара 14 — Sputnik. Атлетика ласы азы Урыстәыла акоманда аиндаҭларақәа ирылыргеит атлетика ласы азы афедерациақәа Жәларбжьаратәи рассоциациа (IAAF) адопинг иаҿагылоу аԥҟаррақәа реилагаразы.
Абҵара 9 рзы Женева имҩаԥысит WADA апресс-конференциа. Уаҟа, ихьыԥшым акомиссиа Урыстәыла адопинг аҿагылара аԥҟаррақәа еиланагоит убри инадҳәаланы урыстәылатәи аспортсменцәа Аолимпиада-2016 иалгатәуп ҳәа IAAF абжьагара арҭеит.
Убри инадҳәаланы IAAF аилак аилатәараан амшхәаԥштә иазҵаара хаданы иқәгылан Урыстәыла атлетика ласы Афедерациа алахәылара аамҭала аанкылареи урыстәылатәи аспортсменцәа аиндаҭлара ралгареи. Ахеилак ателеконференциа аҟазшьала еиҿкаан. Уаанӡа IAAF апресс-реализ аҟны аҳәамҭа ҟанаҵахьан Урыстәыла атлетика ласы Афедерациа амаӡаныҟәгаҩ хада Михаил Бутов аилацәажәара далахәхом ибжьгьы азинтә шьаҭа амам ҳәа.
Урыстәыла атлетика ласы Афедерациа апрезидент инапынҵақәа назыгӡо Вадим Зеличенок адырра ҟаиҵеит Афедерациа аҳәаанхыҵынтәи хыԥхьаӡара рацәала ашәҟәқәа шаиуз азы.
"Иаартны исҳәоит, аҵыхәтәантәи аамҭақәа рзы ҳзацәажәо зегьы иҟоу иашам ҳәа ишазырыԥхьаӡо. Ирацәаны ашәҟәқәа ҳауит аҳәаанырцәтәи ҳколлегацәа рҟынтәи. Сара иацы Естониа сыҟан. Рацәак иаҳҩызаны иҟам абри атәылаҟынгьы IAAF ҳфедерациа алгараз иҟаҵоу аӡбра иашам ҳәа иазырыԥхьаӡоит", — иҳәеит Зеличенок.
Урыстәыла атлетика ласы Афедерациа апрезидиум амҽыша, изаамҭанытәимыз аилатәараҟны иаднакылеит акризисҿагыла план IAAF Афедерациа алгараз иҟаҵоу аӡбра инадҳәаланы.
Аилатәара алкаақәа инарықәыршәаны ирыдыркылеит акризисҿагыла план. Иара азырхоуп иаарласны Афедерациа IAAF алахәылара аиҭашьақәыргылара алыршахарц.
"Ҳара ҳалацәажәеит IAAF аӡбра. Иҳадаҳкылеит акризисҿагыла план, ҳалацәажәеит 2-3 мзы рышьҭахь ҳлахәылара аиҭашьақәыргылара шалыршахаша. Ҳара иаҳхықәкы хаданы иҟоу Рио-де-Жанеиро имҩаԥысраны иҟоу ауснагӡатәқәа ҳаспортсменцәа ралахәра аиқәыршәароуп", — иҳәеит Зеличенок ажурналистцәа аниҿцәажәоз.
Урыстәылатәи Афедерациа аспорт аминистр Витали Мутко иажәақәа рыла иалшоит урыстәылатәи аспортсменцәа Урыстәыла Аолимпиатә еилакы абираҟ иаҵагыланы иқәгылар, IAAF алахәылара шьақәыргылахаанӡа.
"Сгәыӷуеит IAAF иҟаҳҵаз аҳәара иазхьаԥшып ҳәа абри ахымзк рыла, ҳлахәылара еиҭашьақәыргылахаанӡа, азин ҟарҵап ҳәа урыстәылатәи аспортсменцәа Урыстәыла Аолимпиатә еилакы абираҟ иаҵагыланы иқәгыларц азы", — иҳәеит Мутко.
Аҳәынҭқарратә Думаҟны Акоррупциа аҿагыларази ашәарҭадарази аилак алахәыла, 2004 шықәсазтәи Аолимпиатә хәмаррақәа рпризиор, адзиудоист Дмитрии Носов иазгәеиҭеит Урстәылатәи Афедерациа ашьаусҭҵааратә еилак аҟны аиҿцәажәарақәа мҩаԥигарц гәҭакны ишимоу адопингтә ҭыӡшәа аганахьала.
