Лиудмила Лазԥҳа еиҭалҳәоит Аԥсны рапҳьатәи ахада имаҭәарқәа рҭоурых

110
(ирҿыцуп 11:10 17.05.2016)
Аԥсны рапҳьатәи ахада Владислав Арӡынба ихьӡ зҳәо, иара изку амаҭәарқәа рҭоурых еиҭалҳәоит амузеи аусуҩ Лиудмила Лазԥҳа.

Аԥсны раԥхьатәи ахада Владислав Арӡынба иҭоурыхи, илаз апатриотизмреи, аибашьреи аибашьцәеи рҭоурыхи неиваргыланы рыхьӡ аҳаракыра акамыршәра азы иаԥҵоуп иара ихьӡ зху "Ахьӡ-аԥша" амузеи, уаҟа ирацәоуп ихьӡ зҳәо иара изку амаҭәарқәеи аматериалқәеи, урҭ рҭоурых еиҭалҳәоит амузеи аусуҩ Лиудмила Лазԥҳа.

"Амузеи аусзуҩцәа еиҳарак иаҳҭахын Владислав Григори-иԥа имаҭәыхәқәа рыла арбеиара иара изку ауада, уи азы акыр ҳҽазаҳшәеит, иагьҳалшеит. Араҟа иҳамоуп: ихьӡ зҳәо имаҭәоума, иҳамҭақәа роума, шәҟәума, иаҳәа аума, ажәакала, иаҳзеидкылаз зегьы. Еидаҳкылазгьы рацәоуп. Владислав Арӡынба изку аматериал аизгараҟны иҭаацәа даара ацхыраара ҟарҵеит, урҭ иахьагьы иҳавагылоуп ", — ҳәа лҳәеит Лиудмила Лазԥҳа.

Владислав Арӡынба изку ауада аҟны, иара убас икнаҳауп аибашьра ашықәсқәа раан ахырӷәӷәарҭақәа рахь данцоз иишәыиҵоз акәылӡы маҭәа, ир маҭәа иаҵыз агәҭаршәыи, абџьарҟаҵаҩ Баҭал Џьопуа ҳамҭас ииҭаз аҳәеи.

"Ҳахыҽхәаратә иҟоуп иара убас, Владислав Арӡынба ахырӷәӷәарҭақәа рахь данцоз иишәиҵоз акәылӡы маҭәеи, асахьаҭыхыҩ абџьарҟаҵаҩ Баҭал Џьопуа ҳамҭас ииҭаз аҳәеи, Владислав Арӡынба инапҩратә ҩымҭақәеи, иусуратә уадаҟны игылаз аҩнымаҭәеи, исааҭкәеи, иҭаҭынажәгеи", — ҳәа лҳәеит амузеи аусуҩ Лиудмила Лазԥҳа.

Амузеи архив аҟны ирацәоуп амаҭәарқәа макьаназ ахәаԥшыҩ иблахь ицәыргам, лҳәеит Лазԥҳа.

Амузеи аҟны иҟоу Владислав Арӡынба хаҭалатәи имаҭәақәа зегьы амузеи иалҭеит раԥхьатәи ахада иԥшәмаԥҳәыс Светлана Џьергениаԥҳа.

110