АҞӘА, мшаԥымза 26—Sputnik, Саид Барганџьиа. Аԥсны акурорти атуризми рзы аминистр Автондил Гарцкиа иаҳзеиҭеиҳәеит 2016-2020шш. рзтәи акурорттә сезонқәа рҽазырхиаразы ауснагӡатәқәа рыплан атәы. Атурист иԥсшьараан иахәҭаны иҟоу ашәарҭадареи аҭагылазаашьеи иҭатәуп, убри инадҳәалан ауп 2016-2020шш. рзтәи акурорттә сезонқәа рҽазырхиаразы ауснагӡатәқәа рыплан аус задуло, иҳәеит Аԥсны акурорти атуризми рзы аминистр Автондил Гарцкиа.
Гарцкиа иажәақәа рыла аус зыдуло аплан аҟны иарбоуп аминистррақәеи аусҳәарҭақәеи ирыдыркылараны иҟоу ауснагӡатәқәа аԥхынтәи асезонқәа маншәаланы рымҩаԥгаразы.
Иара иазгәеиҭеит Аҩныҵҟатәи аусқәа рминистрреи, Аҭагылазаашьа ҷыдақәа рзы аминистрреи, Агәабзиарахьчара аминистрреи, акультура аминистрреи роуп аидара аиҳарак зқәылараны иҟоу.
Иара убасгьы иазгәеиҭеит ареспублика акурортқәа рҟны аплиажқәа иахәҭоу адәыԥшра рыҭатәны ишыҟоу.
2016-2020шш. рзы акурорт сезонқәа рҽазыҟаҵаразы аԥсуа-аурыс ҳәааҟны аиасра ырмариатәуп иара убасгьы еиҿкаатәуп акурорттә усхк аусуҩцәа рҟазара аизырҳара, еиҿкаатәуп ахьчаратә маҵзурақәа ҳәа арбоуп аплан аҟны.
"Аплан аҟны инаҵшьны иарбоуп атурист-курорттә усхк аобиектқәа иҷыдоу азин – алицензиа рыҭатәуп ҳәа", азгәеиҭеит Гарцкиа.
Аплан инақәыршәаны Аҩныҵҟатәи аусқәа рминистрра еиҿнакаароуп ауснагӡатәқәа аекскурсиатә маршрутқәа ахьымҩаԥысуа ашәарҭадара арӷәӷәаразы иҳәеит Гарцкиа.
Иара иажәақәа рыла ахылаԥшра рыҭалатәуп афатә тауарқәа рхаҭабзиара аҩаӡара.
Аминистр иазгәеиҭеит 2015 шықәса рзы Аԥсны ишаҭааз миллионки 400 нызқьҩык атуристцәа.
