ГАГРА, абҵарамза 25 — Sputnik, Саида Жьиԥҳа. Абҵарамза аҵхыбжьон Гагра ақалақь агәҭа игылаз аимадара иатәыз ахыбра азхәҭак еилаҳаит.
Ашьыжь инаркны ари атыԥ аҟны амзыз аҭҵааразы аус руоит Аԥсны акапиталтә ргылара Аусбарҭаҟнытә аспециалистцәа.
Еилаҳаз аимадара ахыбра азхәҭак аҟны, актәии аҩбатәии аихагылақәа рҟны ауадақәа ҭацәын, ахԥатәи аихагылаҟны аус ауан афитнес-клуб. Амашәыр аныҟалоз, ахыбраҟны аӡәгьы дыҟамызт.
"Сара иахьынӡаздыруа, 23 сааҭ рзеиԥш афитнес-клуб аҟны зҽазыҟазҵоз аҵыхәтәантәи аҭааҩцәа цеит. Сааҭки бжаки рышьҭахь ахыбра еилаҳаит. Актәи аихагылаҟны ихжәаз ашьаҟа иахҟьаны, аҩбатәии ахԥатәии аихагылақәа хыбгалеит. Мышқәак рышьҭахь, аҭыԥ аҟны аус зуо аспециалистцәа ишьақәдыргылоит ахыбра азхәҭак аилаҳара зыхҟьаз амзыз", — иҳәеит Гагра араионтә Еизара адепутат Алиас Ажьиба.
Аамҭалатәи агәаанагарала, ахыбра азхәҭак аилаҳара зыхҟьаз, аргылареи аремонттә усурақәеи рымҩаԥгараан аргыларатә ԥҟарақәа еилаган.
"Аҭагылазаашьа схы иархәаны, ахатәы ргылара знапы алаку зегьы ишәабжьазгоит, аремонттә усурақәеи аргыларақәеи раан ашәарҭадаратә ԥҟарақәа шәрықәныҟәаларц", — ҳәа инаҵишьит араионтә Еизара ахантәаҩы Асҭан Агрба.
Ахыбра аилаҳара аԥсыҭбара ахыламҿиааит.
