АҞӘА, лаҵарамза 25 — Sputnik, Амра Амҷԥҳа. Аԥсны Акультура аминистр Ельвира Арсалиаԥҳа зхадараҟны дыҟоу Аԥснытәи аделегациа алахәуп XIX Жәларбжьаратәи афестиваль "Интермузеи-2017". Афестиваль аусура хацнаркит Москва, лаҵарамза 25 рзы. "Интермузеи" ааиртит Урыстәыла Акультура аминистр Владимир Медински. Абри атәы Sputnik ахь ҭелла иаалыцҳаит аминистр Ельвира Арсалиаԥҳа.
Лара лажәақәа рыла Аԥсны Акультура аминистрреи Урыстәыла Акультура аминистрреи рнапы зҵарҩыз апрограмма иалнаршоит апроектқәа реицымҩаԥгара, аҟазауаа реимдара.
"Ари аҭыԥ ԥхьаҟазтәи аусеицуразы иҭыԥ шьахәуп. Аԥснытәи аекспозициа даҭааит Урыстәыла иҟоу Аԥсны Ацҳаражәҳәаҩ Игор Ахба. Арахь иааиуеит аҟазара, анаука, акультура русзуҩцәа", — лҳәеит Арсалиаԥҳа.
Аминистр иазгәалҭеит аекспозициа аҭааҩцәа рзы аинтерес ду шаҵоу.
"Даара аинтерес рымоуп аетнографиа аекспозициа. Ари афорум аҟны Китаи, Сербиа уҳәа рмилаҭтә музеиқәа ҳрывагыланы ҳахьцәырҵуа даара аҵакы аманы иҟоуп", — лҳәеит Ельвира Арсалиаԥҳа.
Аминистр иазгәалҭеит апрограмма аҳәаақәа ирҭагӡаны еиуеиԥшым ауснагӡатәқәа шымҩаԥысуа.
"Уаҵәы имҩаԥысраны иҟоуп Урыстәыла арестовраторцәа рыстол гьежь. Уи далахәхоит Баҭал Кобахьиа", — лҳәеит лара.
XIX Жәларбжьаратәи афестиваль "Интермузеи-2017" мҩаԥысраны иҟоуп лаҵарамза 29 рҟынӡа.
