Мушни Хварцкия

Ԥсабарала, шьала-дала иеибашьҩыз - Мушьни Хәарцкьиа

600
(ирҿыцуп 13:41 15.03.2017)
Аԥсны Афырхаҵа Мушьни Хәарцкьиа ихьӡ иадхәалоуп раԥхьатәи афронт, раԥхьатәи ахрыӷәӷәарҭа, раԥхьатәи абаталионқәа реиҿкаара. Иара ԥсабарала деибашьҩы дуун. Аибашьра ианалагаз атактикеи астратегиеи еибашьра дук иаиааихьоу камандирк иеиԥш ахырхарҭа аиҭон. Абарҭқәа ртәы иалацәажәоит дздыруаз Sputnik аналитик Нонна Ҭхәаӡԥҳа.

Мушьни Хәарцкьиа аибашьра астратегиеи атактикеи бзиаӡаны идыруан. Аԥсны Ахақәиҭратә еибашьра иалаӡит агәаӷь зызҭаз, згәы цҳауаз усҟантәи абиԥра ҿа реиҳараҩык. Иҭахаз ҭахеит, аха иаанхаз рахьынтәи аибашьра ашьҭахь рхы зқәыркра рзымдыруа инхазгьы рацәаҩуп.

Аԥсабара ишаԥу ала урҭ рыԥсадгьыл ахьчара, ахақәиҭра ашьакәыргылара иазшазар акәхарын. Рыԥсы ҭаны иеиқәхазҭгьы, иахьанӡа изааизҭгьы ирацәҩын иҭахаз рахьынтәи ҳаҩныҵҟа ҳаҽрыцкьараҿы, ҳамҩақәҵараҿы алшара ӷәӷәақәа змазгьы. Урҭ дреиуан Аԥсны Афырхаҵа Мушьни Хәарцкьиа. Мушьни Хәарцкьиа ихьӡ ззымдыруа Аԥсны ахы-аҵыхәа аӡәгьы дыҟаӡам.

Аршба Эдуард
© Фото : предоставлено Эдуардом Аршба

Мушьни ихьӡоуп изыдҳәалоу аибашьра аԥхьатәи амшқәа инадыркны Мраташәаратәи Мрагыларатәи афронткқәа реиҿкаара. Раԥхьатәи ахрыӷәӷәарҭақәа раԥҵара, ахыхчара аиҿкаара. 1992 шықәса нанҳәа мза 14 инаркны иара аԥхьа дгылан. Аибашьра ианалагаз аҽны "Ацҳаҟаԥшь" аԥсуаа рнапахьы ианааргаз инаркны иара даҿын афронтқәа реиҿкаара. Аибашьра иаҭахыз здыруаз дмаҷын. Иара аԥышәа ду имазшәа зеьы иара ила иалаган.

Аибашьра ҟалаанӡа иеиҿкааз амилаҭтә гвардиа еиҳабыс даман Владимир Аршба, уи ихаҭыԥуаҩыс дыҟан Мушьни Хәарцкьиа. Аибашьра ианалагаз аҽны рҩыџьагьы арратә дҵа рыманы Гагра аиԥылараҿы иҟан. Убра ауп иахьраҳаз дара рҩыџьегьы аибашьра ишалагаз. Ҳәарада иаразнак Аҟәаҟа игьежьит. Владимир Аршба ишеиҭеиҳәо ала, аибашьра ианалагаз еиҿкааны иҟаз иара дызхагылаз абаталион еихшаны иҟан. Мушьнии Владимир Аршбеи раԥхьатәи аибашьратә еидыслара иахьӡеит Ацхаҟаԥшь аҿы. 

Иааидикыланы 45-ҩык рҟынӡа ауаа еизеит. Мушьнии Владимири адҵақәа рзықәыргыланы ауаа еихыршеит. Зегьы раԥхьа зҵаара хаданы рҿаԥхьо иқәдыргылеит Агәыӡера иҟаз агвардиа аиқәырхара. Убри азын амшын аԥшаҳәахьы ицаны анышьқәа руак ааныркылар акәхеит абџьар ала иршәаны. Уахь шьоукы дықәырҵеит. Дара Агрба Гиви инапхгара аҵаҟа иаангылеит Ацха ҟаԥшь аҿы. Владимир архәҭа маҷқәа реиҿкаара далагеит. Мушьни ахрыӷәӷәарҭақәа реиҿкаара далагеит ахыхьҷараз иаразнак. Уброуп раԥхьатәи атанк ахьыргаз.

Аибашьра раԥхьатәи ауха Мушьни Хәарцкьиа агәыԥ еидкыланы Агәыӡераҟа дцеит, уантәи агвардиа иалаз аруаа раагаразын. Ари архәҭа иалаз реиҳараҩык Кәыдры аиҩхаақәа рахь ицеит, нас уантәи Тҟәарчалҟа ииасит. Ԥыҭҩык амшын аҟәараҿы икҿаханы иҟан. Убарҭ Мушьни уантәи иалигеит.

Уи анаҩс Аҟәа ааныжьраз адҵа аныҟала дара иаразнак мап ацәыркиҭ, аха Владислав Арӡынба ауаҩы дизыршьҭын ишидыруаз анеилыркаа иақәшаҳаҭхеит Аҟәа ааныжьра. Уи аамҭазы дара ахыхьчараз ахрыӷәӷәарҭа еиҿыркаарц иаҿын Мушьни Ацҳашкәакәаҿы, Владимир Ацҳаҟаԥшь аҿы, аха иаанырмыжьыр ада ԥсыхәа аныҟамла Ачадара иахьнеиз ирацәаҩӡаны иеизахьан, аха Мушьнии Владимири ргәыԥ рыманы, уи аамҭазы 60-ҩык рҟынӡа иҟалахьан дара, уа иаанымгылаӡакәа ицеит Аҩада Ешыратәи ацҳахь уи аҩадахьы ахыхьчараз аҭыԥ аиҿкаара иалагеит.

Адырҩаҽны рҩыџьагь Владислав Арӡынба дрыԥхьеит. Ԥшьба-хәба мшы рыла абаталион еиҿыркаарцгьы рыдиҵеит. Амза 17 рзы Владимир дырхәит, ахәышәтәырҭа дҭашәеит. Мушьни Гәымысҭатәи афронт еиҿикааит напхгаҩысгьы иҟаз иара иакәын. Дыздыруаз ишыргәладыршәо ала иара уахгьы-ҽынгьы дмыцәаӡақәа аԥхьа дгылан ар мҩақәиҵон.

Ирҳәоит иара зегьы ихала аиҿкаара далагон ҳәа. Сара иҟасымҵар иҟазҵода, сара исыхәҭоу даҽаӡәы изыҟаиҵарызеи ҳәа иԥхьаӡон. Усҟан аибашьратә ԥышәа рымаӡамызт, аха иара идыруан иҟаҵатәыз зегьы, избанзар иара ԥсабарала, шьала-дала деибашьҩын. Аибашьра ҟалаанӡагьы иара идыруан ишыҟалоз. Хԥа-ԥшьба ҽны раԥхьа аҽазыҟаҵара далагахьан.

Дыздыруаз даныргәалдыршәо иазгәарҭоит аибашьра иара ишиԥсҭазаараз. Аибашьрада хрыцқьашьеи дара рықәцашьеи ҳамаӡам ҳәа иԥхьаӡон. Мушьни Нарҭ Сасрыҟәа диҩызан ҳәа иазгәазҭогьы ыҟоуп. Ихы иҭаз Аԥсуа жәлар реиқәырхара акәын.

Мушьни иоуп еиҿызкааз раԥхьатәи Мраҭашәаратәи афронт. Ешыратәи актәи абаталион деиҳабын. Ирҳәоит ажәак иҳәаанӡа убри ажәа убри аҟара дазхәыцуан, ианиҳәалак зегьы рҟынӡа инеиуан. Иара ихы зынӡа дазхәыцӡомызт, иԥсадгьыл иуаажәлари ракәын дзхәыцуаз. Есымша аԥхьа дгылан, аԥхьа ҽаӡә дыргылан иара ашьҭахь дынхаӡомызт, еснагь аԥхьа дцон. Иара ианианшьахаз ԥшьымз заҵәык роуп аибашьра, аха есымша аԥхьа игылаз уаанӡагь инеира зыбзороу иара иҟәыӷароуп.

Аибашьра анцоз знык дзацәажәаз ауаҩы иаразнак дыҩуа иара дишьҭалон, рҳәеит аибашьраан дызбоз, ицыз аветеранцәа. Иҟәыӷарала иара ауаа драԥысны идыруан аибашьышьа. Ауаа рԥсихологиа идыруан азын аӷа дызҿу иҟаиҵо зегьы иара дахьыҟаз аҭыԥ аҿы идыруан. Убри аҟынтә аибашьратә тактикеи астратегиеи рҿы илиршоз рацәан.

Ԥшьба ҳәба метра аӷа и-БМП аԥхьанӡа днеиуан дымшәаӡақәа. Уи аамҭазы иара иеиԥш ииашаны иҟәыӷаны умҩақәызҵоз иԥшаара цәгьан.

Аибашьра аветеран Руслан Инаԥшьба иџьашьаны иеиҭеиҳәоит раԥхьатәи Аҩада Ешыратәи аиҿахысра иаҟәыҵны, рышьҭахьҟа ихынҳәны иандәықәла: "сара бинокльла сыԥшуан атанкқәа гежьны иахьцоз уамак аабжьамқәа аӡә дхахаӡа дрышьҭагылан днеиуан, абас 100-80 метра рҟынӡа акәын ирыбжьаз. Днышьҭасынгьы ак аашьҭихеит, икәша-мыкәша уаҩ дыҟаӡам. Усҟантәи аамҭазы уи аҩыза аҟаҵара даара иуадаҩын". Нас Руслан ацҳахь дылбааит сааҭк аҟара ааҵхьан убрахь дааит Мушьни. Абас, гәымшәарыла аӷа диабашьуан иара.

Мраташәаратәи афронт шьақәыргыланы ианалга, 1992 шықәса, жьҭаарамза анҵәамҭазы Мушьни диасит Мрагылараҟа. Уаҟагьы иара иоуп афронт еиҿызкааз уҳәар алшоит. Абас, зехьынџьара даԥхьагылан иара. Аибашьра ианалага инаркны агәра ганы дыҟан Аиааира ҳара ишаҳгоз. Аха зыжәлари зыԥсадгьыли рхьаа зыӷрыхоз Мушьни ҭамхашьа имаӡамызт, избанзар иара ихы зынӡа игәаиҭаӡомызт. Иара дҭахеит 1992 ԥхынҷкәын мза 6 рзы Мрагыларатәи аибашьра ахырхарҭаҿы.

600

Аҟәантәи Калдахәаранӡа, ма акоронавирус агәра гара шаҳҭахым

230
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

230

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

39
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

39

Аԥсны 68-ҩык аҿкы рыдырбалеит, ҩыџьа рыԥсҭазаара иалҵит

11
(ирҿыцуп 20:10 29.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4126-ҩык ыҟоуп. Урҭ рахьтә ргәы бзиахеит 2170-ҩык, рыԥсҭазаара иалҵит 38-ҩык.

АҞӘА, жьҭаара 29 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 427 ҟаҵан, урҭ рахьтә акоронавирус аарԥшын 68 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Аоперштаб иара убас иаанацҳаит жьҭаара 29 рзы Гәдоуҭатәи агоспиталь аҿы лыԥсҭазаара дшалҵыз 1976 шықәсазы ииз апациент. Лара ахәышәтәырҭа дҭашәеит жьҭаарамза 13, лыԥсыԥ лагаҩагара акыр илцәыцәгьаны, ҩганктәи агәыҵәкра лыманы. Иақәнагаз атерапиа шлзымҩаԥыргозгьы, жьҭаара 29 рзы лдунеи лыԥсахит.

Жьҭаара 29 рзы рзы иԥсыԥ лагаҩагара акыр ицәыцәгьаны, ҩганктәи агәыҵәкра иманы аҟәатәи амобильә госпиталь аҟны ишьҭаз апациент иԥсҭазаара далҵит, иақәнагаз атерапиа шизымҩаԥыргозгьы.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 135-ҩык ауааԥсыра, урҭ рахьтә 113-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 29-ҩык, ибжьаратәуп - 36-ҩык, илҩаауп 13-ҩык апациентцәа. Гәдоуҭатәи агоспиталь иҭашәеит 11-ҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 55-ҩык апациентцәа. 51-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

11
Атемақәа:
Ачымазара ҿкы – акоронавирус Аԥсни адунеи аҿи: иалкаау