30 сентября 1993 года

Аҟәа ҳшалалаз

110
(ирҿыцуп 14:29 28.09.2017)
Аҟәа ахақәиҭтәреи, Аиааира абла дышҭаԥшызи ртәы лгәалалыршәоит ажурналист Елеонора Коӷониаԥҳа.

Аҵыхәтәантәи ажәылара иалагарц жәамшҟа шыбжьаз Аҳбҩық ахырӷәӷәарҭақәа руак аҿы апозициа аанызкылоз, хаҭала уи аамҭазы сызхыԥхьаӡалаз Баграмиан ихьз зхыз  абаталион жәамшҟа ԥсшьара ҳалбаарышьҭит.

Ҵаҟа Гәдоуҭа санааи, ахәыҷбаҳчаҿы аус зуаз ателехәаԥшраҿы асиужетқәа ҟасҵон, баша аамҭа смырӡырц азы. Хәылбыҽхак ақалақь агәаны ҳкомбат Вагаршак Косиан дызбеит, иара сгәысҽаниҵеит, жәыларак ҟалар адырра шсыиҭо сҩызцәа рыла. Аха, аҵыхәтәантәи ажәылара маӡа-шәкыла излаҭаҳәҳәаз ала, сҩызцәа Земфира Ӡаԥшьԥҳаи Ламара Ҵәыџьԥҳаи сара сахьынхоз апансионат "Черноморец"  ааиха рмоуӡакәа ажәылара ианалага абаталион иаццеит хыма-ԥсыма. 

Есма Тодуаԥҳа лышәҟәы
© Sputnik / Томас Тхайцук

Цәыббра 16 рзы ажәылара иалагеит. Ашьыжь шаанӡа, схәырџьан аашьҭысхын Ешыраҟа ицоз амҩаду ахь скылсит. Хысран. Ар зықәтәаз амашьынақәа саҩыҟьҟьон сахьгылаз. Амҩан дсықәшәеит Асҭамыр (Асҭа) Џьынџьал. Иаргьы ԥсшьара дыҟазаарын ақыҭахь, ажәылара шыҟалаз аниаҳа са сеиԥш ддәықәлазаап. Ус машьына дук аангылт, ҳҩыџьагьы хыхь ҳнақәгылан афронт аганахь ҳхы ҳархеит. Амашьына ду ҳахьақәгылаз иҳаҳауан аибашьра абжьы. Абас ҳашцоз, лбаа Ешыра ҳнаӡоны, иааҳԥылеит ацхыраа ласы амашьына. Амашьына аангылеит. Сыԥшызар, амедика-санитратә баталион ахада Викториа (Вика) Ҳашыгԥҳа дааҭыҵит, ҳзықәтәаз амашьына аанызкылазгьы лара лакәын.

— Бабацои бара?", — иаарымчшәа дсазҵааит лара.

— Сҩызцәа срышьҭоуп, срыхьӡарц сҭахуп, — сҳәахт саргьы еибашьҩы дук сакәызшәа. 

— Былбаа арахь, — насыдылҵеит лара командаҟаҵаҩык иаҳасабала.

Асҭа Џьынџьал иакәзар, Верешьагин ихәы ҳәа иахьашьҭаз, иҩызцәа ахьыҟаз дышцоз сеиҳәеит, дзықәтәаз амашьынагьы хыхьҟа аҿынанахеит санылбаа ашьтахь.

Вика исалҳәеит, ҳбаталион ахьыҟоу цашьа шамам, "нас ԥсгарак ҟалар иахьыҟоу еилкааны сара бсышьҭуеит" лҳәан, лмашьына сынҭартәаны Ешыратәи ахырӷәӷәарҭахь сылгеит. Амала, уажә аамҭа рацәа анца ашьҭахь, еилыскаауеит, сахьцо сзымдыруа сбаталион сахьашьҭаз игаз амҩа акыр ишшәарҭаз, акгьы салаҳәаӡамкәа сыбжьаӡыргьы шалшоз. Аевакопункт аҿы сахьнеиз Анна Броидо, Лиудмила Маанԥҳа, Асида Кәыҵниаԥха уҳәа, издыруаз зегь збеит. Есыҽны убри ааҟара ахәцәа ааргон ҳахьӡомызт урҭ ацхыраара рыҭара. Уи апункт аҿы ҳақьымцәас иҟан Лев Ачбеи Гәында (Лиалиа) Џьниаԥҳаи.

Уажә урҭ ахҭысқәа анысгәалашәо, иџьасшьоит, аиааира агара иазгәышьуаз ҳҩызцәа ирылдыршаз шырацәоу, урҭ ирықәнагоу ажәа аҳәарагьы шымариам. Цәыббра 26, 27 рзы аҽарӷәӷәеит аибашьра, ақәаршыҩ еиԥш илеиуан иҳаихсуаз ақырҭуа мчқәа рыхқәа. Ахәцәа ааргон хыԥхьаӡара рацәала, рыбжаҩык аҭыԥан ацхыраара раҳҭон, даҽа џьоукы Афонҟа агоспиталь ахь ирышьҭуан машьыналеи, уа игылаз дәыӷбалеи. Ахәцәа аныргоз аибашьра зыԥсы ацәызгарц зҭахны игьежьуаз асолдаҭцәагьы ыҟан. Лев Ачба уи азы аҭыӡшәа шьҭихуан, аха "аԥсы ҵаауп" рымҳәои, игьежьуа дгьежьуеит дузынкылаӡом.

Аевакопункт ахь иааргон иара убас, иҭахаз аибашьцәагьы. Урҭ рыбжьара иҟан ибзианы издыруазгьы. Исгәалшәоит Сергеи Ҳамыти Анзор Агрбеи шааргаз. Уҭ рыԥсы шҭамыз збаз амедиаҳәшьцәа иқьызқьызуа аҵәыуара иалагеит. Лев Ачба ӷәӷәала ихәыз ацхыраара риҭон, минуҭкгьы атәаха имамызт. Викториа Ҳашыг лакәзар афронт зегьы дакәшон, дцон, даауан, апункт иагыз иабзаз зегь лара лакәын ҵәатәышьаҟас иамаз. Арациа ала иҳаҳауан аԥсуаа Аҟәа ишазааигәахоз. Ауха ҳацәамызт, ахәцәа ҿаҳҳәон, иԥсыз еиқәаҳкуан.

Дук мырҵыкәа "Аҟәа ргеит" рҳәеит. Анна Броидо лоуп сымҩашьозар, ҳбираҟ шьҭыхны илыршәышәуан. Ҳгәырӷьон зегьы. Иҭахоз ргәырҩареи, аиааира иацыз агәырӷьареи еилаӡҩо ҳмыцәакәа иааҳршеит ауха. Ианша, иҳарҳәеит Аҟәаҟа ҳшыргоз. Иҳамаз ахәшәқәа, ахәцәа рҿаҳәагақәа уҳәа аашьҭыхны, машьынала Аԥсны аҳҭны қалақь Аҟәа ҳалалеит лбаа Ешырантәи. Маиак ҳәа изышьҭаз араион ҳалсны ҳахьаауаз, иубон еилаԥыххааса иҟаз ҳақалақь ахаҿра шеицеикыз иҳабашьуаз аӷа. Ҳашиашаз Аҟәатәи аҩбатәи ахәышәтәырҭахь ҳааргеит, аибашьра еилгаанӡа убра ҳҷаԥшьаларцаз.

апоет Таиф Аџьба
© Фото : из личного архива семьи Аджба

Сымҩашьозар, адырҩаҽны амза 29 рзы ашьыжь асааҭ 10 шыҟаз дааргеит ӷәӷәала ихәыз Гәымба ҷкәынак. Даазгаз ирҳәеит "Дранда азааигәара аиҿахысраҿы ахы иаахеит" ҳәа. Иахьагьы сыбла ихгылоуп зыԥсы ахәанга ҭаз аибашьҩы ихаҿсахьа. Дқәыԥшӡан зынӡа, иубаратәы иҟан иԥсырҭа ахы ааханы ишыҟаз, аиқәхаразы имчқәа шмаҷыз. Араҟа иҟаз аҳақьымцәа ирыӡбеит Гәдоуҭатәи агоспиталь ахь даҳгарц.

Ҳцон ацхыраара лас амашьына ҳақәтәаны. Амашьына аԥхьатәи аҭыԥ аҿы, ихәны иҟаз иҩыза, автомат зкыз аибашьҩы дҭатәан. Ҳдәықәлеит Гәдоуҭаҟа. Гәымсҭатәи ацҳа ахырхарҭала амҩа кны дцон ҳмашьынаныҟәцаҩ.

Амҩадуқәа ҭәын атрофеи еизганы изгоз амашьынақәа рыла. Ҳара ҳаццакуан, аха амҩа ҳарҭомызт урҭ. Автомат зкыз аибашьҩы, иабџьар амашьына иҭырҳәҳәаны ахысра далагеит амҩа ҭадырцәырц азы. Ҳара даҳгон зыԥсадгьыл зхы ақәызҵоз аибашьҩы, амҩа ҳарҭомыз гәабани-хызеи ирыҵаз ачаландарқәа. Абри избаз асахьа аԥхыӡ салазшәа саалнахит. Аҟәа аныргаз аухатәи сгәырӷьарақәа зегь неиԥхьбеит. Иаҳгоз ахәы иԥсы ҭоу иҭаму гәасҭон амҩа ҳақәнаҵы. Иара сахьиҿаԥшуаз схы сцәымӷны, адунеи схы аахызбаауа сааҟалеит.

Иаҳаулак иԥсы шҭаз Гәыдоуҭа агоспиталь агәашә ҳанҭалеит. Ахәышәтәырҭаҿы дааҳԥылеит Емма Кьылԥҳа дӷьаҵәыӷьаҵәуа. Ишеилыскааз ала, лара уаҟа ацхыраара рылҭон. "Дгәымбоуп ари аҷкәын сҳәан" зыԥсы зхымҵыцыз аибашьҩы Емма лнапы днанҵаны ҳназгаз амашьына сынҭалеит.

Иахьагьы исыздыруам уи арԥыс иԥсы рзеиқәырхоу ирзеиқәмырхоу, аха Аиааира абла абас еиԥш сҭаԥшит. 


110

Аҟәантәи Калдахәаранӡа, ма акоронавирус агәра гара шаҳҭахым

231
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

231

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

39
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

39

Аԥсны 68-ҩык аҿкы рыдырбалеит, ҩыџьа рыԥсҭазаара иалҵит

11
(ирҿыцуп 20:10 29.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4126-ҩык ыҟоуп. Урҭ рахьтә ргәы бзиахеит 2170-ҩык, рыԥсҭазаара иалҵит 38-ҩык.

АҞӘА, жьҭаара 29 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 427 ҟаҵан, урҭ рахьтә акоронавирус аарԥшын 68 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Аоперштаб иара убас иаанацҳаит жьҭаара 29 рзы Гәдоуҭатәи агоспиталь аҿы лыԥсҭазаара дшалҵыз 1976 шықәсазы ииз апациент. Лара ахәышәтәырҭа дҭашәеит жьҭаарамза 13, лыԥсыԥ лагаҩагара акыр илцәыцәгьаны, ҩганктәи агәыҵәкра лыманы. Иақәнагаз атерапиа шлзымҩаԥыргозгьы, жьҭаара 29 рзы лдунеи лыԥсахит.

Жьҭаара 29 рзы рзы иԥсыԥ лагаҩагара акыр ицәыцәгьаны, ҩганктәи агәыҵәкра иманы аҟәатәи амобильә госпиталь аҟны ишьҭаз апациент иԥсҭазаара далҵит, иақәнагаз атерапиа шизымҩаԥыргозгьы.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 135-ҩык ауааԥсыра, урҭ рахьтә 113-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 29-ҩык, ибжьаратәуп - 36-ҩык, илҩаауп 13-ҩык апациентцәа. Гәдоуҭатәи агоспиталь иҭашәеит 11-ҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 55-ҩык апациентцәа. 51-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

11
Атемақәа:
Ачымазара ҿкы – акоронавирус Аԥсни адунеи аҿи: иалкаау