Таиф Аджба с супругой Риммой Когония

Аибашьра иахәхаз аромантик

149
(ирҿыцуп 11:22 27.05.2018)
Хабарда ибжьаӡыз рыбжьара дыҟоуп, аԥсуа поет, алирик, Таиф Шьаадаҭ-иԥа Аџьба. Апоет дыбжьаӡижьҭеи 25 шықәса иреиҳауп, абар сынтәа ҳаиҭаԥылоит апоет дызлиааз даҽа ааԥынрак иара илахьынҵа еилкааӡамкәа.

Аԥсны Аџьынтәылатәи аибашьра аамҭазы хабарда ибжьаӡыз рсиа 160 –ҩык иреиҳауп. Адуниежәларбажьаратәи Аџьар ҟаԥшь аусуцәеи, Аԥсны еиҿкаау Хабарда ибжьаӡыз рзы акомиссиеи, Анацәа рхеидкылеи русеицура иалҵшәаны 39 –ҩык азусҭцәоу еилкаауп, урҭ, рыԥсыбаҩқәа анышә иамардеит.

Елеонора Коӷониаԥҳа: Аибашьра иахәхаз аромантик

Хабарда ибжьаӡыз рыбжьара дыҟоуп, аԥсуа поет, алирик, Таиф Шьаадаҭ-иԥа Аџьба. Апоет дыбжьаӡижьҭеи 25 шықәса иреиҳауп, абар сынтәа ҳаиҭаԥылоит апоет дызлиааз даҽа ааԥынрак иара илахьынҵа еилкааӡамкәа.

Ҳааигәа дыҟазҭгьы иахьа, Таиф Аџьба ихыҵуан 79 шықәса. Таиф Аџьба иҩны ддәылганы дыргеит 54 шықәса дшырҭгылаз жьҭаара 9 1992 шықәсазы. Аӷа хәымга инапы наӡеит, аԥсуа лирика зырҿиоз апоет шьахә иҟынӡа. Аибашьра анцоз апоет дахьыргаз азы, Гәдоуҭа амитингқәа еиҿыркааит, апоет ихабар аилкааразы ақырҭуа ганахь акыр аҳәамҭақәа ҟарҵеит аԥсуаа, аха ҳаӷацәа ҽырдагәа руит, иара иахьа уажәраанӡагьы, дара рганахь ала апоет иҭархара иақәыӡбазгьы дыҟам.

апоет Таиф Аџьба
© Фото : из личного архива семьи Аджба

Таиф аибашьра анцоз иныҟәигон амшынҵа, уи аҩырақәа аниҵон даныргаз аҽнынӡагьы. Иҟалап усҟан гәҩарас имамызҭгьы, имшынҵақәа шракәхоз аҵыхәтәаны инапы иҵихуаз арҿиамҭа.

Еибашьран, апоет ажәеинрала аҩра игәы ахымызт: "Сгәы ҭынчым. Апоезиа зынӡа сацәҟьалеит, ииашаҵәҟьоуп ирҳәо: когда пушки гремят- музы молчат", — ҳәа иҩуеит иара цәыббрамза 3 рзы имшынҵаҿы, апоезиа аҽазкра игәы шахым аарԥшуа.

Жьҭаара 9 ахәаша, 1992 шықәсазы Таиф иҟаиҵоит аҵыхәтәантәи ианҵамҭа "Иаха ҭынчран, ақәа леиуан, заа ҳашьҭалеит. Ашарԥазы ҳанааԥш алашара ыҟаӡамызт, аӡы усгьы иааиӡомызт. Асааҭ ааба рзеиԥш, алашара ҟалеит, аха ателехәаԥшра аус ауӡомызт, жәба рышьҭахь иаалагеит, аха ҳара иҳазкны егьамҳәеит. Уажәы асаат жәаба ҟалахьеит, макьана ҭынчроуп, хысбжьы гом. Хьҭоуп, ақәа шналагара иҟоуп, иаҿыҵышәшәоит…". Абри аниҩы даҽа ҩ-сааҭк рышьҭахь Таиф ақырҭуа гвардеццәа дыргоит.

Трагедиала зыԥсҭазаара ахыркәшара зқәашьыз аромантик, имшынҵақәа рҿы знымзар-зны ицәыримгеит аибашьра ҳаҵахар ҟалоит ҳәа, заҟа дҭынчыз аҟара, ҩныҵҟала дыӷәӷәан, уимоу, ианиҵоз аҩырақәа рҿы иаҳбоит аибашьра ианалага, ишәаҟьаны Аҟәа иалаз аԥсуаа ргәы ширӷәӷәоз. "Зегь ргәы каҳаны иҟоуп. Ҳалгеит, ҳара ҳтәы егьыҟам рҳәеит. Шәаангыл, ус акәым, ҳазҵаара етапк ала ишырзымыӡбоз еилкаатәуп, наҟ-наҟ аргьы алыргап, иҵегьы аицәажәарақәа ҟалап ҳәа ргәы сырӷәӷәарц иақәыскит",- ианиҵоит апоет имшынҵаҿы сентиабр 4 рзы.

Таиф Аџьба аԥсуаа џьоукы-џьоукы рыгәкаҳара дазыхынҳәуеит сентиабр 5 рзтәи ианҵамҭаҿгьы: "Аԥсуаа саазықәшәалак зегьы ргәы каҳаны иҟоуп. Даара сацәшәоит ҳара, ҳара ҷан-ҷаны ҳаибакыр ҳәа. Амилаҭ иаадырԥшыоруп аҟәышра, иаҳагьы рҽеиладырҵәароуп. Ҳкурс хада-ахьыԥшымра азықәԥара ҳақәныҟәалароуп". Таиф аибашьра ианалагаз Аҷандара дыҟан, аха арахь аҳҭны қалақь ахь дааит авгус 15 рзы. Дшааизҵәҟьа, Ашәҟыҩҩцәа реидгылахь дцан, иусурҭа ауадаҿы имаз иархив иманы дааит аҩныҟа. Ила иабо зегь аҭоурых азы ишхәарҭахо дырны апоет имшынҵа ҩызас ишьҭыхны аус адиулон: "Иахьа Аԥсны зҭагыло адрама сахьаркырала аарԥшра мышкы-зны иаиуп уеизгьы. Аҭоурых —ҭоурыуп, ицәгьа ибзиа иааҟало зегь гәынкылатәуп, ианҵалатәуп", — ҳаԥхьоит Таиф имшынҵаҿы.

Ииашаҵәҟьаны, апоет имшынҵа зеиӷьыҟам ҭоурыхтә нҵамҭоуп, уи иккаӡа иаанарԥшуеит иҳабашьуаз адунеи ҳаныхра хықәкыс ишимаз. Таиф имшынҵа ҳаиҭанагәылаԥшуа, даҽазныкгьы ҳамҩашьо агәра ҳгоит иара иԥсадгьыл ахьаа зегь раԥхьа иширгылоз: "Адунеи зегь аҿаԥхьа ажәлар маҷ ықәырхуа, зинк рымаӡамкәа, ақырҭқәа ирҭаху мацара иаго изыҟалом",- ҳаԥхьоит Таиф имшынҵҿы сентиабр 3 рзтәи ианҵмҭаҿы. Апоет есыҽны ииҩуаз имшынҵа хиркәшон "Анцәа бзиала иаҳзырша" ҳәа, Ҳаиҳа зымчу иахь ихы рханы, ижәлар зҭагылаз агәаҟра лыԥхала ралҵра дазгәышьуа.

© Foto / из личного архива семьи Аджба

Апоет даныргоз иҭәымҭа дҭагылан, уи ипоезиатә ԥсабара ԥшӡа иалаз абжакгьы алымшацызт. Аибашьра аԥхьа, 50 ш анихыҵуаз, раԥхьаӡа акәны иҭыҵит иажәеинраалакәа реизга "Аныҳәаԥхьыӡ". Апоет игәҭакқәа рацәан, аамҭак азы, апроза маҷ иҽазикуа далагеит. Знымзар-зны Таиф Аџьба амал сырҳандаз, ауаа ирымым сымандаз ҳәа далацәажәо дысгәалашәом. Иахьагьы сыбла ихгылоуп, зыҩнгьы иԥхашьа-ԥхаҵо иҩназ, зыбжьы ҳаракны имцәажәоз апоет благәыӷра ихаҿсахьа. Апоет ишыжь каҳуаршрала иалагон, уи иара ритуалҵас ишьҭыхны иман. (Таиф данырга ашьҭахь, иԥшәмаԥҳәыс Гәдоуҭаҟа данца, апоет иҩны иҩназ ақырҭуа гвардееццәа ианцоз иргеит Таиф бзиа иибоз икаҳуаршыга). Таиф дахьынхоз иҩны изалхын аус ахьиушаз ауда хәыҷы, убра иҽыҩнакны, икьыԥхьга машьына ашьҭыбжь ада, даҽак умаҳауа ҭынч аус иуан апоет. Таиф инапы рылакын аиҭагара, иҩуан астатиақәа, аха зегьы ирыцкын иара изы апоезиа:

Абри ашьха ду ақәцәан сызхалар,

Схәыцуан убас сара зны,

Убрантә нас еҵәакгьы шапшапуа,

Искып ҳәа снапы ҩакӡаны.

Абас идгьылтәым агәҭхәыцрақәа змаз апоет иҩны ддәылганы дыргеит ақырҭуа гвардееццәа. Уаҳагьы наӡашьа амоуит аромантикатә цәаҩа змаз апоет игәахәтәы. Абар сынтәагы ҳаԥылоит апоет 79-тәи иирамш, иара дзыниаз нагӡаны еилкаамкәа.

Схәыцуеит есқьынагьы, иалшоз зегь ҟанаҵама ҳҳәынҭқарра, апоет дҭадырхазар иԥсыҩбаҩ ахьыҟо аилкааразы? Мап, хәа сгәы иаангоит, избанзар, аԥсуаа адунеи иқәнаҵы, аԥсшәа гонаҵы зпоезиала ҳгәаҵа зырԥхо апоет ихабар аилкаарзы, ҳҳәынҭкарра иаӷьны ақырҭуа ган аҿаԥхьа азҵаатәы азықәмыргылеит аибашьра ашьҭахь. Ақырҭуа террористцәа ҳбахҭақәа ирҭыганы изтәу рахь ианаҳашьҭуа, иҳақын апоет иҿаԥхьа, знык иадамзаргьы — Таиф Аџьба ихабар еилышәкаанӡа, аӡәымзараӡә дшәаҳҭом ҳәа ҳҳәынҭқарра амаа зку ирҳәазҭгьы. Ақырҭуа ган акгьы рзымдыруа иҟам, аха урҭ рхала ахаангьы ицәырыргом апоет иҭархашьа аӡбахә. "Амилаҭ ду" ҳәа зхы иазызыԥхьаӡо ақырҭқәа апоет иеихсны дшыршьыз адунеи иаҳар ахьырҭахым аҟынтә, иахьа уажәраанӡа Таиф Аџьба хабарада ибжьаӡыз рсиаҿы дыҟоуп.

Ааԥын иалиааз апоет Таиф Аџьба иҟамзаара ахьаа ду ацуп, аха иара ҳара ҳирԥхоит иаҳзынижьыз илыԥшааху поезиатә цәаҳәала.

"Сыԥсадгьыл, сыԥсадгьыл, нас, уараҵәҟьагьы агәра угома сыԥсра?", — ҳәа апоет иԥсы анҭаз иҟеиҵаз азҵаатәы џьашьахәуп, иара илахьынҵа зеиԥшрахаз ҳаназхәыцуа.

25 шықәса иара ида амҩа ҳанысуеит, 25 шықәса еихсыӷьӡом Таиф Аџьба ихабар аилкааразы агәыӷрагьы.

Автори аредакциеи ргәаанагарақәа еиқәымшәозар ҟалоит.

149

Аҟәантәи Калдахәаранӡа, ма акоронавирус агәра гара шаҳҭахым

192
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

192

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

38
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

38

Уахыки-ҽнаки рыла 106-ҩык акоронавирус шрылаз аадырԥшит Аԥсны

18
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4058-ҩык ыҟоуп. Урҭ рахьтә ргәы бзиахеит 2071-ҩык, рыԥсҭазаара иалҵит 36-ҩык.

АҞӘА, жьҭаара 28 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 458 ҟаҵан, урҭ рахьтә акоронавирус аарԥшын 106 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 137-ҩык ауааԥсыра, урҭ рахьтә 118-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 40-ҩык, илҩаауп 15-ҩык апациентцәа. Гәдоуҭатәи агоспиталь иҭашәеит жәҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 51-ҩык апациентцәа. 47-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп. Амобилтә госпиталь аҟынтәи илҩаауп быжьҩык.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

18
Атемақәа:
Ачымазара ҿкы – акоронавирус Аԥсни адунеи аҿи: иалкаау