Алмасхан Барцыц

Алмасхан Барцыц: Пицундатәи ахәшәтәырҭа иԥшьоу мчык амоуп

456
(ирҿыцуп 16:52 04.08.2018)
Аԥсҭазаараҟны, ауаҩы дзықәшәо аҭагылазаашьақәа ирхылҿиаауа рацәоуп. Иҟалоит идунеихәаԥшышьа шьаҭанкыла ианаԥсахуа, иара убас илахьынҵа. Зхәыҷра шықәсқәа раан еиуеиԥшым азанааҭқәа ирызхьаԥшуаз, аха хықәкыла иалзымхыцыз Алмасхан Барцыц иаҳзеиҭеиҳәеит, иаԥхьаҟа дышҳақьымхоз агәра изыргаз аҭагылазаашьа атәы.

Саида Жьиԥҳа, Sputnik

Алмасхан Едуард-иԥа Барцыц изҳауан аҭаацәара ду аҟны. Аԥсуаа ражәа ишалоу "анцәа ишиҳәара" иҟан, ан, аб, ҩыџьа аԥҳацәа, аԥа еиқәгәырӷьо. Аха, аԥсҭазааратә ҭагылазаашьа, Барцыцаа рыҩнаҭа иаалырҟьаны арыцҳара аанагеит. Иԥсҭазаара далҵуеит аб. Убри нахыс, хҩык ахәыҷқәа ран, занааҭла ирҵаҩыз Ирина Габуниаԥҳа лыхшара рааӡареи, аҵара дырҵареи рҟны аҭакԥхықәра ду лыдлеит. Аамҭа излаҳнарбаз ала, зеиӷьыҟамкәа илылшеит. Мрамзеи Алмасхани ҳақьымцәахеит, Мактина диуристхеит.

Апсихологцәа ишьақәдыргылахьеит, ахәыҷы игәынкылара хашҭра шамам. Убригьы, Алмасхан изанааҭ алхраҿы ашьҭа ннажьит.

"Ҳаб иаалырҟьаны адунеи аниԥсах, сара хышықәса ракәын исхыҵуаз, аха еилыскаауан, уаҳа ҳара ҳахь дшымгьежьуаз. Уи даара игәнызгон, сгәырҩон. Исгәалашәоит, сызҳацыԥхьаӡа, шаҟантәы схаҿы иааиуаз "сдуны, сҳақьымны сыҟазҭгьы, саб деиқәсырхон" ҳәа. Убас, ԥшьала ари азанааҭ сазхьаԥшуа салагеит сшыхәыҷыз инаркны", — иҳәоит Алмасхан Барцыц.

Зынгьы, ахәыҷы амҩа шеиҩиҵәоз, ила шааԥшуаз аласба амашьына иаҵаҳаит. Алмасхан дацхраарц иаразнак ишьҭихит, аха иамаз ахәра ӷәӷәа аԥсҭазаареи иареи еимаҭәамызт. Ус инапаҟны аԥсы ахыҵит. Акраамҭа ахәыҷы илымҳа иҭыҩуаз аласба аҵәаабжьы, ҩаԥхьа аҳақьымрахь дымҩақәнаҵеит.

"Ҳҭаацәараҟны, аҳақьым изанааҭ алылххьан саҳәшьеиҳаб Мрамза. Ашкол сахьынӡаҭаз, аинтерес кны саԥхьон лхы иалырхәоз амедицинатә литература. Убасҟан агәра згацәҟьеит, аҳақьымрахь исшыхоз", — ҳәа ҳаилиркааит иара.

Алмасхан Барцыц Пицундатәи абжьаратә школ №1 аҟнытә диасуеит Башаран коллеџь ахь. Аиҳабыратәи аклассқәа рҟны даннеи, дҭалоит Нальчиктәи абжьаратә школ №5, уи дагьалгоит. Ҟабарда-Балкариатәи Аҳәынҭқарратә Университет, амедицинатә факультет қәҿиарала далгоит, азеиԥш хирургиа азанааҭ иманы. Анаҩс аинтернатура дахысуеит Нальчиктәи ареспубликатә аклиникатә хәшәтәырҭаҟны. Уи ашьҭахь дҭалоит орденатура, Ҟабарда-Балкариа агәабзиарахьчара аминистрра дрышьҭуеит Сечинов ихьӡ зху, Москватәи амедицинатә Академиа, Франштеин иклиникахь. Аҳақьым-уролог изанааҭ иоуны, ҩышықәса Нальчиктәи ақалақьтә поликлиника №7 аҟны аус уны, аԥышәа рҳаны, Москва аспирантура аҭаларазы ааԥхьара шимазгьы, дхынҳәуеит Аԥсныҟа.

"Аҵара сҵонаҵы, изныкымкәа Гагратәи ацентртә араионтә хәшәтәырҭаҟны апрактика сахысуан. Усҟан ахирургиа аҟәша аиҳабыс Виачеслав Аргәын иакәын иҟаз. Аԥҟарақәа анымҩаԥигоз, цхырааҩсгьы сиргылон. Есқьынагьы исывагылан, сԥышәа еиздырҳауан амедеиҳәшьцәа Гәыльнара Барцыцԥҳа, Мзиа Хышԥҳа, аҳақьым-хирургцәа Владимир Манукиан, Савели Серитиди. Саԥхьаҟа, аратәи апрактика акырӡа исыхәеит. Аҵарахь ҳаннеиуаз, еилкаахон, сҩызцәа сара сеиԥш аҭагылазаашьа шрымамыз. Урыстәылатәи аҳақьымцәа астудентцәа аус рыдуларазы аамҭа рыцәмаҷуп", — еиҭеиҳәоит аҳақьым.

Алмасхан Барцыц иԥсадгьыл ахь данаа, ааԥхьарақәа иуоит Гагратәии, Ареспубликатәии хәшәтәырҭақәа рахь. Аха иара иӡбеит, акыр шықәса ихьгәхьааигоз, игәы ззыбылуаз иҭаацәа рааигәара дыҟазарц, убри аҟнытә, аусура далагоит Пицундатәи ақалақьтә хәшәтәырҭаҿы.

"Пицунда иқалақь хәыҷуп, аха аҭоурых ду амоуп. Иара ахәшәтәырҭа ахыбра акәзаргьы шәышықәса ирҭысхьеит, уаанӡа араҟа аберцәа крыфарҭас ирыман. Насгьы, сара ибзианы еилыскаауан, есааира аҭыԥантәи ахәшәтәырҭа аспециалистцәа азымхо иалагар, ахԥша шацәыӡоз. Убри аҟнытә, сҿырԥштәы ала, еиҵагыло аҳақьымцәа ҿарацәа идсырбарц сҭаххеит, уқалақь гәакьа, ууажәлар урыдгылар, еиқәурхаша, ԥхьаҟа иугаша шыҟало. Аусура саннеи, аҳақьым хада Зинаида Џьакониаԥҳаи аколлективи гәаартыла исԥылеит, ахәшәтәырҭа аҭыӡқәагьы иԥшьоу мчык сырҭеит", — ҳәа азгәеиҭоит Алмасхан.

Пицундатәи ахәшәтәырҭаҟны аҳақьым-уролог дыҟамызт, аха аилазаара иахәаԥшны, ахарҭәаарақәа аларгалоит. 2015 шықәсазы, Алмасхан Барцыц, ахәшәтәырҭа аҳақьым хадас дахагылоит. Алмасхан Пицундатәи ахәшәтәырҭаҟны аусура даналага нахыс, аҳақьымра инаваргыланы, аҭоурыхҭҵаарагьы иҽазикит. Иара еидикылоит Пицундатәи ахәшәтәырҭа иазку архив. 1941 шықәса инаркны, ҳақьым хадацәас иамаз рсиа шьақәиргылахьеит, реизгара даҿуп ажәытә сахьақәа.

Пицундатәи ахәшәтәырҭа
© Фото : из личного архива
Пицундатәи ахәшәтәырҭа

1980-тәи ашықәсқәа раан, Пицундатәи ахәшәтәырҭаҟны иаартын ахшараиурҭа, ахирургиа, атерапиа аҟәшақәа, астационар. Иахьа, араҟа аус ауеит ҽынлатәи астационар, иццаку амедицинатә цхыраара.

"Пицундатәи ахәшәтәырҭа аҭыԥантәи ауаажәлари, аԥхынтәи аамҭазы иаҳзаауа асасцәа рҿаԥхьеи аҭакԥхықәра дуӡӡа амоуп. Иҟалалоит ԥсшьарамшыдагьы, аколлектив аусура ианҭыҵуа", — инаҵишьит Алмасхан.

Пицундатәи ахәшәтәырҭаҟны аус руоит ацуҭатә терапевтцәа ҩыџьа, аҳақьым-хирург, аҳақьым-уролог, ахәыҷтәы ҳақьым, аԥхынтәи аамҭазы аҳәса рҳақьым, иццаку амедицинатә цхырааразы аҳақьым, алаборант, афельдшерцәа хҩык, амедеиҳәшьцәа ԥшьҩык, иаартуп афизиокабинет.

Алмасхан Барцыц ҷыдала ҳаҭыр рықәиҵоит 50 шықәса инареиҳаны, ахәшәтәырҭаҿы аус зуо, Галина Анохина-Канџьариа, Лидиа Харина, Антонина Кухтина. Иҭабуп ҳәа реиҳәоит, аамҭа хьанҭақәа ирцәымшәакәа, уимоу ириааины, иахьа уажәраанӡа руалԥшьақәа ахьынарыгӡо.

Пицундатәи ахәшәтәырҭа аусзуҩцәа
© Sputnik Cаида Жьиԥҳа
Пицундатәи ахәшәтәырҭа аусзуҩцәа

Ахәшәтәырҭа аҭагылазаашьа атәы уҳәозар, жәашықәса раԥхьа араҟа имҩаԥгаз адәахьтәи ремонт, ажәхьеит. 2016 шықәсазы, Пицундатәи акурорттә еилазаара аиҳабыс иҟаз Даур Кәырмазиа иааирԥшыз ацхыраарала ҩ-кабинеҭк рҟны аремонт ҟаҵан. Иахьазы иԥсахтәны иҟоуп ахыб, аԥенџьырқәа, аҩнуҵҟа акәзаргьы акапилатә ремонт аҭахыуп.

Пицундатәи ахәшәтәырҭа
© Фото : Саида Жиба
Пицундатәи ахәшәтәырҭа

Абарҭқәа зегьы, иара убас иуаажәлар ргәабзиареи, рсоциалтә ԥсҭазаара аиӷьтәреи дрызхәыцны, 2016 шықәсазы, Алмасхан Барцыц, Гагра араионтә Еизара адепутатрахь икандидатура ықәиргылоит, алхыҩцәа рыгәрагарагьы даԥсахоит. Хантәаҩысгьы дахагылоит асоциалтә политикеи агәабзиарахьчареи рзы акомиссиа.

"Сара хықәкыс исымоуп, Гагра араион амедицина аҩаӡара ашьҭхра, ақыҭатә ФАПқәеи, амбулаториақәеи ишақәнагоу еиԥш русура аиҿкаара, ахшара рацәа змоуи, зфинанстә ҭагылазаашьа кәадоуи аҭаацәарақәа рхылаԥшра", — иҳәоит иара.

Пицундатәи ахәшәтәырҭа
© Фото : Саида Жиба
Пицундатәи ахәшәтәырҭа

Алмасхан Барцыц дзышьҭоу аус хадақәа иреиуоуп, Аԥсны аџьынџьтәылатә еибашьра аинвалидцәа рзы изинҷыдоу аԥҭека Гагра аартра.

Алмасхан Едурад-иԥа Барцыц 36 шықәса роуп ихыҵуа, аха иара имоу аҵареи, аԥышәеи ирыбзоураны, Аԥсны иреиӷьу аҳақьымҵәа рыгәҭа дургылар алшоит.

456

"Илбаз иакәӡам дыззааргаз..."

121
(ирҿыцуп 17:29 19.09.2020)
Ақьаӷьариа лыцхыраарала аԥҳәысҳәараан зны-зынла иҟалар зылшоз ахҭысқәа аҭыԥҳацәа рразҟы ишаныԥшуаз еиҭалҳәоит Sputnik аколумнист Елеонора Коӷониаԥҳа.

Аҳәара уадаҩуп иахьа сызлацәажәо атема атрадициатә ҟазшьа ду амоуп ҳәа, аха усгьы, шамаха џьара иуԥымло цәырҵроуп сгәахәуеит. Апоет Платон Бебиа илаф жәеинраала "Ачара ду" иахьа чарацыԥхьаӡа ирҳәоит. Измаҳацда арҭ ацәаҳәақәа:

"Ачара ду аилашымҭаз

Амҳараҿы бжьык аагеит.

- Унан, иҳахьзеи? Ҳаи, сыԥсындаз!

Амитә ҳахьит, ҳҭаца дцеит!"

Апоет иажәеинраала асиужет хыҭҳәаауп сызҳәом, ари иамоуп акырынтә ҳаԥсҭазаараҿы имҩаԥысхьаз ахҭысқәа рсиужет. Иахьа иҟалап, ас иҟамлозаргьы, аха схәыҷреи сқәыԥшреи раамҭазы исаҳахьан "илбаз иакәӡам дыззааргаз" шырҳәоз. Апоет Бебиа илаф ажәеинраала иазааигәоу асиужетқәа зны-зынла аԥҳәыс лзы иразҟыдараны ианыҟало ыҟоуп, ҳчарақәа рҿы иацкәашозаргьы.

"Ус уа, агәыла ҭаҳмада

Дахьтәаз ҿааиҭит абас:

- Дадраа, ҳҭаца дцеит, избанзар

Илбаз иакәӡам дыззааргаз…"

Абри ашәа сазыӡырҩыцыԥхьаӡа иаасгәалашәоит ԥҳәыск лҭоурых, уи ари ашәаҿы ишыҟоу еиԥш, илбаз иакәым дыззааргаз, аха лҟазшьа илнамҭеит, ашәа асиужет аҿеиԥш, лабраахь агьежьра, дыззааргаз илдырбаз шиакәмыз анылба.

Таиф Аџьба илакә-поема "Сабажәгьалеи" афырхаҵа ишьашәалаз, иҟәынгаз арԥыск иуацәа ԥҳәыс дизыргарц рҭаххеит. Дара ибзианы ирдыруан, иара иҟәынгареиԥш, адәахьтәи иҭеиҭыԥшгьы аӡәгьы дшыхнамхуаз. Сабажәгьалеи ихаҭа-ԥсаҭа иакәын иара. Иуацәа убри аҟынтә ирхәыцит ԥҳәыс дшизааргашаз аплан. Зны далрыԥшааит ажәа знырҵашаз, зсахьа бзиаз, хшыҩлагьы икәадамыз лара.

Рҟәынга иҿы ааиртыр иԥҳәысаагара шхыбгалоз рымдыруаз, исахьагьы уи анубаалон усгьы, убри аҟынтә, иаалаган, рқыҭа иатәыз, зыгәра ргоз, ирыцәтәыммыз аҭаацәара иалалахьаз ԥшӡакы рыҷкәын иҭыԥан ԥҳәысҳәара дыргарц. Ақьаӷьариа амҩа ылылхит аԥхьа, аҭыԥҳа длацәажәеит, зычаԥашьа бзиоу, зани заби бзиоу дшизылҳәо азы дазыҟалҵеит.

Аҭыԥҳа маҷк инахараз шьха қыҭак датәын, арҭ аҭаца дызгарц зҭахыз адгьыл каршәраҿы инхон. Иахьынхоз рҭыӡҭыԥ аманшәалара адагьы, мазаралагьы ихьысҳамызт. Аӡӷаб деибан, лани лареи ракәын ашьха қыҭаҿы аҩны иахыз.

Ицеит илықәыршәны аԥҳәысҳәара арҭ ауаа. Аҟәынга иҭыԥан ицәырыргоз иблақәа иаҵәаӡа, знык унархыԥшылар урытҟәо иҟан. Ауха иахьнеиз аԥшәмаԥҳәыс лыԥҳа аразҟы лоур лҭахымзи, аишәа лырхиеит асасцәа дахьқәа рзы. Аҭыԥҳа дынкылыԥшны днаихәаԥшит лҳәара инеиз. Иаразнак лгәы дҭашәеит аблагәыӷра, иԥшӡара дыхнахит иаразнак. Аԥшӡа, иԥшра адагьы, итәашьа-игылашьала дугәамԥхо дыҟамызт. Ирфеит, иржәит, асасцәа изызнеиз ан лҿы ицәырыргеит, уи аамҭазы ақьаӷьариа аус лухьан, абла гәыӷрақәа ихырхыз аҿа ллырҳәахьан, ари аҩыза аразҟы даҽазнык лашҭа ишҭамлар шалшо лырдырны.

Ажәакала, дырҳәеит аҭыԥҳа, дук хара имгакәа, аҭацаагацәа цан, Аҟәынга ҳәа ҳзышьҭоу аԥҳәыс дизааргеит. Аҭыԥҳа лакәзар, дызҭаргалаз ашҭа лаша, илдырбахьаз аблагәыӷра уҳәа, лгәы ҭыԥраауа дыҟан. Чарамызт ируз, аха ауацәа, аҭахцәа адгаланы аишәа бзиа рхиан. Ҵхыбжьонынӡа еилыҵуамызт асасцәа, аҭацагьы маӡала дкылыԥшны абла гәыӷрақәа дрышьҭан, аха дара џьара рҽыҵәахны иҟан, ицәырҵуамызт макьана.

Ҭынчрахеит, асасцәа еимпит, аҭацагьы луада лдырбеит. Дук мырҵыкәа, абла гәыӷрақәа рцынхәрас луада иааҩналеит ашарамша блақәа. Лыблахаҵ аагьежьит азныказ. Ашьҭыбжьқәагьы цәгьахеит аҭаца даазгаз рыҩнаҿы. Ақьаӷьариа лакәзар, ҵаҟатәи аихагылаҿы лҽырхианы дтәан, аҩныҟа агьежьра шхьымӡӷу, уахь лышьҭахьҟагьы лан лыбӷа шԥылҵәо уҳәа, илҳәашаз рхианы илыман.

Илылымшеит аҭаца апоет Бебиа иажәеинраалаҿ ишыҟоу еиԥш, аҩныҟа ацара, илылымшеит, избанзар ҟазшьала дыӷәӷәамызт. Даанхеит дыззааргаз иҿы. Аҵаул чарагьы лзыруит анаҩсан. Аҭаца дахьыкҿагылаз ани абла гәыӷрақәа харшәшәара ҳәа иныҩналеит. Лгәы ааилагьежьит лара, лыԥсы злахаз, лразҟы анасыԥдара азҭаз аблақәа данырхыԥшыла, аха илыхьыз лҽамариашаны ҭацара ахәхәаҳәа иуа дыкҿагылан, лынасыԥдара илхаршәыз лкасала ихҩаны.

Аҭаца еснагь дазыԥшын урҭ абла гәыӷрақәа зхаз рашҭа данҭало ҳәа. Даалон иара уарла-шәарла, даныржьозтәи ахҭысқәа алаф ахь ииаганы иаацәырго. Абас ицон аамҭа. Аҟәынгажә иакәзар, дгәырӷьаҵәа иԥҳәыс ԥшӡа длывагьежьуан, иҟәынгара убла ааҭнахуама уҳәаратәы.

Аамҭа цеит. Аҵеи диит ари ашҭаҿы. Ахәыҷы маҷк изҳауа даналага, абзҳәацәа игәарҭо иалагеит аҷқәын хәыҷ абла гәыӷрақәа шихаз. Уаҳа акыр аҭахызма, ус акәымзаргьы, илыхшаз "ани илдырбаз иоуп дзеиԥшу" ахьӡхалеит. Убас шырҳәозгьы, лара гәыбӷан аӡәгьы илиҭомызт, анхәеи абхәеи рмаҭа иеиӷәырӷьо инхон.

Абас еиԥш иҟоу ахҭысқәа рыӡбахә акырынтә исаҳахьан. "Илбаз иакәӡам дыззааргаз" рҳәон. Ари арыцҳара ианахаз еснагь иразҟыданы срыхәаԥшуан. Акгьы иацәымшәакәа, зразҟы аиқәырхаразы зыҩныҟа ачара аилашымҭазы игьежьуаз рҭоурых сазгәыдуун. Абла гәыӷрақәа ракәзар, уажәгьы иҟоуп, зны-зынла имҩахыҵуеит анкьа иара дзырбаны иааргаз ҭацас дахьыҟоу амӡырхахьы…

Автори аредакциеи ргәаанагарақәа еиқәымшәозар ҟалоит.

 

 

121

Ан лҳақ узгом: иҟалахьоу хҭыск

275
(ирҿыцуп 15:42 19.09.2020)
Sputnik аколумнист Саида Жьиԥҳа иҳацеиҩылшоит ааигәа илаҳаз, акырӡагьы лгәы ианырыз ԥсыуа ҭыԥҳак ллахьынҵа иазку аҭоурых.

Аԥҳәыс лыԥсҭазаараҿы иналыгӡо арольқәа рацәоуп. Ан, анду, аҭаца, аиаҳәшьа, анхәыԥҳа, аицала уҳәа еиқәуԥхьаӡо уалагар, иуҳәаша ыҟоуп. Аха зегь иреиҳау ауалԥшьа – анра аныҟәгара ауп. Иахьа ишәзеиҭасҳәо ахҭыс угәы ҭнашьаауеит. 20 шықәса зхыҵуаз аԥҳәыс қәыԥш лыԥшәма атәымуаа рыгәра ганы лаҳаҭыр дшаӷрагылазгьы, лцәа иалаз ахәыҷы аԥсҭазаара илҭоит. Аамҭа анҵлак лхаҵа уи лҳақ шизымгазгьы ааԥшуеит.

Саида Жьиԥҳа, Sputnik

Аԥсны ахьынӡанаӡааӡо иахьа уажәраанӡа еиқәханы иҟоу ажәытә аԥсуа хыбрақәа ирызкны "Ицәажәо аҭыӡқәа" захьӡу апроект анагӡара снапы аласкит ҩымз раԥхьа. Афотоматериал шеидыскылалак сгәы иҭоуп ахҳәаа ацны альбом аҭыжьра. Уажәтәиала аекспедициа мҩаԥызгеит Аԥсны мраҭашәаратәи ахәҭахьы. Ақыҭақәа жәпакы рҿы нап зыдкылоу реиԥш иқьаԥҭахаз анхамҩақәагьы ыҟоуп. Уажәааигәа Гәдоуҭа араион қыҭак аҟны сылаԥш ақәшәеит ашҭаҟны шәышықәса иреиҳау акәасқьеи, архитектурала иахьатәи ҳаамҭа иақәшәо аҩни шҭагылаз. Араҟа уаҩ дышнымхоз аҟара снырит санынаԥшааԥш, аха уеизгьы агәылацәа сразҵааит аԥшәма дыҟоума ҳәа.

"Мап, схәыҷы, ара уаҩ дахымижьҭеи акыр ҵуеит, аԥшәма дыԥсхьеит. Агәара шәиуп, ибымбои аҳаскьын ахысны ишыҟоу, ҳшәаны арахәгьы ҭаҳҵом", - ҳәа сызҵаара аҭак ҟаҵо, 70-ҟа шықәса зысҭаз ԥҳәыс быргк саԥхьа даагылеит.

"Сыпроект ианаало акәасқьа ҭагылоуп, афото ҭысхыр сҭахын", - ҳәа сыгәҭакы анласҳәа, исабжьалымгеит уахь анеира.

"Еҳ, ара шаҟа лаӷырӡы каҭәахьоу бдыруандаз, агәынқьбжьы иахьагьы слымҳа иҭыҩуеит", - ҳәа лажәабжь дналагеит абырг.

И. (ус лыхьӡыз) лыԥшра, лсахьа уаҩ деилаҳаратәы иҟан. Ақалақь ҭыԥҳа хҩеишьцәа раҳәшьазаҵә лакәын. Хымԥада, лҭаацәа иреиӷьу анасыԥ рҭахын рыхазына лзы. Изныкымкәа Аҟәатәи арԥарацәра ажәа лнырҵарц иалагахьан, аха лара дхыихит зоура-зыҭбаара наӡаз, ԥшралагьы узыгәҭамсуаз, "абз зҿаз" ақыҭа ҷкәын. Азныказы иара лҭаацәа маҳәыс дырҭахымхеит, дара рыдагьы ауа, аҭынха уамашәа избаз рацәаҩхеит "ақалақь ныжьны дабацеи" ҳәа. Арԥыс итәқәа ракәзар "дхысит, аха ишԥа" ҳәа рҭаца илеигәырӷьон. И. ақыҭа дамарахеит: аҩны, адәны цқьаӡа илыман, дчеиџьыкауаҩын. Ажәгьы ахьашьа лҵазаап.

Ачара ашьҭахь шықәсыбжак ааҵуаны, лара усҟан хымз ҵуан лцәалтәымкәа дыҟеижьҭеи, лхаҵа ашәҟәы изааит: "Уҩны иҩнаҵаны иумоу деилкааны дааугазар аума угәаӷьит, иузымдыруазар иуасҳәоит ухы умфарц, уара дуццаанӡа аӡәымкәа, ҩыџьамкәа ахацәа дышрыдырбалахьаз" ҳәа зныз.

"Арҵәааҳәа дшыҳәҳәоз лыхцәы данкны, адәы дықәыжьны, лымгәа шьапыла дҭасуа, дылҿажьцәо, "бара ацәыбза" ҳәа дҟаауа, ааигәа-сигәа инхоз агәылацәа еизигеит. Ажәлар идирҳаит иҟалаз. Лара ахәаша лакәзар, адгьыл лнацәақәа аларԥсны анышә кны, ажәҩан ахь лхы рханы "акагьы шысхарам" ҳәа дқәит. Аха уи заҳауадаз", - дқәыԥсычҳауеит агәалашәара иамҽханакыз аԥҳәыс.

И. лабхәараа ашьыжь ауп лабраа рахь "шәыԥҳа ддәылганы дыжәга" ҳәа аацҳамҭа анырышьҭ. Ауха ари сзабадырыз аԥҳәыс бырг (усҟан еиқәлацәаз ракәын) лыҩныҟа дылгазаап.

"Зылацәа еихьызшьда ауха… Санхәеи сареи лхы аԥырылхыр ҳәа ҳшәаны даҳҷаԥшьон.

Ахаан сгәы иҭыҵуам лан длыҵагыланы данылгоз, лыԥшәма игәараҭахь лхы рханы "имиц асаби шьапыла дисуан, аха иара ианажьра имоукәа дыбзамкәа, дыԥсымкәа адунеи дықәхааит" ҳәа илҳәаз ажәақәа", - лылабжыш аахыҳәҳәаалеит ажәабжьҳәаҩ.

Исаҳаз сгәы ԥнаҽын аҳауа сзымхо салагеит. Анцәа иџьшьаны ааигәа иҵыҵуаз аӡыхь сыԥсы еиқәнархеит.

"И. лгәабзиара ашәарҭара иҭагылан азы Москваҟа дыргоит, уатәи аҳақьымцәа рыбзоурала деибганы аԥа длыхшоит", - ҳәа ахҭыс аиҭаҳәара иацылҵоит абырг.

И. лашьцәа алеишәа џьбара рыман, аха раҳәшьа дшыцқьаз агәра ргон азы лгәы дадмыргеит, раҳәшьаԥагьы рыжәла ирҭеит, "рнапы дықәыргыланы" дырбон. Руаӡәы, И. лшьа иурц рымаҳә иԥынҵа ахьҭаԥиҵәаз азы ҩышықәса аҭакрагьы ихигеит.

Аамҭа ықәҳа ицеит "ашәҟәы еиқәаҵәа" ахыҵхырҭа еилкаамкәа… "Уи илышьҭақәаз рахьтә мап зцәылкыз аӡәы иҩызар ҟалап", - рҳәалон акәымзар.

Хәышықәса рашьҭахь И. лхаҵа ҽаӡәы дааигазаап. Уигьы дқалақьҭыԥҳан, аха лара ақыҭаҿы дшаанымгылоз лҳәахьан. Убри шеимаркуаз, аӡӷаб хәыҷы ирыхшаз жәашықәса анылхыҵ, еилыҵит. Аҵыхәтәаны иқәра неихьаны, хәык изыҟазҵаша иқәлаз аӡәы дааигоит. Ҩбаҟа шықәса ааҵуаны ахԥатәи иԥҳәыс лыԥсҭазаара далҵуеит.

Аԥеи аԥҳаи змаз ахаҵа ихала аҩны даанхеит. Ила ҭраа агәылацәа рахь дымҩахыҵлон игәы ихашҭырц, аха уаҟагьы изыразӡамызт. Ақыҭаҿы ауаа ргәы дацәымӷын.

"Ус ауп ишыҟоу, ихала данаанха дычмазаҩхеит. Дыбзамкәа, дыԥсымкәа аиарҭа дылахеит. Ҳаҭыр зманы иҟаз иуа-иҭынха иԥа иахь ишьҭит иҿаԥхьа аҭамзаара шьҭаиҵарц шиҭаху иарҳәарц. Уи аамҭазы 40 шықәса ирҭагылаз, хҩык ахшара ирабхахьаз ахаҵа, иан лгәаанагара дазҵааны дааит ахаан злакҭа дҭамԥшыцыз иаб иахь. Иҿы зымцәажәо иҷкәын инапы агәыдкылара даҿын ишьамхы арсны. Аԥа, атәым быргк дышрыцҳаишьара еиԥш дизныҟәеит. "Уҽырӷәӷәа" ҳәа наиаҳәаны ашҭа дҭыҵны дцеит", - еиҭалҳәоит агәыла.

Аԥҳәыс лҳақ ззымгаз ахаҵа уи ашьҭахь хара дымнеит. Ари аҩны акәзар, иԥагьы иԥҳагьы ирҭахымхеит. Ранацәа рылаӷырӡ ахькарҭәаз аҭыӡқәа мап рцәыркит.

Еицәаз алахьынҵа иқәнасыргон ари агәаҵәажәпа. Аха сара уи иеиҳа амца сыцразҵо ашәҟәы зҩыз иоуп. Иҟазар адунеи аҿы аиашара, аԥсҭазаара дахьнархәызар ахәҭоуп.

Егьа маӡа ргәылаҵәахуп зфото ҭыхны исымоу аҩнқәа. Аха урҭ ртәы анаҩс…

Автори аредакциеи ргәаанагарақәа еиқәымшәозар ҟалоит.

275

Ҷедиа ачарақәа раанкыларазы: ажәлар ахьцо-иахьаауа рзеилымкаауа иҟалеит

0
(ирҿыцуп 20:13 19.09.2020)
Ачарақәа рура аамҭа ахыгахоит иааиуа амзазы. Ас еиԥш аҭагылазаашьа ачараурҭатә хыбрақәа рыԥшәмацәеи ачара аҿҳәара ԥызҵәахьоу ауааи зҭанаргыло ауадаҩрақәа ртәы арадио Sputnik аефир аҟны еиҭеиҳәеит абанкеттә зал аиҳабы Авҭандил Ҷедиа.
Ҷедиа ачарақәа раанкыларазы: ажәлар ахьцо-иахьаауа рзеилымкаауа иҟалеит

Аҳәынҭқарра ахада Аслан Бжьаниа аусԥҟа ҭижьит "Аԥсны Аҳәынҭқарра ауааԥсыра ргәабзиара акоронавирустә инфекциа COVID-19 ацәыхьчаразы хаз игоу уснагӡатәқәак рышьақәыргыларазы" ҳәа. Аԥкрақәа азинмчы роуеит жьҭаара 5 инаркны. Урҭ инарықәыршәаны, ачарақәа рымҩаԥгара аанкылатәхоит.

"Ашықәс нҵәаанӡа 20-25 чара ҳәа ашәҟәы ианҵаны иҳамоуп. Аԥарагьы ԥароуп, аха ачымазара ыҟазар, аҳәынҭқарра ахада иҭижьыз аусԥҟа ажәлар ацныҟәоит ҳәа ауп ишыздыруа, ус ауп ишеилыскаауа. Ажәлар чмазаҩхар, ирыцҳашьатәуп. Ауаа кредитла аԥара ргеит, ачара иазыԥшын, аха иҟауҵои. Ачара ахьыруа ахыбрақәа рҟны 40-45 рҟынӡа ҽнак иҭыҵуа ауаа аус руеит… Ачарақәа рыҿҳәара ԥҵәоуп. Октиабр азы ашәҟы ианыз сентиабр ахь рҽанырҵар рҭаххеит, агәыҭҟьара иҟоу збоит, аҩашагьы ачарақәа ҟарҵо иалагеит", - иҳәеит Ҷедиа.

Шәазыӡырҩы аудио. Иаҳа инеиҵыху анҵамҭа шәаҳар шәылшоит арадио Sputnik аефир аҟны.

Иара убас шәаԥхьар ҟалоит:

0