Аԥсуа драматә театр асценаҿы. Архивтә фото

Асценатә бызшәеи уи аҭагылазаашьеи

62
(ирҿыцуп 17:25 19.08.2018)
Аԥсуа драматә театр асценаҿынтә иахьа иуаҳауа абызшәа ацқьареи, зеиԥшла ацәажәаратә культуреи иахьа ирҭагылазаашьоу далацәажәоит Sputnik аколумнист Елеонора Коӷониаԥҳа.

Адраматә театр ҳәа изышьҭоу аҿы, актиортә ҟазара инаваргыланы даара акрызҵазкуа акәны иҟоуп асценатә бызшәа.

Атеатртә институтқәа рҿы аҵара зҵоз зегьы ирдыруеит, уи ихадоу маҭәарны ишыҟоу.

Ииашаны, ацәажәара, ауаҩы ииҳәо еилыкка аҟазаара аполитикаҿгьы акыр ихадоуп, ажәытә Бырзентәыла ҿырԥштәыс иаагозар, ацәажәаратә культура акыр иацклаԥшуан, уимоу, еиҳа еиӷьны ақәгылара мҩаԥызго ҳәа еиндаҭлон.

Ацәажәартә культура зехьынџьара ихадоуп, арҵаҩраҿы, ажурналистраҿы уҳәа, зехьынџьара ауаҩы иажәаҳәа еснагь еилыкка иҟазароуп. Аха, иҟоуп занааҭқәак уи зынӡа ихаданы, ада ԥсыхәа амамкәаны иахьыҟоу, убарҭ ируакуп актиортә ҟазара, иара убри азоуп, ари азанааҭ азы аҵара здырҵо, ражәаҳәатә ҭагылазаашьа икылкааны изацклаԥшуа.

Сара ибзианы сырхаануп, аԥcуа театр акорифеицәа ҳәа изышьҭаз Минадора Зыхәԥҳа, Леуарса Касланӡиа реиԥш иҟоу, урҭ инарыгӡоз ррольқәа инарываргыланы, рцәажәашьа, уи иацырҵоз аинтонациа уҳәа рыла, ахәаԥшҩы дхырхуан.

Асовет аамҭазы, аԥсшәа бзианы иззымдыруаз, мамазаргьы, зажәаҳәа аԥықәслара амаз атеатртә институт аҭаларазы рымҩа аркын, избанзар, асценатә бызшәа актиортә ҟазараҿы, ароль анагӡараҿы зда ԥсыхәа амам ирхыԥхьаӡалоуп.

Исгәалашәом аԥсуа театр аҿы збызшәеи зцәажәашьеи хьысҳаз, иҟазаргьы — ароль хадақәа, ароль уадаҩқәа рааигәара анеира рцәыуадаҩын. Аԥсшәа азымдырреи, ииашамкәа ацәажәареи гәаҳҭо ҳалагеит аибашьра ашьҭахь атеатр азы аҭыԥан иазыҟарҵо, мамзаргьы Урыстәылаҟа аҵарахьы ирышьҭуа ианалага ашьҭахь. Уи убоит аспектакльқәа уанырҭаауа.

Абарҭқәа рыдагьы, ибзиаӡаны абызшәа здыруагьы, рцәажәашьа аҽеиҭанакуа иалагеит, ирҳәо умаҳауа, аспектакль ахы инаркны аҵыхәанӡа ауҟьанчаҟьанбжьы астиль ала асценаҿы ацәажәаратә культуара шыҿио гәаҳҭо ҳалагеит.

Иаҳбоит иара убас, иахьатәи аԥсуа театр иаҵагылаз аҿар, рбызшәа аԥықәслара дуи, абызшәа ахаҭа ихьысҳаны адырреи шырныԥшуа. Ас иҟалазар, хымԥада арҵаратә процесс аҿы, ари амаҭәар хырҩа азун, уи адагьы, атеатртә занааҭ азы аҿар аналырхуа рбызшәа аҩаӡара иацклаԥшуамызт ауп иҟалаз.

Сантк-Петербурги Москвеи аҵара зҵоз рахьтә инеибеиԥшны зегьы аԥсшәа ишахәҭоу ирыздыруам, уи атәы рҳәоит дара аҵара дзырҵоз арҵаҩцәагьы.

Аԥсуа театр азы аҿар ахьазыҟарҵоз Б. Шьукин ихьӡ зху атеатртә институт аректор Евгени Книазев Аԥсны ахада даниԥылоз иазгәеиҭахьан, уа аҵара зҵо зегь аԥсшәа шырзымдыруа, уи азы ҷыдала арҵаҩы дшырҭаху. Уи шьақәнарӷәӷәоит С. Ҷанба ихьӡ зху атеатр азы ишьҭыз астудентцәа арахь ианыгьежьуаз урысшәала аспектакль ахьықәдыргылаз.

Аспектакль "Софичка" (Ф Искандер иҩымҭа, ақәыргылаҩ — Е. Одинцова) иаҳнарбеит ихәмаруаз аҿар рыбжьара ибзианы аԥсшәа здыруа шыҟоу еиԥш, иззымҳәозгьы шалаз, иара абасҵәҟьоуп аҭагылазаашьа шыҟоу Санкт-Петербург иалгаз аҿар рыбжьарагьы.

Араҟа, авба заҳҭар зылшо ианцоз иалзыԥшаауаз роуп. Аибашьра ҟалаанӡа аԥсуа ҿар Қарҭтәи атеатртә институт ахь ирышьҭуан, иалганы ианаауазгьы рдимпломтә спектакльқәа ԥсышәала акәын ишықәдыргылоз, уи азы уаҟа асценатә бызшәазы ацхыраара ҟазҵоз арҵаҩы дыҟан, насгьы ирышьҭуаз зегьы шамаха абызшәа бзиаӡаны ирдыруан.

Ҳазҭагылоу аамҭазы атеатртә ҟазара акыр аҽышьҭнахуа иалагеит, Аҟәа иҟоу атеарқәа уажәы-уажә апремиерақәа ҳадыргалоит, ахәаԥшцәагьы маҷ-маҷ атеатртә культура иаднаԥхьало иҟалеит, аха хаҭала гәадурас иҳамоу аԥсуа театр аҩаӡара ҳазхәыцуазар, актиорцәа бзиақәа рыла еиҵаҩҩы иҟоуп уҳәаратәы ишыҟоугьы, асцентә бызшәазы ахьысҳара ду анаҳбаалоит.

Зегь раԥхьаӡа игыланы ахәаԥшҩы лаҳасабала иазгәасҭарц сҭахуп, атеатр аремонт аныҟарҵа ашьҭахь, абжьныҩра шхьысҳахаз, ибзианы ицәажәо актиоргьы ибжьы атеатр апартери, хыхьтәи аиарусқәа рҿы итәои ишақәнаго ирызнеиуам, убарҭқәа рнаҩсан, исҳәарц сылшоит ҳтеатр анкьа иамаз асцентә бызшәа аҩаӡара лаҟәит ҳәа.

Агәаҭара уадаҩым актиорцәа ҿарацәа абжьықәыӷәӷәарақәа ииашаны ишыҟарымҵо, насгьы инеибеиԥшны аӷьра зцу аинтонациа шьҭырхит аԥышәа змоу актиорцәагьы.

Актиор ииҳәогьы, инеиааирагьы еилаӡҩазароуп, ароль анагӡараҿы абызшәатә пластикеи ацәеижьи гармониала еилысуазароуп, усҟаноуп асценаҟынтә иубо ахәмарра агәра ануго.

Ҟалашьа амаӡам, аперсонаж аспекатакль ахы инаркны аҵыхәанӡа аӷьра амотив ала дымҩасуа. Згәы иалсуа дҟаларгьы, аԥсышәала аус зуа атеатрқәа рҿы иазхьаԥшроуп асценатә бызшәа, избанзар, адрамтә театри абызшәеи еиҟәыҭхашьа рымам. Аабыкьа аԥсуа театраҿ сахәаԥшуан С. Мрожек иҩымҭала иқәыргылоу аспектакль "Шьапыла"(ареж. В. Ақаҩба). Аспектакль режиссиортә концепциала ишеиқәыршәогьы, атема ахаҭа акыр ишаҳзааигәоугьы, ахәаԥшҩы лаҳасабала еилыкка зыбжьы саҳауаз актриса Т. Гамгиаԥҳа лоуп, егьырҭ асцена иқәыз рӷьырак ирҳәоз аилкаара уадаҩын, избанзар, абызшәатә хықәкы иақәнагоу ала аус азуым, еиҭасҳәоит, аӷьра зцу, еилыргашьа змам мотивла иааҩуеит азал ахь актиорцәа ражәа.

Аԥсуа театр егьырҭ аспектакльқәагьы ирныԥшуеит абызшәатә хьысҳарақәа, Г. Лорка "Бенард Альба лыҩны"(ареж. М. Аргәынԥҳа) захьӡу аҿы ихәмаруа аҿар рацәаҩуп, араҟагьы урҭ ражәа ԥсабаратәым, иубоит уи аганхь имаҷны рхы аус шадыруло. Аиҳабыратәи абиԥара иаҵанкуа актиорцәа рахьтә, ҿырԥштәыс иаагозар Ц. Инаԥшьԥҳа, И. Арухаа рбызшәагьы бзиоуп, ирҳәогьы еилыкка иуаҳауеит.

Алкаа ҟаҳҵозар, аԥсуа театр иахьа иамоу абызшәатә уадаҩрақәа егьырҭ азанааҭқәагьы ирныԥшуеит, уахьынаԥшааԥшуа иубоит ииашамкәа иҩу ажәақәа, ииашамкәа иҳәоу ашьҭыбжьқәа. Ус иҟазаауеит аԥсуаа ҳбызшәатә хдырра шьҭыҵаанӡа.

62

Аҟәантәи Калдахәаранӡа, ма акоронавирус агәра гара шаҳҭахым

232
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

232

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

39
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

39

Аԥсны 68-ҩык аҿкы рыдырбалеит, ҩыџьа рыԥсҭазаара иалҵит

11
(ирҿыцуп 20:10 29.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4126-ҩык ыҟоуп. Урҭ рахьтә ргәы бзиахеит 2170-ҩык, рыԥсҭазаара иалҵит 38-ҩык.

АҞӘА, жьҭаара 29 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 427 ҟаҵан, урҭ рахьтә акоронавирус аарԥшын 68 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Аоперштаб иара убас иаанацҳаит жьҭаара 29 рзы Гәдоуҭатәи агоспиталь аҿы лыԥсҭазаара дшалҵыз 1976 шықәсазы ииз апациент. Лара ахәышәтәырҭа дҭашәеит жьҭаарамза 13, лыԥсыԥ лагаҩагара акыр илцәыцәгьаны, ҩганктәи агәыҵәкра лыманы. Иақәнагаз атерапиа шлзымҩаԥыргозгьы, жьҭаара 29 рзы лдунеи лыԥсахит.

Жьҭаара 29 рзы рзы иԥсыԥ лагаҩагара акыр ицәыцәгьаны, ҩганктәи агәыҵәкра иманы аҟәатәи амобильә госпиталь аҟны ишьҭаз апациент иԥсҭазаара далҵит, иақәнагаз атерапиа шизымҩаԥыргозгьы.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 135-ҩык ауааԥсыра, урҭ рахьтә 113-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 29-ҩык, ибжьаратәуп - 36-ҩык, илҩаауп 13-ҩык апациентцәа. Гәдоуҭатәи агоспиталь иҭашәеит 11-ҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 55-ҩык апациентцәа. 51-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

11
Атемақәа:
Ачымазара ҿкы – акоронавирус Аԥсни адунеи аҿи: иалкаау