Аԥарда

Ар ирнымиац - дхаҵа ӷәӷәоуп: атеатртә критика аҟамзаара ахҟьаԥҟьақәа

116
(ирҿыцуп 11:45 06.10.2018)
Иахьатәи аҟазареи арҿиаратә уси акритика ахьрыгу ицәырнаго ауадаҩрақәа дырзааҭгылеит Sputnik аколумнист Елеонора Коӷониа.

Аибашьра ашьҭахьтәи ҳаԥсҭазаараҿы, алитература, атеатр уҳәа, аҟазара аганахь ицәырҵуа ахырхарҭақәа зегьы аналитикатә, акритикатә бла рыгуп.

Елеонора Коӷониаԥҳа: Ар ирнымиац - дхаҵа ӷәӷәоуп: атеатртә критика аҟамзаара ахҟьаԥҟьақәа

 

Иҳаҩсхьоу асовет аамҭазы, уи ахырхарҭа аҭыԥ аман, иҭыҵуаз ажурналқәеи агазеҭқәеи рҿы, ицәырҵуан аҟазараҭҵааҩцәа, алитературадырҩцәа уҳәа, акультура ахцәажәара зылшоз ауаа ргәаанагарақәа. Аибашьра анеилга, ари аҭыԥ ҭацәны инхеит, ганкахьала ицәырымҵит ари азанааҭ ала аԥсуа специалистцәа, даҽа ганкахьала иҳамазгьы иаԥсамшәа рбазар акәхап уи аҽазкра, абарҭқәа ирыхҟьаны акритика аҭыԥ ҭацәны иаанхеит.

Здунеи зыԥсаххьоу алитературатә критик Владимир Аҵнариа ианҵамҭақәа рҿы иазгәеиҭахьан "ҳара ҳаибадырра, ҳаиуара" уҳәа ирыхҟьаны ари ажанр лҵшәа дук шамамыз, избанзар, хаҭала акритик ииҩуаз адкылара рцәыуадаҩын уи зызкыз. Абас акәзаргьы, асовет аамҭазы ҳмаџьанамызт акритиказы, иахьатәи аамҭа иаҿҳарԥшуазар. Акультуратә ԥсҭазаара изырҽхәо рыда, иагу-иабзоу азгәазҭо даныҟамла, зегь иааҟаҳҵо игениалтәу цәырҵраны иаҳбо ҳааҟалеит.

Ажәакала, иахьа сыззаҭгыло атеатртә критикагьы ахабар ыҟам, уи азы иазыҟаҵоу, атәы здыруа Светлана Қорсаиаԥҳа дшыҟоугьы. Зыӡбахә сымоу атеатрҭҵааҩ илымоуп иҷыдоу аҵара, аԥышәа, акыр шықәса аус луахьан ажурнал "Аԥсны аҟазара" аҿы, аха иахьазы уи дацәхьаҵны дыҟоуп ҳҳәар ауеит, акультура дшацәыхарамгьы. Атеатрҭҵааҩ лыбла иамбо иҟам иахьатәи атеатртә ԥсҭазаара иахаҿроу, аха абзырӡы аҳәарада, акритика аацәырылгар "алаба лықәрыԥсоит", убри аҟынтә, иахьа атеатртә ԥсҭазаара ҽхәаԥхьыӡ мацарала имҩасуеит.

Ар ирнымиац дхаҵа ӷәӷәоуп рҳәоит. Ихьыԥшым, еиуиеиԥшым адунеитә театрқәа зыбла иабахьоу актритик ҳара ҳтеатрқәа ахҳәаа зларимҭац ала, дара ргәы иалаҭхаџьуа аус руеит уаҩ иимбац ҩаӡара дук рымоушәа. Аспектакльқәа зықәдыргыло атеатр ҭызҵаауеи, аҟазара ибзианы еилызкаауеи рзы мацара акәӡам, атеатр зегьы ирызкуп, иазыҟаҵоуи иазыҟаҵами ахәаԥшыҩцәа налаҵаны. Аибашьра ашьҭахьтәи ҳаԥсҭазаарҿы, ҳахәаԥшҩы дныҵыҵны иара Урыстәыла мацара акәзаргьы, атеатртә хырхарҭақәа ргәаҭаразы алшара злаимам ала, зыхә ишьо абра иибо мацара ауп. Атеатр аилкааразы иаҭахуп азыҟаҵара, иацу акәамаҵамақәа рнырра зегьы ирылшом. Убарҭқәа ирыхҟьаны, аспектакль ҿыц анцәырҵлак, ауацәеи аҭынхацәеи, аҩызцәеи Феисбук адаҟьаҿы еибарҽхәоит, избанзар, ҳтеатрқәа зыбла ҵару акритик инымиац. Ар ирнымиац ихьыз рыхьит даргьы. Атеатр ибзианы еилызкаауа ыҟоуп, аха урҭгьы шаҭара руеит, иаахтны ирыгу аӡәгьы иҳәом.

Иахьа аамҭа маншәалоуп, уара иқәургыло уара иурҽхәалар ауеит, иҟам анкьа иҟаз аспектакльқәа реилыргара, ибжьаӡит, аспекталь ҭыҵаанӡа апрофессионалцәа адгаланы ахцәажәара, абри агуп, абри ԥсахтәуп ҳәа азгәаҭақәа ҟаҵаны атеатр анапы злаку аспектакль анаҩс аус адулара. Аспектакль асахьаркыратә еилазаара иаднакылаанӡа афишақәа кыдҵаны, аӡыргара мҩаԥыргоит. Сара ацензура бзиа избом, уи асовет аамҭазы аҭыԥ аман, аха иахьа арҿиамҭа абырҵкал икылызхуа дахьыҟам иахҟьаны, зны-зынла зыҩаӡара лаҟәу аспектакльқәа шедеврушәа дара авторцәа аналацәажәо ыҟоуп, ирымазкуа акритик дахьыҟам азы.

Аабыкьа аԥсуа драматә театр ахаҭарнакцәа Аԥсны аҿар ртеатр арҿиаразы акритикатә ҟазшьа змаз ажәақәа "дыршәит". Ари гәалсрыла ирыдыркылеит изызкыз. Сара шәсазҵаауазар, аҩ-театркгьы русумҭақәа иобиективтәу анализ аӡәгьы ирзимуц, убри аҟынтә, аџьеибашьара иашам. Ар ирнымиац дхаҵа ӷәӷәоуп, ишаҳдыруа еиԥш. Аҩ-театркгьы ирымоуп арепертуар, ахәаԥшҩы алшара имоуп зегь рыхәаԥшра, аха аҽхәаԥхьыӡ ада, аналитика аҟамзаара иахҟьаны, ҳара ҳахәаԥшҩы игьама шьақәҟьар алшоит. Аҟазара лассы-лассы аҽеиҭанакуеит, убри аҟынтә, иаҭахуп аҽахьыгӡара, уҽахьыугӡарц азы, есыҽны аҵара уҵалароуп. Ари зыҩуа схаҭа, абра Русдрам аҿы Урыстәылантәи иаарго акгьы бжьасыжьыр сҭахым, избанзар, исымам алшара ианысҭаху сцаны атеатрқәа рахь аныҟәара. Ус акәзаргьы, анкьа атеатртә институт иснаҭаз агәҟәышра сзынханы сыҟоуп, сацклаԥшуеит ҳтеатрқәа рыҿиашьа, исныруеит ирыгу, мамзаргьы ирыбзоу.

Хымԥада, С.Ҷанба ихьӡ зху атеатр аԥышәа ду амоуп, уаҟа аус руеит арежиссиор изанааҭ змоу ауаа, аҿар ртеатр акәзар, иқәыԥшуп, дамам ахатәы режиссиор, ақәыргыламҭақәа ҟазҵо актиорцәа роуп, атеатр ианубаалоит арежиссиортә концепциа аҟамзаара. Ус акәзаргьы, ақәыԥшцәа ртеатраҿ иҟоуп абарҭ актиорцәа бзиақәоуп ҳәа ззуҳәаша, урҭ ирхысыԥхьаӡалоит: Мдар Сақаниа, Аслан Анқәаб, Алиас Аҩӡба, иара убас, абжьаратәи абиԥара иаҵанкуа Марина Арсҭааԥҳа. Ахәаԥшҩы азин имоуп агәаанагара аҳәара, убри аҟынтә, аҿар ртеатраҿ избахьоу рахьтә, исҳәарц сылшоит Шь. Гыцба иқәыргыламаҭа "Амцҳәаҩ даҭахуп" (Д. Псафос ипиеса ала) актуалра шамоу, ароль хадақәа назыгӡо актиорцәагьы ахәаԥшҩы игәаҿы ишынхо, идырҿио акомедиа ала. Аха, иааидкыланы ари атеатр хәаԥшҩык лаҳасабала азеиӷьшьара азыҟасҵозар, арежиссиор даҭахуп ҳәа сҳәарц сылшоит.

Аҿар ртеатр аганахь акритика аазышьҭыз аԥсуа театр ахаҭарнакцәа ракәзар, дара ртеатр аҿгьы ибзиоу шыҟоу еиԥш, иагу ыҟоуп. Аԥсуа театр аҿы абызшәа ахьысҳара ду аныԥшуеит, уи акыр изыцклаԥштәу акәны иҟоуп уаанӡатәи санҵамҭақәа рҿы ишазгәасҭахьоу еиԥш. Арежиссиор Валери Ақаҩба иакәзар, акырынтә акритика изыскхьеит, иара данахагылаз жәларык актиорцәа атеатр иахьалицаз азы. Ииашоуп, уи азы арежиссиор ацҳәа аҳәара даламгеит, аҳәынҭқаррагьы лахь дук инамҭеит, идиректорра аҟынтә 20-ҟа шықәса анҵы ихы дақәиҭыртәит ҳамҳәозар. Испектакльқәа сырзааҭгылозар, даара ауаҟьанчаҟьанбжьы рыцуп, иара ирежиссиортә цәаҳәақәа иактиорцәа механикатә ҟазшьала иахысуеит, инарыгӡо ауаҩы ихаҿра аҽҭагӡара аасҭа. Дубоит арежиссиор, актиор ихаҭара еизадоу аҟазшьа амоуп. Ақаҩба изааигәоуи иареи, ахарҽхәаразгьы хар рымаӡам, избанзар, дара зацлабуа Нхыҵ-Кавказтәи атеатрқәа раасҭа дара ҩаӡарала еиҳауп.

Аԥсуа театргьы, аҿар ртеатргьы Чехов ихьӡ зху атеатртә фестиваль аҿы иаиааины ианаалак, насоуп аҳәатәы ду анроуа. Дасу зегьы гьамак-гьамак рымоуп, аԥсуа театраҿ аус зуа арежиссиор Мадина Аргәын лықәыргыламҭақәа ирнызбаалоит сгәы зырԥхо ҟазшьак, лыспектакльқәа рҿы арежиссиор дшубо еиԥш, иубоит актиорцәа рхаҭарагьы. Ас иҟоу атеатр сара еиҳа исзааигәоуп.

Абри зегь зхысҳәаауа, акритика ацәгәаара аҭыԥан, изҳәаз дазусҭазаалак, ҳара ҳтеатрқәа иҭабуп ҳәа иарҳәалароуп. Агәаанагара профессионалтә бызшәала аҭак ҟауҵар ауеит, аҳәынҵәеигәыдҭәалара аҽаҭара аҭыԥан. Арҽхәара еиҳа бзиа избо аҟазараҿы аизҳара ицәыуадаҩхоит.

Санҿаз зны саԥхьахьан, Станиславски иҽӡаны атеатртә гәыԥқәа рҿы дшықәгылоз дақәызкыз иаб Алексеи иажәақәа: "Уара, сыҷкәын, атеатр аҿы умыхәмарыр ада ԥсыхәа умамзар, ма иеиҿкаау агьама бзиа змоу атеатртә гәыԥ уҽадкыл". Ари зысгәалашәаз, агьама бзиа акыр иаԥсоуп, агьама ҟаларц азы, иаҭахуп ахәаԥшҩы бзиа иааӡара.

116

Аҟәантәи Калдахәаранӡа, ма акоронавирус агәра гара шаҳҭахым

233
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

233

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

39
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

39

Аԥсны 68-ҩык аҿкы рыдырбалеит, ҩыџьа рыԥсҭазаара иалҵит

11
(ирҿыцуп 20:10 29.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4126-ҩык ыҟоуп. Урҭ рахьтә ргәы бзиахеит 2170-ҩык, рыԥсҭазаара иалҵит 38-ҩык.

АҞӘА, жьҭаара 29 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 427 ҟаҵан, урҭ рахьтә акоронавирус аарԥшын 68 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Аоперштаб иара убас иаанацҳаит жьҭаара 29 рзы Гәдоуҭатәи агоспиталь аҿы лыԥсҭазаара дшалҵыз 1976 шықәсазы ииз апациент. Лара ахәышәтәырҭа дҭашәеит жьҭаарамза 13, лыԥсыԥ лагаҩагара акыр илцәыцәгьаны, ҩганктәи агәыҵәкра лыманы. Иақәнагаз атерапиа шлзымҩаԥыргозгьы, жьҭаара 29 рзы лдунеи лыԥсахит.

Жьҭаара 29 рзы рзы иԥсыԥ лагаҩагара акыр ицәыцәгьаны, ҩганктәи агәыҵәкра иманы аҟәатәи амобильә госпиталь аҟны ишьҭаз апациент иԥсҭазаара далҵит, иақәнагаз атерапиа шизымҩаԥыргозгьы.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 135-ҩык ауааԥсыра, урҭ рахьтә 113-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 29-ҩык, ибжьаратәуп - 36-ҩык, илҩаауп 13-ҩык апациентцәа. Гәдоуҭатәи агоспиталь иҭашәеит 11-ҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 55-ҩык апациентцәа. 51-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

11
Атемақәа:
Ачымазара ҿкы – акоронавирус Аԥсни адунеи аҿи: иалкаау