Творческий вечер Дмитрия Габелия

Алашарахь амҩа иқәу: апоет Дырмит Габалиа ирҿиаратә хәылԥазы мҩаԥысит

132
"Алашарахь амҩа сықәуп" ҳәа хьӡыс измаз апоет Дырмит Габалиа ихәылԥаз хәышықәсатәи ирҿиара аихшьаала азыҟанаҵеит. Иара шьақәгылан ҩ-хәҭакны: аграждантә лирикеи абзиабаратә лирикеи рыла. Насгьы ари ахәылԥаз иаиуит даҽакы иаламҩашьо ахатәы ҟазшьа ҷыда.

Аинар Ҷыҭанаа, Sputnik

Ахы умҳәакәа аҵыхәа узҳәом

Арҿиаҩы изы ихымԥадатәиуп лассы-лассы аԥсабара аҽамадара, уи агәеисыбжь акалам аԥынҵа арҳәара. Дырмитгьы ихәыцрақәа рыкьҭаԥ аатырц азы амшын аԥшаҳәаҿы днеиааилоит. Уи аамҭазы иара ицзаара, ихәыцра изцәырнаго ажәақәа рзыӡырҩра акыр иаԥсоуп. Саргьы ари апоет ирҿиаратә дунеи иазҿлымҳау сыруаӡәкны схы сыԥхьаӡоит.

Убас, ҽнак иареи сареи каҳуак еицаҳжәырц "Брехаловка" ҳанаҭаа, исыцеиҩишеит иаарласны зынагӡара иҭахыз игәҭакы. "Хәышықәса ирҭаӡаз сцәаҳәақәа аԥхьаҩ иҭаны сгәы сырҭынчыр сҭахуп" иҳәеит иара усҟан. Ахәылԥаз мҩаԥигарц шиҭаху ансаҳа, иаразнак издырит иара даҽакы иаламҩашьо ахатәы цәаҩа шаиуаз. Зны-зынла ажәеи ауси анеивнаго ҟалалоит. Аха Дырмит Габалиа арҿиараҿы адагьы аиҿкаара аус аҟынгьы абаҩхатәра ҳаракы аарԥшра илшеит. Избан акәзар усҟан исзеиҭеиҳәаз асценарии ахәылԥаз аҟны исбази ҩ-цәыкәбарк реиԥш еиԥшын.

Ҩ-хәдакәыршак рыгәҭаны

Арҿиаҩы ихәылԥаз ҳаналацәажәо, еиҳаракгьы аҵыхәтәантәи аамҭазы, раԥхьаӡа ҳхаҿы иааиуеит инымҵәаӡо ажәахәқәа, ихырҟьацәоу аибарҽхәара, ажәакала "хазына-мазына" асистема. Ари аформа ахаан ԥсра-ӡра зқәым акакәны иахәаԥшуа рацәаҩӡоуп, уи аҿагылара иаԥсам ҳәа згәы иаанагогьы маҷҩым. Аха Дырмит ҭоурыхла ишьақәгылаз "аԥҟарақәа" реилагара дацәымшәаӡеит, иагьилиршеит ари "аихатәы ԥарда" аҩахара. Иара иаԥиҵаз апоезиатә гәалаҟара, арыцҳара аҟнытә, арҿиаратә уснагӡатәқәа рҟны иахьа лассы-лассы иаҳԥымлозар ҟалап.

Ауада хәыҷы агәҭаны игылаз "акарандашь ҟәардә" ҭагалан шахьӡаз мҩашьо иаакәыршаны абӷьы каԥсан. Аҟәардә аҿаԥхьашәа ашәҭ ҟаԥшьқәа улаԥш нарықәшәон. Урҭ уа баша иргыламызт. Апоетгьы ари аԥсабарахь данцәырҵуаз ахәдакәырша (шарф- аред.) ҟаԥш ихәда иакәыршан. Ауха ицәыригоз ипоезиа актәи ахәҭа граждантә лирикан аҟнытә, аԥшшәы ҟаԥшь зсимволызгьы апоет иԥсҭазааратә хәаԥшышьеи "иақәшаҳаҭымхареи" ракәын. Уи аӡбахә ала апоет иажәа анхациркуаз еиҭеиҳәеит раԥхьаӡатәи иақәшаҳаҭымхара шыҟалаз.

 

Творческий вечер Дмитрия Габелия
© Sputnik / Томас Тхайцук
Творческий вечер Дмитрия Габелия

9-тәи акласс аҟны итәаз Дима гәыԥҩык ашколхәыҷқәа еизиган, аурокқәа ныжьны адиректор ихаҭыԥуаҩ лахь агәынамӡара аарԥшра еиҿикааит. Апоет излеигәалаиршәо ала ари "амитинг" зхы алазырхәыз аҵаҩцәа рхыԥхьаӡарагьы ҟәнумшьартә аҟынӡа инаӡеит. "Ахақәиҭра азықәԥаҩцәа" азныказы ираҳаз аидеиа иацдырӷызит. Аха иахьдырхәуа ианалага, рҿы рықәшаҳаҭхан, зегьы азыҟазҵаз иахь лассы рнацәкьарақәа дырхазаап. Дырмит иахьа ари аҭоурых анигәалаиршәоз аччаԥшь иҿықәын.

Апоет ирҿиамҭақәа дрыԥхьонаҵы иааигәа дыҟан ицәаҳәақәа риира иасимволыз и-Муза. Лара зны дхарахон, даҽазны дааигәахон, ихалырҭәаауан ҩнуҵҟала еибарххоз арҿиаҩы ихаҿсахьа. Анапеинҟьабжьқәа рыла иубарҭан, апоет аки-аки еишьҭаргыланы иҭирҟьоз "ахқәа" ахәаԥшҩы игәаҵанӡа ишынаӡоз. Абасала, аграждантә поезиа ахәҭа хәыҷы-хәыҷла ихыркәшахеит.

Перутәи амузыкеи аԥсуа поезиеи

Убри аамҭазы иаарԥшхеит ари ахәылԥаз иамаз даҽа ҷыдарак: апоет абзиабаратә лирика ахәҭахьы диасаанӡа иҟаҵан амузыкатә ааҭгылара. Перунтәи иааз агитарарҳәаҩы Виктор Васкес ихароу атәыла аккордқәа игонаҵы, Дырмит Габалиа абзиабара азышәаҳәара иҽазирхион. Виктор игитарабжьи Дырмит ицәаҳәақәеи аки-аки цәгьалаҵәҟьа еинаалон, иааџьоушьартәгьы еиқәҿырҭуан. Аха уи зџьашьатәуи? Аҟазара милаҭ еилых аздырӡом, зегьынџьара ишҟазароу инхоит.

Дырмит Габалиа абзиабаратә лирика данаԥхьоз ихәда иахаз ахәдакәырша аваза иҭагылаз ашәҭқәеи рыԥшшәы аҽеиҭанакит: уажәшьҭа урҭ шкәакәан. Ҵабыргыҵәҟьаны, ацқьара зхьыкәкәо ари аԥштәы аҟара абзиабара аӡбахә зҳәо даҽа ԥшшәык аԥшаара уадаҩуп. Убри аҟнытә апоет аԥшшәқәа реилыԥшаараҿгьы арҿиаратә гәалаҟара еиҳа ишанаалашаз ала ахҭа иҭаиршәит ҳҳәар ҟалоит.

Иҳәатәуп, Дырмит Габалиа ирҿиаратә хәылԥазы ахь ааԥхьара зиҭаз уамак ишырацәаҩымыз: иара иажәақәа рыла ҭаацәашәалатәи аицәажәара акәын хықәкы хадас имаз. Еизаз ракәзар, еицҿакны излазгәарҭоз ала ҳзышьцылахьоу арҿиаратә усмҩаԥгатәқәа иреиԥшымхеит Дырмит иԥылара. Насгьы агәыӷра ду аадырԥшит уажәшьҭарнахыс зегьы ари аҿырԥштәы шьҭыркаап ҳәа.

Ахәылԥаз хыркәшан абарҭ ацәаҳәақәа рыла:

Сара исхыҵуа здыруа мҩасхьеит,

Сԥеиԥш здыруагь наскьахьеит.

Зны аамҭа ашьыҵәрақәа сыгәҭасхьеит,

Ҽазны сгәы аԥжәара иахьӡахьеит.

Шьҭа амца сыҵоуп, сзыргәаҭеиуа,

Амцаԥшь сақәгылан скәашоит.

Ацԥхьқәа срыцлан сшыԥеиԥеиуа,

Гәыразрак самцахарц сеикәшоит.

 

132

Аҟәантәи Калдахәаранӡа, ма акоронавирус агәра гара шаҳҭахым

231
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

231

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

39
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

39

Аԥсны 68-ҩык аҿкы рыдырбалеит, ҩыџьа рыԥсҭазаара иалҵит

11
(ирҿыцуп 20:10 29.10.2020)
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4126-ҩык ыҟоуп. Урҭ рахьтә ргәы бзиахеит 2170-ҩык, рыԥсҭазаара иалҵит 38-ҩык.

АҞӘА, жьҭаара 29 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 427 ҟаҵан, урҭ рахьтә акоронавирус аарԥшын 68 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Аоперштаб иара убас иаанацҳаит жьҭаара 29 рзы Гәдоуҭатәи агоспиталь аҿы лыԥсҭазаара дшалҵыз 1976 шықәсазы ииз апациент. Лара ахәышәтәырҭа дҭашәеит жьҭаарамза 13, лыԥсыԥ лагаҩагара акыр илцәыцәгьаны, ҩганктәи агәыҵәкра лыманы. Иақәнагаз атерапиа шлзымҩаԥыргозгьы, жьҭаара 29 рзы лдунеи лыԥсахит.

Жьҭаара 29 рзы рзы иԥсыԥ лагаҩагара акыр ицәыцәгьаны, ҩганктәи агәыҵәкра иманы аҟәатәи амобильә госпиталь аҟны ишьҭаз апациент иԥсҭазаара далҵит, иақәнагаз атерапиа шизымҩаԥыргозгьы.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 135-ҩык ауааԥсыра, урҭ рахьтә 113-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 29-ҩык, ибжьаратәуп - 36-ҩык, илҩаауп 13-ҩык апациентцәа. Гәдоуҭатәи агоспиталь иҭашәеит 11-ҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 55-ҩык апациентцәа. 51-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

11
Атемақәа:
Ачымазара ҿкы – акоронавирус Аԥсни адунеи аҿи: иалкаау