апоет Таиф Аџьба имшынҵа Ԥшӡала иаҳзырша иалху аспектакль

Досу ианиашьа ихаҵашьоуп

181
(ирҿыцуп 15:03 13.04.2019)
Хабарда ибжьаӡыз апоет Таиф Аџьба имшынҵа "Ԥшӡала иаҳзырша" иалху, арежиссиор Мадина Аргәынԥҳа иқәлыргылаз аспектакль илзыннажьыз лцәаныррақәа ртәы дырзааҭгылоит Sputnik аколумнист Елеонора Коӷониаԥҳа.

Аԥсуа ҳәынҭқарратә драматә театр дырҩагьых аԥарда аатит. Мшаԥымза 11, 12 рзы имҩаԥысит хабарда ибжьаӡыз апоет Таиф Аџьба имшынҵа "Ԥшӡала иаҳзырша" иалху, арежиссиор Мадина Аргәынԥҳа иқәлыргылаз аспектакль апремиера.

Ишдыру еиԥш, амшынҵа шьақәгылоуп иԥиоу ажәаҳәала, араҟа иҟаӡам аиҿцәажәара, адраматургиа злеибыҭоу ихадоу амарҭхәқәа. Даара иуадаҩу усуп, ус еиԥш иҟоу адокумент атеатр азы арҿиамҭа алхра. Асценарист Занда Какалиаԥҳа абри аус хьанҭа лнапы иҵылхит, иалкааны аӡәгьы дӡыримгазаргьы. Аинсценировка иалагалан амшынҵаҿы иҟамыз, аха заа ицәа ианырны апоет ииҩхьаз, иахьатәи ҳаԥсҭазаара ахаҿра аазырԥшуа ажәеинраалақәа. Иҟалап урҭ рыдагьы, аспектакль харҭәааны изыҟамларгьы. Апоет аибашьра анцоз ииҩуаз амшынҵа, ҳара ҳаибашьра иаҭоурыхуп, убри аҟынтә Таиф ихаҭа ишиҳәаз еиԥш "аҭоурых ҭоурыхуп, ишыҟоу ианҵатәуп". Араҟа аинсценировка автори арежиссиори апоет итекстқәа ирывымсит, иалагало Ҭамара Шьаҟрылԥҳа лмонолог заҵәык ада.

  • апоет Таиф Аџьба имшынҵа Ԥшӡала иаҳзырша иалху аспектакль
    апоет Таиф Аџьба имшынҵа "Ԥшӡала иаҳзырша" иалху аспектакль
    © Sputnik / Томас Тхайцук
  • апоет Таиф Аџьба имшынҵа Ԥшӡала иаҳзырша иалху аспектакль
    апоет Таиф Аџьба имшынҵа "Ԥшӡала иаҳзырша" иалху аспектакль
    © Sputnik / Томас Тхайцук
  • апоет Таиф Аџьба имшынҵа Ԥшӡала иаҳзырша иалху аспектакль
    апоет Таиф Аџьба имшынҵа "Ԥшӡала иаҳзырша" иалху аспектакль
    © Sputnik / Томас Тхайцук
1 / 3
© Sputnik / Томас Тхайцук
апоет Таиф Аџьба имшынҵа "Ԥшӡала иаҳзырша" иалху аспектакль

 

Избазеи сызхәаԥшуаз аспектакль аҿы? Абжьааԥны аибашьра ахаҿра аарԥшразы рхы иадырхәо абзазаратә шәыгақәа ыҟамызт араҟа. Иаҳҳәар ауеит "Ԥшӡала иаҳзырша" аметафоротә ҟазшьа змоу театртә усумҭоуп ҳәа.

Аспектакль аҿы Таиф ихаҿра нарыгӡоит ҩыџьа. Аӡәы, адәахьала иҭынчны иаҳдыруаз апоет дааирԥшуан актиор Рауль Ақаҩба, аҩбатәи- здунеи еилаҩынтуаз, згәы еибафоз, афилософиатә уаажәларратә поезиа зырҿиоз Таиф ироль дыхәмаруан актиор қәыԥш Гәыдал Ҳагба. Апоет иԥшәмаԥхәыс- Римма лроль, - ҳадылгалеит Камма Инаԥшьԥҳа.

Таиф Аджба с супругой Риммой Когония
© Фото : из личного архива семьи Аджба

Иуадаҩуп, ауаажәларра иргәалашәо апоет ихаҿсахьа аԥҵара, аха атеатртә усумҭа уи портретӡам, уи хаз иалкаау рҿиамҭоуп, убри аҟынтә, араҟа иаҭахуп апоет адәахьтәи исахьеиԥш, иҩныҵҟатәи адунеи аҽазааигәатәра, насгьы аибашьра ахаҭа ахаҿра асимволтә ҟазшьа змоу арежиссиортә шәыгақәа рзыԥшаара. Абарҭқәа рылшазшәа збоит апремиера ҳадызгалаз аколлектив. Дара асценаҿы оркестрҵас аус руан, аперсонажцәа уажәы, уажәы еиуеиԥшым асимволқәа раарԥшра уалны ирыдны. Аибашьра асахьа аарԥшразы арежиссиор -ақәыргылаҩ даламгаӡеит автоматла ахысреи, ашьакаҭәареи реалтәла раарԥшра, уи иахьатәи аамҭазы уамак уздызхало хырхарҭам.

Сгәанала, аспектакль аҿы Таиф ихаҿсахьа ҩыџьа иахьаадырԥшуа апоет акыр изааигәоуп, иара ихаҭа иажәеинраалаҿы иазгәеиҭахьеит "Сҭынчра закә ҭынчроу, здыруа са сҭынчроуп" ҳәа.

Аибашьра амшынҵа асахьа аҭыхразы арежиссиор илхәыцит аҟәардәқәа рыла ауаа мҩанызгоз адәыӷба, астол асахьа змоу иҭахоз ахьеиқәыркуаз, гәыӷра шәкы змаз апоет иҩуаз ажәеинраалақәа дахьрыԥхьоз амаҭәар. Ари зегь сахьаҭыхҩыс даман Витали Қацәба. Апоет дшыҟаз еиԥш Рауль Ақаҩба дҭынчын, Гәыдал Ҳагба иакәзар, еилаҩынтуаз, ицәқәырԥоз Таиф иакәны даҳирбоит. Аспектакль аҿы Кама Инаԥшьԥҳа зегь реиҳа иԥсабаратәу шәыгала аус луан, илыхәмаруаз аԥҳәыс акыр дылзааигәаны.

Лорка илахьынҵа зԥеиԥшыз: Таиф Аџьба диижьҭеи 80 шықәса ҵит

40 мшы инарзынаԥшуа Таиф ииҩуаз имшынҵа атеатртә рҿиамҭа алхраҿы, арежиссиор илхамышҭит апоет инапҩымҭ́акәа дрышьҭаланы иусурҭа ҭыԥаҿы даннеиз ибла иабаз. Акультура ахәаҽра иасимволны адашьма иқәжьын аԥсуа шәҟәқәа. Абри асахьа мацара адагьы аҭахума, агеноцид ҳзызурц иааз рыгәҭакы аарԥшразы.

Даара сгәы дҭашәеит актиор Гәыдал Ҳагба. Макьана дқәыԥшуп, иҟалап ицәыриго ацәалашәарақәа ршыкьбжьы ҳаракызар, аха апластика аганахьала дышхәыдам убоит, уи иныҟәашәа, ифархь бџьар ала иеибашьышьа уҳәа, акыр дыгәныукылартә дыҟоуп.

Поэт Таиф Аджба на сухумском причале.
© Фото : из личного архива семьи Аджба

Исыздыруам апоет Таиф Аџьба ари аспектакль ибар ииҳәашаз, уи бзиа ибомызт ихьӡ иалкааны ирҳәар, аха сара иара дшыздыруаз ала, аспектакль ахаҭа иара иеиԥш абжьы мырдукәа иҟан, ихырку амузыка леитмотивс иаҭаны.

Ахәаԥшҩы изы игәаӷьыуацәан аспектакль анцоз анапеинҟьара, избанзар асценаҿы ииасуаз аԥсҭазаара бжьыҭгала акәымкәа иҭышәынтәалаз шьҭыбжьыла еибыҭан. Амассатә сценақәа ҳәа изышьҭоу сырзааҭгылозар, иалыскаауеит Борис Гәыргәлиа иԥа Абзагә данҭаха иԥсыбаҩ аныргозтәи асцена, иара убас, Таиф машәыршәа дзықәшәаз Еҭери Коӷониаԥҳаи уи лнапы лзеинызҟьоз ахәаԥшцәеи ирызку ахҭыс иазыԥшааз арежиссиортә цәаҳәақәа.

Аспектакль мҩасит, ахьаа зцу апоет ибжьаӡра иасимволны. Хымԥада, иҟоуп актиорцәеи арежиссиори зызхәыцша, еиҳаркгьы ражәаҳәатә культура иҵегьы иԥсабаратәу аинтонациа азыԥшаара аганахьала, аха атеатр здыруа ишазгәарҭо еиԥш, аспектакль ҿиоит ахәаԥшҩы иахь ицәырццыԥхьаӡа.

P.S: Аспектакль цон ҩымш, ахәаԥшҩы дагмызт. Ииашоуп, еснагь еиԥш змобилтә ҭелқәа зызмырцәо, ианакәым игыланы идәылҵуа умбарц залшомызт, уи азы иаҭахуп акыраамҭа атеатртә етикет ҳәа изышьҭо аларҵәара. Мшаԥы 12 руха сеиҭанеит аспектакль ахәаԥшразы, уи анҵәара 15 минуҭ шагыз азал иҩналаз атеатр арежиссиор Жәлар рартист Валери Ақаҩба ишә кыдҵашьеи "Это ужасно, это ужасно",- ҳәа имонологи слымҳа иахьҭыҩуаз атеатраҿ макьана шҭынчымрахо азы агәҩара соуит. Сывараҿы дтәан зактиорцәа ажәҩан ихагаланы ирыхцәажәо РУСДРАМ ахада Иракли Хынҭәба. Убас дыҟоуп азоуп, иара итеатр кәапеишәа изҭәу.

"Ԥшӡала иаҳзырша", иҳәеит Таиф аамҭа уадаҩ ҳанҭагылаз, алҵшьак ҟалап ҳәа дгәыӷуан азы.

Автори аредакциеи ргәаанагарақәа еиқәымшәозар алшоит.

 

181

Акаҳуеи аҳаҵлеи: аилазаара "Ашацкыра апоетцәа" шеиҿкаахаз

4
Алитературатә еилазаара "Ашацкыра апоетцәа" арҿиара знапы алаку аҿар еиднакылоит. Уи аиҿкаараҿы акаҳуа рольс инанагӡаз, насгьы аҳаҵла зеиҭаҳатәхаз дазааҭгылоит ажурналист Аинар Ҷыҭанаа.

Аинар Ҷыҭанаа, Sputnik

Дуӡӡак аҟынтәи ҳаауеит

Ҭагалантәи амш ԥхақәа руак азы ҩыџьа апоетцәа – Дырмит Габалиеи Абзагә Аҟалӷьбеи, аҽнышьыбжьон, амшын аԥшаҳәаҿы каҳуажәра ишаҿыз снарыхҭыгәлеит.

Мышқәак рышьҭахь ажурналист Девид Гобечиа дҳацны, мрагыларахь ҳхы рханы амҩа ҳанылахьан. Ҳарҭ ҳахҩык иҳацын "ҳҵәаӷәамҭақәа", Девид – "ифото-видео-блаҭыхга".

Крааҵуан жәеинраалақәак ҳармыԥхьеижьҭеи – абас иҟан ҳныҟәара аҿыҵга. Зегь раԥхьа уи ахшыҩзцара ихаҿы иааит Дырмит, иара убасҟан, аԥшаҳәаҿы акаҳуа анаҳжәуаз аамҭазы.

Аҽны ҳаҭааит Басариа ихьӡ зху Очамчыратәи ашкол-интернат. Уи аамҭазы "коронавирус" ҳцәагьы ҳацәагьы макьана иаламшәацызт аҟнытә ҳрыдыркылеит ҳаргәыдыҳәҳәаланы. Имаацызт адистанциа-мистанциақәа "рмодагьы".

Апоетцәа рҭеиҭыԥш ашколхәыҷқәа рхаҿы ишааиуа ҳашьашәалон ҳәа сгәы иаанагом, аха а-Пушкинхареи а-Шьынқәбахареи аҽны ҳаргьы хықәкыс иҳамаӡамызт. Сааҭк аҟара иргәарԥханы иӡырҩуан аҵаҩцәагьы. Рнапеинҟьабжь еиҳа-еиҳа иӷәӷәахо ианалага – иазҳархеит. Избанзар зны-зынла уи агәыԥҵәарагьы иадыргоуп.

Ԥыҭк ҳагәқәа (анаҩс ҳлымҳақәагьы) анҳарда, аԥшәмацәа адиреқтор иуадаҟны пату ҳақәырҵар рҭаххеит. Ашкол уанҭо ари ауадахь анагарақәа бзиарак иазҳәам, џьаракы аҩнагалара-аҩныгараҿы уаныцхырааҩу алаҳамҵозар. Аха уажәазы сасра ҳуеит, ҳзыцәшәо егьыҟам.

Дук мырҵыкәа ашкол анапхгареи арҵаҩцәеи иҭабуп ҳәа нараҳәаны, аԥсуа шәақәа ҳәо, мамзаргьы ирӷызуа, ҳазлааз ала ашьшьыҳәа ҳанҿынаҳхеит. Ҳаԥхьаҟа Аҟәанӡа ишьҭоу амҩа хароуп, арҿиара мҩа акәзар – нҵәара ақәӡам.

– Ҳзусҭцәоу жәдыруама? – ҳәа ҿааиҭит Дырмит, Очамчыра ҳаналсуаз аамҭазы.

– Ыы? – ҳҳәеит ҳаргьы, иҵаашьа џьашьаны.

– "Ашацкыра апоетцәа" ҳауп.

Арҿиаратә шәырҵла

Ари машәыршақә иҳәаз ажәақәамызт, анаҩстәи ҳныҟәарахьгьы "Ашацкыра апоетцәа" раҳасабала амҩа ҳақәлеит. Жьҭаарамза 24 рзы ҳара ҳаҭааит Ҷыҷыкәа Хьиба ихьӡ зху Баслахәтәи абжьаратә школ.

Аԥсуаа рҳәашьа, сара истәуп ҳәа акәым изысҳәо, аха ари ашкол аҵас бзиақәеи аҳаҭыри змоу ҵараиурҭоуп. Аԥсуа шәҟәыҩҩцәеи апоетцәеи ирызку, ашкол ашҭа ҭбааҭыцә ҭзырҭәаауа абаҳча мацара абанӡанеиуеи. Дара рнапала еиҭарҳаз аҵлақәа еиламҩашьарц азы досу анҩыларақәа рымоуп. Аԥсуара иазку ауадаҿы еизгоуп ибеиаӡоу аҭоурыхтә материал.

Акыр жәашықәса раԥхьа ари ашкол аҟны ашәҟәыҩҩцәеи ашколхәыҷқәеи рыбжьара асалам шәыҟәқәа реимдара хацыркын. Уи аҵас бзиа еиқәырханы иаагоуп иахьанӡагьы, асалам шәҟәқәа зегьы еиҷаҳарыла иҵәахуп хыхь зызбахә ҳәаз ауадаҿы.

Ашацкыра апоетцәагьы ари абаҳча ссир аҟны ҳахьӡ зҳәо ҵлак ыҟазарц ҳҭаххан, аҳаҵла ааганы еиҭаҳҳаит. Хәыҷык-хәыҷык баҳала аус анаҳуы, ҳаиасит ажәеинраалақәа рыԥхьарахьгьы.

© Foto / предоставлено Аинаром Читанаа
Ашацкыра апоетцәа аҳаҵла еиҭарҳаит Баслахәтәи абжьаратә школ ашҭаҟны

Анаҩстәи ахҭысқәа еиҭаҳәаратә формала иаасырԥшуеит, аԥхьаҩ ажәа дасмыршьразы.

Иҭәы-иԥха имҩаҧысыз ари аиԥылара ашьҭахь ашацкыраа анаҩстәи ҳаиқәшәара шықәсыбжак еиҳаны иахырԥатәхеит. Уи зыхҟьаз аҭагылазаашьақәа рацәоуп.

Инҵәеит 2019-тәи ашықәс. 2020-тәи алагамҭа акәзар аибабарақәеи аиқәшәарақәеи рзин ааҳамнахын, "zoom" ала авидео еимадара мацара ҳҽалаҳагӡар акәхеит. Ари аамҭа иалагӡаны ҳаилазаара иацлеит: Алмас Шьалашьаа, Шьазина Бганԥҳа, Ҳаџьараҭ Џьыкьырба, Адгәыр Амԥар.

Акарантин ашьҭахь

Ачымазара иадҳәалаз агәыҭҟьарақәа маҷк ианеихсыӷь, ԥхынгәымза 23 аҽны, Дырмит Гәлиа илитературатә-мемориалтә музеи аҟны ицәыргахеит алитературатә еилазаара "Ашацкыра апоетцәа". Уи алахәылацәа досу ҳҩымҭақәа акы-ҩба ҳрыԥхьеит, иара убас инеимда-ааимдо ҳаԥхьеит "Ашацкыра апоетцәа Рҭоуба".

Аҭӡаҿы икыдын асахьаҭыхҩы Баҭал Џьапуа ҳаилазаара иазирхиаз адыргаҷагьы.

Апоет, ажурнал "Алашара" аредактор хада Анатоли Лагәлаа, аилазаара ҿыц иазкны игәаанагара ҳәо, иазгәеиҭеит:

"Аамҭа аҿахәы шаҟа иҳазҳәо, шаҟа аҵакы ҳзеилкаауа – уброуп ҳпоезиагьы аԥсы ахьҭало. Иагьа ирԥшӡаны иуҩыргьы, агәы аҵамзар, агәаӷь амамзар, аԥсуара ыҟамзар – уи алҩа иаҩызоуп. Избанзар, иахьа узыԥхьо алитература убри аҟара ирацәоуп, уи иалкааны ахатә бжьы ацәыргара мариаӡам. Аха абаҩхатәра змоу уи амаҵ иуроуп. Даара узызхьаауа, угәы иаҭаху зегьы аанужьыр ауп, иулоу наугӡарц азы, имца хааны уаблырц азы. Изгәаԥхо ҟалоит, изгәамԥхогьы ҟалоит, аха сара исҭахыз сҳәеит, са сыдагьы аӡәгьы изҳәомызт ҳәа агәаанагара ануоулак – убасҟан ауп ажәеинраала аныуҩыз".

Адгәыр Амԥар аҭоубаҭара адырхаҽны ҳаилазаара даналҵ, Гәлиа иҩны-амузеи аҟны Даур Наҷҟьебиа иҳаиҳәаз ажәақәа атыхҳәа иааҳгәалашәеит. Ашәҟәыҩҩы ҳгәыԥ алахәылацәа зегьы шнымхо, мышкы зны аӡәы ишынижьуа ҳгәы ҳҽаниҵахьан, аха уи амш ас лассы иаауеит ҳәа ҳгәы иаанагомызт.

Ааигәазы акы-ҩба усмҩаԥгатә азԥхьагәаҭаны иҳамоуп. Аԥсуа политикцәа ражәақәа рыла иуҳәозар "иҟаҵатәу рацәоуп", аха урҭ зегьы раԥхьа игылоуп арҿиара.

Алитературатә еилазаара "Ашацкыра апоетцәа" адаҟьақәа феисбуки инстаграми рҟны иаԥҵоуп. Уаҟа агәыԥ алахәылацәа рырҿиамҭа ҿыцқәеи аилазаара аԥсҭазаашьа атәы зҳәо ажәабжьқәеи лассы-лассы ишәыдаагалалоит.

4

Адипломатиа иаамысҭашәоу занааҭуп

109
(ирҿыцуп 17:48 13.08.2020)
Адәныҟатәи аусқәа рзы Аԥсны ахада ицхырааҩ ааигәа аԥсуа-аурыс ҳәааҿы аҭыԥ змаз ихымҩаԥгашьеи уи иаиуз ареакциеи дырзааҭгылоит Sputnik аколумнист Елеонора Коӷониаԥҳа.

Ауаажәларра амчра аԥсахразы апротесттә қәгыларақәа зымҩаԥырго анапхгара ҳазҭо русуразы агәынамӡара рымоуп азоуп. Ареволиуциақәа мҩаԥысуеит асоциалтә платформа уи азы иахьыманшәалоу атәылақәа рҿы.

Иаҳхысыз ашықәси ҳазҭалази ҳтәылаҿы аполитикатә еибарххарақәа рацәан, урҭ реиҭаҳәарагьы иаԥсам, зегь ибзианы ижәдыруа ауп. Усҟан оппозициа иҟаз, иахьа амчраҿы иҟоу анапхгара рриторика "азакәан аҳра ауа, еиҵыху ачынуаа рыштатқәа реиҵатәра, ауаа рсоциалтә бзазара ашьҭыхра" ҳәа, ԥхьатәара ирышьҭыз атәыла ахада иаамҭазы иҟаз ауашәшәырарақәа акыр иӡырганы, уи шьаҭанкыла ишеиҭаркуа агәра ҳдыргон. Аҳәара мариоуп, аха анагӡара уадаҩуп. Иҳаҩсхьоу ашықәсқәа ҳрыԥшны иаҳҳәозар, ҳтәыла ахадацәа амчрахь анеиразы аҳәаҭыхла  ирзықәԥо, анаҩс урҭ рхаҭа азакәанқәа еиларгарагьы ирылакьысуам, избанзар, рус иахазыргылаз раҳаҭыр рбароуп.

Еидыз аоппозициатә блок ахада Аслан Бжьаниа иахьа амчраҿы дыҟоуп, ҳазҭоу ашықәс алагамҭазтәи аполиткатә кризис алҵшәақәа ирыбзоураны. Абар зеиӷьыҟам аҭагылазаашьа, азакәан аҳра ауа, акоррупциа маҷхо, ачынуаа рхыԥхьаӡара еиҵахо аҟаҵаразы. Макьаназы, агәыргьынчмазара аиаара раԥхьатәи ацәаҳәаҿы иазлаҟоу ала, егьырҭ зыӡбахә ҳәаз ареформақәа кьыс рымам, ачынуаа реиҵатәра акәзар, аизырҳара амҩоуп изну.

Иахьатәи Аԥсны ахада икадртә политика макьаназы иреформатәу аҟазшьа амоуп ҳазҳәом, дамеигӡакәа ацхырааҩцәеи абжьгаҩцәеи иадминистрациа иадигалоит, уаанӡатәи икритикатә згәаҭақәа ихаршҭны. Иахьатәи санҵамҭа зызку "афырхаҵаратә" темагьы сазааиуеит уажәы.

Ажьырныҳәатәи аполитикатә хҭысқәа ираԥхьагылаз Ахра Аҩӡба алхрақәа рышьҭахь "адәныҟатәи аусқәа рзы Аԥсны ахада ицхырааҩ" ҳәа дшьақәырӷәӷәоуп. Даҽакала иаҳҳәозар, ахада иадминистрациа ианақәлоз, асаркьақәа ԥыххааны амҩа аазыртуаз иаалырҟьаны ддипломатхеит. Ишыжәдыруа еиԥш, адипломатиа – акыр иаамысҭашәоу занааҭуп, уи иаднакылаӡом аӷьалпал. Рацәак аԥшрагьы аҭахымхеит.

© Sputnik / Томас Тхайцук

Ҳазҭоу амза быжьба рзы асоциалтә ҳақәа рҿы иаацәырҵит "адәныҟатәи аусқәа рзы Аԥсны ахада иабжьгаҩ Ахра Аҩӡба "Урыстәылеи Аԥсни рҳәааҿы ибжьагылоу аихатә гәашә и-Toyota Land Cruiser алаӡара ду змоу абапмер ала днажәлан, ҳара ҳҳәаа дышҭалаз узырбо асахьаныҟәа. Абри алагьы аԥсуа дипломатиа ахаҿра ҿыц шьақәыргылоуп. Аиашазы, асоциалтә ҳақәа рҿы ицәырҵыз авидео ала, Toyota Land Cruiser аԥсҟы зку дшумбогьы, дук мырҵыкәа Ахра Аҩӡба иҳәеит уи иара шиакәу, изыҟаиҵазгьы "хә-сааҭк аҳәааҿы даанкыланы дахьрымаз" азы шакәу.

Ишеилкаахаз ала, ҳдипломат акоммуналтә, иара убас егьырҭ ашәахтәшәаратә ҟазшьа змоу аусқәа рзы миллионк иаадҩыло ауал иқәын, уи имшәакәан Урыстәылатәи аҳәаа ахысра азин имамызт. Ахра Аҩӡба иҟаиҵаз ахҳәааҿы иазгәеиҭеит "аҳәааҿы иҟоу аҭагылазаашьа хшыҩзышьҭра аҭатәуп" ҳәа. Адипломат иҟаиҵаз аҳәамҭаҿы иара убас иазгәеиҭоит ҳауаажәлар аҳәаа ахысраҿы ауадаҩрақәа шрымоу, сааҭла уа агылара шрықәшәо азы.

Ауадаҩрақәа ануԥыло ыҟаҵәҟьоуп, аха апрезидент иабжьгаҩ дышдипломатыз ихашҭит, адипломатиа ззыҟоу, аиҿцәажәарақәа рыбзоурала ауадаҩрақәа раԥырҟәҟәааразоуп. Авидео уахәаԥшыр иубоит еиқәаҵәасамсалуа иҟоу адипломат имашьына, акашәа имбакәа, амҽыӷра аҟазшьа аманы Аԥсны аҳәаа еихызшо агәашә инажәланы ҳтәыла ишҭалаз. Шәазхәыц, ари ҟазҵо апрезидент ицхырааҩ иоуп, баша хархьуаҩым.

Схаҿгьы исзаагом, уаанӡатәи Аԥсны ахада ицхырааҩ иакәызҭгьы, аоппозиционер Аслан Бжьаниа идгылаҩцәеи иареи иахырҳәаараны иҟаз ари ахҭыс, аха "дара ртәы" ианыҟаиҵа, хымшҟа рыԥсы ӡаны итәан. Аинформациатә хархәагақәа рҿы ари атема анцәырҵ, акыр зыбжьы цәгьахаз хҭысны ианыҟала, нанҳәа 10 рзы апрезидент ипресс-маҵзура аҟынтә ицәырҵит аҳәамҭа "Ҳазҭагылоу аамҭазы аҭагылазаашьа аҭҵаара мҩаԥысуеит" ҳәа. Аҳәамҭа ишҳаҵанаҳәо ала, Аԥсны анапхгара ари азҵаатәы азы, агәаҭарақәа анымҩаԥыслак ашьҭахь алкаақәа ҟарҵоит. Ари ахҭыс азы, иҳәынҭқарратәу аинформациатә хархәагақәа уамак рҽырымҟьеит, апресс-маҵзура иҳаланаҳәаз аинформациа аздырхеит, иҷыдоу аҭыжьымҭақәагьы азырымкит. Иҳәынҭқарратәым ирҳәази ирымҳәази ахәшьара аҭара хықәкыс исымаӡам уажәы абра, урҭ уеизгьы-уеизгьы "рхы иақәиҭуп".

Хымԥада, уаанӡа акәызҭгьы, Бжьаниа идгылоз аоппозициатә информациатә хархәагақәа ирҳәашаз рдыррын, адипломат Аԥсны агәашә иҭалашьа ҳзырбоз авидео иахьеи-уахеи идырҵәирын, аха уажәы амчрахь ианааи "ажәа ахақәиҭра" ҳәа ззырҳәоз аԥсы ахьҭоугьы ргәаламшәеит, имашьына аҳәааҿы "ианжәылозгьы" цәыррымгеит.

Ари ахҭыс Урыстәылеи Аԥсни реизыҟазаашьазы узхыҽхәаша акәым. Ҳтәыла ахада ицхырааҩцәеи иабжьгаҩцәеи узвамлаша ахымҩаԥгашьа аадырԥшлароуп. Ихадоу ҳастратегиатә ҳәынҭқарра ҳәа Урыстәыла ианазаҳҳәо, ҳдипломат ихымҩаԥгашьа ҳаизыҟазаашьақәа ирмыхәарашәа сыҟоуп. Анаҩсан иҳауз ажәабжьқәа рыла, Ахра Аҩӡба иқәыз ауал ишәеит, ахҭыс азы Урыстәыла аганахьала аусҭҵаара нап аркуп. Абри  аныҟала, асоциалтә ҳақәа рҿы ацәажәарақәа цәырҵуа иалагеит Аҩӡба иусура дамырхуамашь ҳәа. Сара схәыцрақәа ртәы сҳәозар, дамырх сыздыруам, аха Аҩӡба дара рхаҭақәа рамхра азҵаатәы ықәимыргылааит…

Автори аредакциеи ргәаанагарақәа еиқәымшәозар ҟалоит.

109

Кәыҵниа ашәарыцаратә сезон ахацыркразы: ашәарыцаҩцәа рыламыс ҳақәгәыӷуеит

0
(ирҿыцуп 19:24 15.08.2020)
Нанҳәа 15 рзы Аԥсны иаатуеит ашәарыцаратә сезон. Уи злалаго, насгьы ашәарыцара аԥҟарақәа ртәы арадио Sputnik аефир аҿы еиҭеиҳәеит ашәарыцаҩцәеи аԥсыӡкыҩцәеи реидгыла ахантәаҩы Ҳаџьараҭ Кәыҵниа.
Кәыҵниа ашәарыцаратә сезон ахацыркразы: ашәарыцаҩцәа рыламыс ҳақәгәыӷуеит

"Асезон аатуеит ачала, уи адагьы акгьы уазышәарыцар ҟалаӡом. Ашәарах жьҭаара 1 инаркны иалагоит. Зныктәи ашәарыцараан ача ҩажәа еиҳаны иушьыр ҟалаӡом. Раԥхьа ача цәырцуеит Цандрыԥшь, Маҳадыр ҳәа иахьашьҭоу аҭыԥ аҿы, уаҟа ирацәаны иубар улшоит, нас цәыббрамзазы Очамчыра араион ахь иаауеит. Ашәарыцаҩ данҭыҵуа имазароуп хышәҟәык: ашәарыцаратә билеҭ, ашәақь аныҟәгаразы аршаҳаҭга, иара убас алицензиа. Ашәарыцара аԥҟарақәа рықәныҟәаразы ахылаԥшра зду аекологиа аусзуҩцәа роуп. Аха еиҳарак ҳара ҳақәгәыӷуеит ашәарыцаҩцәа рыламыс. Ашәарацыҩ аԥсабара даԥырхагахар иҭахызар уи азы еснагь имоуп алшара, аха ҳара ҳзықәгәыӷуа еиҳарак иламысоуп, мамзар, акы икәа иҭаиҵап егьы - иӡап, еснагь уи узишьҭалом. Иҟоуп есышықәса аԥҟарақәа еилазго, урҭ иаҳа-иаҳа шьҭахьҟа ицоит, аха сынтәа ҳақәгәыӷуеит, аекологцәа рус иаҳа идырџьбарап ҳәа избанзар, хаала измаҳауа ыҟоуп", - еиҭеиҳәеит Кәыҵниа.

Иаҳа инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.

Иара убас шәаԥхьар ҟалоит:

0