Саида Габниаԥҳа

Саида Габниаԥҳа: ацәаҳәа амуза иарҿиаӡом, уи ацәанырраҟынтәи иаауеит

91
(ирҿыцуп 16:02 12.06.2019)
Аԥсуа шәаҳәаҩы Саида Габниаԥҳа рашәара 14 рзы, лымшира аҽны РУСДРАМ асценаҿы асааҭ 19:00 рзы имҩаԥысраны иҟоу раԥхьатәи лконцерт аламҭалаз лырҿиара иазкны Sputnik аинтервиу алҭеит.

Аинар Ҷыҭанаа, Sputnik

- Иахьатәи шәымш шԥалагеи?

- Аҵыхәтәантәи аамҭазы сымшқәа зегьы еиԥшны иалагоит ҳәа сҳәар сылшоит. Избан акәзар сылацәа анхыстлак инаркны схәыцрақәа зегьы азкуп мышқәак рышьҭахь имҩаԥысраны иҟоу сконцерт, сышьыжьгьы злалаго уи аҽазыҟаҵарақәа рыла ауп. Зны схала сыбжьы "сырҿыхоит", нас асааҭ жәаба рынахыс амузыкантцәеи сареи ҳаиқәшәаны ҳаицҽазыҟаҳҵоит.

© Sputnik
"Агәы хьшәашәа": Ашәаҳәаҩ Саида Габниаԥҳа Ельза лроль налыгӡеит

- Шәаныхәыҷыз шәзакәхарц ишәҭахыз?

- Сани саби ражәақәа рыла? хәышықәса анысхыҵуаз инаркны телехәаԥшрала иқәгыланы ашәа зҳәоз рыхәаԥшра, рзыӡырҩра бзиа избон, сара стәала урҭ ашәақәа гәынкыланы схаҭагьы ирыцсырӷызуазаарын. Сҭаацәа ашәаҳәарахь исымаз аинтерес ӷәӷәа ангәарҭа? амузыкатә школ ахь срышьҭит. Аха уи инаваргыланы, сеизҳацыԥхьаӡа ажурналистикагьы сгәаԥхо салагеит аҟнытә, ашкол аҟны сҵара аныхсыркәша, ажурналистика ахырхарҭа ала ҳуниверситет аҟны аҵара сҭалеит.

- Аҵара шәанҭалоз аамҭазы иалшәхыз азанааҭ еиҳарак ишәгәазырԥхеи?

- Телехәаԥшрала ажәабжьқәа еиҭазҳәоз ажурналистцәа сгәаԥхон. Ҳхәыҷраҿы иҟаз ахәмаррақәа иреиуан уи аҩыза ахәмаррагьы, "амикрофон" кны, телехәаԥшрала ҳцәажәаҵәҟьозшәа ҳгәы иарбаны, "ажәабжьқәа" анеиҭаҳҳәоз. Уи аамҭазы, ҳәарада, сара исзеилкаауамызт ажурналист изанааҭ ацәажәара мацара шакәмыз иаанагоз. Аха ахәыҷраҿы ииз агәыбылра, зегь акоуп иаратәы ҟанаҵан, исгәаԥхаз ахырхарҭагьы аанмыжькәа сҵара хсыркәшеит. Анаҩс агазеҭ аҟны, ателехәаԥшраҟны уҳәа журналистк иаҳасабала ԥыҭраамҭак аус зуан, аха аҵыхәтәанӡа дырҩегь амузыка сазыхынҳәит.

- Арҿиаратә еицлабра шәышԥазыҟоу? Иҟазар аума иара, насгьы изеиԥшразар ахәҭои?

- "Аицлабра" ажәа ахаҭа рацәак сара сазыразым, избангьы шәасҳәоит. Иаҳҳәап, ашәа зҳәо сҩызцәа иҿыцу ашәак рҳәар, ма клипк ҭырхыр – уи сара гәыкала сеигәырӷьоит, саргьы абасеиԥш иҿыцу џьара акы анагӡара, аҩра снапы аласкындаз ҳәа агәаҳәара сызцәырҵуеит. Уи аицлабра аанагоит ҳәа сгәы иаанагом. Ари баша рҿиаратә гәаҳәароуп, саргьы егьырҭ сырҿыԥшны шьаҿак ԥхьаҟа иҟасҵандаз ҳәа агәаӷьра узҭо. Ахәыҷраҿы, ҳәарада, даҽакала иҟоуп. Усҟан аиааирагьы уҭаххоит, зегьы уреиӷьзаргьы цәгьа иубом. Ус ишоуп ауаҩытәыҩса иԥсабара.

- Еиуеиԥшым аҭҵаарақәа изларҳәо ала, изаҵәу ауаҩы рҿиаҩык иаҳасабала ашьақәгылара еиҳа изымариоуп, иҭаацәароу иаасҭа. Шәара шәышԥахәаԥшуеи ари аҩыза агәаанагара?

- Сара схатәы ԥсҭазаара изласнарбо ала, ауаҩы акы бзиа ибаҵәҟьозар, иҭаххаҵәҟьар – акгьы зиԥырхагахаӡом, имыхәозар. Хымԥада, ухатә ҭаацәара анумоу, аамҭа уҽахаршәаланы бзиа иубо аус аҽазкра кыр еиҳа иуадаҩуп. Аха ауаҩы иҭаххаҵәҟьар – аамҭагьы иԥшаауеит, амчқәагьы иԥшаауеит, илымшо акгьы ыҟаӡам.

- Аиҩызараҿы зегь раасҭа ихадараны ишәыԥхьаӡои?

- Агәреибагара зегьы ирыцкны сахәаԥшуеит. Уи ахьыҟам аизыҟазаашьа еиҩызараӡам.

- Шәхатә ԥышәаҿы иҟалахьома ус еиԥш, уи агәреибагара мыцхәы агәра жәганы, нас шәабылуа?

- Иҟалахьеит зыгәра сгоз ауаҩы иганахьала исымаз агәаанагара аҵыхәтәан ишымцыз анеилыскаауазгьы. Убри аамҭазы, ҳәарада сгәы снархьуеит, аха нас маҷ-маҷ исхашҭуеит, кыр аамҭа уи агәалсра сгәаҿы исҵәахӡом. Ганкахьала, иузааигәаз ҳәа иуԥхьаӡоз ауаа угәы анудырхьуа, улахь еиқәнаҵоит, аха даҽа ганкахьала уҟазшьагьы арҵәуеит, ухдырра иацнаҵоит. Уи зегьы ԥсҭазааратә ԥышәоуп, иџьашьалатәым, сгәанала, ҭынч ауаҩы идикылалар ихәҭоуп.

- Изеиԥшрои шәара шәмуза? Иабантәиаауеи шәара шәзы арҿиаратә гәалаҟара?

- Сара сашәақәа иналкааны музак иахылҿиаауеит ҳәа аҳәара сҭахым. Сара сзы ииуа ацәаҳәақәа зегьы цәанырроуп: еиуеиԥшым аԥсҭазааратә хҭысқәа, аҭагылазаашьақәа ирхылҿиаауа ацәанырра. Ашәақәа рыҩра ахаҭа апроцесс ҳалацәажәозар, сара сзы уи еснагь иҿыцу интереск аҵоуп, есааира еиԥшӡам, тематикалагьы еилаӡҩоуп. Иаҳҳәап, исымоуп ашәақәа, илахьынҵадоу абзиабара аазырԥшуа. Арҭ ацәаҳәақәа заҳауа сҩызцәа схаҭа сзыниаз, мамзаргьы сыԥсҭазаараҟны исхызго аҟнытә иаазго џьшьаны ргәы аныҭҟьалогьы ыҟоуп. Аха уи аҩыза ашәа, ҳәарада, сыԥсҭазаара ахаҭакәым иаанарԥшуа, уи акәӡам хықәкы хадас исымоу. Сара сашәа иазыӡырҩуа дарбанзаалак цәаҳәак аҟны иадамзаргьы ихы иԥшаар ауп исҭаху.

- Аусура ашьҭахь ԥсыршьагак аҳасабала шәнапы акыр иалакума? Иаҳҳәап анапкымҭақәа рыҟаҵара, мамзаргьы асахьаҭыхра?

- Схәыҷаахыс анапкымҭақәа срызгаган: аԥара, аҭыхра, аӡахра уҳәа. Иахьагьы, аусура ашьҭахь, аҩнусқәа зегьы рҭыԥ иқәҵаны, сыԥсы анысшьо, ма џьара фильмк санахәаԥшуа, бзиа избоит аԥара. Ҳәарада, сиашахом анапкымҭақәа аныҟасымҵо аамҭазы сыԥсҭазаара схаҿы исзаагом ҳәа сҳәар, аха ԥсыршьагак аҳасабала лассы-лассы ахархәара сзамоуп, цәгьала сгәы арҭынчуеит.

- Ииун 14 рзы имҩаԥысраны иҟоу шәхатә концерт аҟны ахәаԥшҩы идыжәгалараны шәыҟоузеи, насгьы уи аҽазыҟаҵаразы ишәыцхраауадаз?

- Акрааҵуан схатә концерт амҩаԥгара исзааигәоу ауаа исабжьыргоижьҭеи. Аха сара уи сахыццакуамызт, иахәҭоу аҩаӡараҟынӡа анагара ахьысҭахыз иахҟьаны. Сара еилыскаауан уи азы ишаҭахыз имаҷымкәа аамҭагьы, ахарџьгьы. Амузыкаҿы ацхыраара сырҭоит астудиа "AMA RECORDS", амузыкантцәа Анри Гәынба, Алхаси Алмаси Марколиаа, Денис Ҳагба, Ҭемыр Агрба, абжьы арежиссиор Ҭемыр Нарманиа, иара убас Москвантәигьы даараны дыҟоуп аҩбатәи абжьы арежиссиор. Инасыгӡараны иҟоу ашәақәа реиҳарак актәи сальбом иагәылаз роуп, аха иҟалоит азыӡырҩцәа ирмаҳац ашәа ҿыцқәагьы. Аинтерес змоу зегьы ҳарзыԥшуп, бзиала шәаабеит арыцхә 14 азы!

91

Ажәа иҭара иацәшәон: Владислав Арӡынба Аԥсны аҭоурых жәаха минуҭ ишҭеигӡаз

153
(ирҿыцуп 14:30 02.06.2020)
Рашәара 2, 1989 шықәсазы Москва, СССР Жәлар рдепутатцәа Актәи реизара ду аҟны аԥсуаа рҿахәы ҳәо раԥхьаӡа акәны ари аҩыза атрибуна ду аҟынтәи дықәгылеит Владислав Арӡынба. Уи аҭоурыхтә мшы лгәалашәараҿы ишынхаз ҳзеиҭалҳәоит Sputnik аколумнист Елеонора Коӷониаԥҳа.

Ԥхны мшын, жәлар рфорум "Аидгылара" аҿы хынҭаҩынҭаран. Амилаҭ-хақәиҭратә қәԥара аншыкьуаз аамҭан. Ахҭысқәа ахьымҩаԥысуаз иахьа Д. Гәлиа ихьӡ зху Аԥсуаҭҵааратә институт ахыбраҿы акәын, усҟан уаҟа Аԥсны Ашәҟәыҩҩцәа реидгыла ыҟан. Иахьа апатриотизм мариахеит, баҩык алам амчраҿ иҟоу акритика рзуара, уимоу ухы иааҭашәо уҳәаргьы ауеит.

© Sputnik / Владимир Федоренко

Сызлацәажәо ахҭысқәа раамҭазы, Асовет еидгыла асистема аҿагылара гәаӷьыуацәан, Аԥсны Қырҭтәыла иамхәаҽуа аҟаҵара иазықәԥоз рыԥсҭазаара ашәарҭара иҭагылан. Абри зегь зхысҳәаауа, усҟантәи асистема аҿагылара иззымгәаӷьуазгьы ыҟан, иахьа ипатриот дуцәоушәа ицәажәо ԥыҭҩыкгьы налаҵаны.

1989 шықәсазы лаҵарамза анҵәамҭазы, хықәкыла иаҳҳәозар амза 25 рзы, Москва аусура иалагеит СССР Жәлар рдепутатцәа Актәи реизара ду. Ҳара ҳдепутатцәагьы уахь ицаны иҟан. Усҟан Ашәҟәыҩҩцәа реидгыла ахыбра иаҭаауаз рацәаҩын Москвантәи ажәабжьқәа реилкааразы. Усҟан уажәеиԥш аимадарақәа абаҟаз, ианаауҭаху иззуҭаху аҭел уизасуагьы иҟамызт, аха "Аидгылара" ахадацәа ироуан аинформациа. Иҿыцу жәабжьк аныҟаз ахыбра азал ду аҿы ауаа ирыларҳәон. Убарҭ амшқәа рзы иааҳалаҩҩит аизараҿы ҳара ҳдепутатцәа иреиуоу аӡәы ажәа ирҭараны иҟоуп ҳәа.

Аҩӡба: Владислав Арӡынба аполитика инақәыршәаны акәын ишьаҿақәа шыҟаиҵоз

Ишысгәалашәо ала, уи апартиатә еизара ду ишиашоу ицоз аефир ала иаҳдырбон. Аидгылараа рхыбраҿы иҟаз ателевизорқәа ирыдӷьазкыланы иԥшын ҳауаажәлар рхаҭарнакцәа, аха ҳара ҳтәқәа аӡәгьы атрибунахь дымнеицызт. Ажәа рырҭомашь, ишԥаҟалари анаџьалбеит ҳәа иӷьаҵәыӷьаҵәуан зыԥсадгьыл алахьынҵа иазгәаҟуаз зегьы.

Коӷониаԥҳа: Арӡынба рашәара 2, 1989 шықәсазы Москва иқәгылара иазкны

Усҟан сара исхыҵуан 26 шықәса, егьырҭ сықәлацәа ԥыҭҩык реиԥш, абарҭ азҵаарақәа ахьырыӡбоз исхызгон сусура иахаршәаланы исымаз аамҭа. Сгәы иалоуп амшынҵа ахьныҟәсымгоз, избанзар аамҭа иаԥсаҟьо агәалашәарақәа рацәоуп.

Рашәара 2, 1989 шықәса рзы ҳажәлар ԥшын ҳдепутатцәа руаӡәы аизараҿы ажәа ирҭандаз ҳәа. Ҳаԥшын, ҳаԥшын, аха ҳа ҳтәы дцәырымҵыцызт. Иахьа дысгәалашәом дарбану, аха сҩызцәа руаӡәи сареи ҳанкараха, "Акоп икаҳуажәырҭа" ҳәа иахьашьҭаз ҳцаны каҳуак ҳжәып ҳгәахәын, ақалақь агәахьы ҳҿынаҳхеит. Ҳҭыԥ аҿы ҳнаӡарц акгьы ҳагмызт, иахьа аресторан "Санремо" ахьыҟоу унаӡаанӡа, "акомиссионтә дәқьан" ҳәа изышьҭаз ҳаваланы ҳашнеиуаз, иаҳдыруаз, уа иҵагылаз аԥсуа ԥхәыс лыбжьы ҳақәлыргеит. Зыӡбахә сымоу адәқьан аҿы ателевизор хәыҷы рыман. "Шәааи, шәааи, Арӡынба дықәгылоит", - лҳәеит лара. Убасҟан аекран аҿы избаз, уаанӡагьы издыруаз, аха уи аҽны хьшьыцбаҵас атрибуна аҟнытә Владислав Арӡынба иқәгылара еиԥш сгәы шьҭызххьо даҽа хҭыск сыԥсҭазаараҿы иҟамлацзар ҟалап.

Усҟан иара иқәгылара жәҩангәашәԥхьараны иааҳзыҟалеит, жәаха минуҭ ирҭагӡаны ҳмилаҭ зҭагылаз агеноцидтә политика иазкыз ажәахә.

Владислав Арӡынба игәалашәарақәа рҿы иҳәоит уи иқәгылара алыршара шымариамыз, ацентртә партиатә мчы ақырҭуа политика иаднацәылон азы: "Сара сааҟәымҵӡакәа ажәа сырҭарц сазықәԥон. Апартиатә иерархиа иаарылшоз зегь ҟарҵон ус иҟамларц азы. Ганкахьала ҳажәлар аҳәара ҟарҵон ҳара иаҳхаҭарнаку дықәдыргыларц, иҳауан еиуеиԥшымыз ателеграммақәа, даҽа ганкахьала, апартиатә напхгара Қырҭтәыла аинтересқәа ирызхәыцуа, сара ажәа сыҭара иацәшәон". Уи аҽны дықәдмыргылар, апротест ҟаҵаны аизара аанижьырц игәы иҭаны дыштәаз ауп ҳара ҳдепутат ажәа ширҭазгьы.

Аполитик дцәажәон жәаха минуҭ маҷк инацны, аха иахьатәи зажәа зроууа аполитикцәа дрыҿҳарԥшуазар, убри аминуҭқәа ирҭагӡаны ҳара ҳҿахәеиԥш, СССР иаланхоз амилаҭ маҷқәа рызҵаатәгьы шьҭихит. Аԥсны аразҟы далацәажәо, адепутат иажәахә аҿы иалкааны иазгәеиҭеит ақырҭуа екстремисттә политика иахҟьаны, риашашьа змам ахҭысқәа ҟалар шалшо. "Аекстремисттә мчқәа ахҭыс хадақәа Аԥсныҟа ииаргеит, ҳара ҳгәы ишаанаго ала, ауаа реидырсларазы, нас ахара ҳара ҳажәлар ирыдырҵарц азы. Ахара ҳара ҳадҵаразы уадаҩрак ыҟам, избанзар аинформациатә хархәагатә пропаганда ганкы иадцәыланы аус ауеит, убри аамҭазы аԥсуа жәлар рҿахәы аҳәарҭа рымам", - иҳәон Владислав Арӡынба уажәы-уажәы исааҭ дахәаԥшуа, ирҭаз аамҭа иҽҭагӡаны ҳажәлар рҿахәы наигӡарц азы.

Аҭоурыхҭҵааҩ Аслан Аҩӡба "Аибашьра-политикатә проблемақәа" ирызку ишәҟәаҿы иалкааны ари аҭоурых дахьалацәажәо иазгәеиҭоит аԥсуа политик Арӡынба иқәгылара ақырҭқәа адабла шыднарсыз. Ҿырԥштәысгьы иааигоит ақырҭуа шәҟәыҩҩцәа Р. Миминошвили, Г. Панџьекиӡе "аԥсуа екстремистцәа Қырҭтәыла аганахь ижәылеит, Қырҭтәылазы еиҳа иуадаҩыз аамҭазы" ҳәа усҟан ишырҩуаз.

Беиаԥҳа аԥхьагылаҩ Владислав Арӡынба изкны: ажәыларахь ҳанцоз ҳаиныҳәон

Ииашаҵәҟьаны, Арӡынба иҩыза уи аизараҿы ицәырҵра ҳаӷацәа ршьара иқәнарҟьеит, аха ари аҩыза ақәгылара усҟан ҳара ҳажәлар ргәы шьҭнахит, адунеи зегь ҳара иаҳтәушәа ҳааҟалеит. Абри ақәгылара анаҩсанҵәҟьа Владислав Арӡынба аԥсуа жәлар дырфырхаҵа хаданы, дырҿахәҳәаганы дааҟалеит, уи аԥхьагьы бзиа ирбахьаз шиакәызгьы.

Иамааз ҷыдарас СССР Жәлар рдепутатцәа Актәи реизараҿы ажәа зҳәаз Владислав Арӡынба иқәгылара? Сгәанала, адепутат Арӡынба иажәа араӡара, аҭоурых агәыларԥшра, ԥықәсларада иажәахә анагӡара, шықәсы рацәала ҳажәлар рхаҭарнакцәа ззықәԥоз азҵаатәы ӷьеҩла атрибуна хадаҟынтә ацәыргара, насгьы даҽак иаламашьоз агәаӷьра ду зныԥшуаз ихьшьыцба ҭеиҭԥш уҳәа, шәышықәса рахь знык иуԥыло аҿахәҳәаҩы диины даақәгылеит рашәара 2, 1989 шықәса рзы ҳара ҳажәлар рҿаԥхьа. Абарҭ аҷыдарақәа зегьы аӡәы ихаҿраҿы еизганы иҟан азоуп Арӡынба дыԥхьагыланы дҟазҵазгьы ҳара ҳхьыԥшымра азықәԥараҿы.

Аполититолог Андраник Миграниан Арӡынба изы абас иҳәеит: "Арӡынба имҽхак акыр иҭбаан, Арӡынба Аԥсны аҵкыс деиҳан", - адунеитә политикцәа дрыҵамхо дшыҟаз аарԥшуа.

Исыздыруам заҟантә сеиҭахәаԥшхьоу еицырдыруа Арӡынба иқәгылара, аха убасҟан еиԥш, иахьагьы урҭ ахҭысқәа анымҩаԥысуа иахьакәушәа сааҟалоит, убасҟан еиԥш иахьагьы агәадура сызцәырҵуеит.

Автори аредакциеи ргәаанагарақәа еиқәымшәозар алшоит.

153

Заҟа гха ҳрыхдырԥарыз иажәа ҟәышқәа: Сергеи Багаԥшь игәалашәара иазкны

33
(ирҿыцуп 15:38 29.05.2020)
Аԥсны аҩбатәи ахада Сергеи Уасил-иԥа Багаԥшь иԥсҭазаара далҵижьҭеи иахьа иҵит жәшықәса. Уи игәалашәара аҳаҭыразы ишәыдаагалоит Sputnik аколумнист Светлана Ладариаԥҳа изылкыз анҵамҭа.

Аԥсны, аԥсуа дгьыл, аԥсуа жәлар ахааназгьы ибеиан. Ибеиан ҳәарада ԥсабарала, гала, шьхала… Аха зегь раасҭа ибеиан уаала, доуҳала, ҟәыӷарыла. Жәытә-натә аахыс ара аҳаҭыр дуун ауаҩра, аԥсуа икодекс хада - аламыс. Азқьышықәсақәа, ашәышықәсақәа ирылыхәхәа иаауа ажәабжьқәа, ашәақәа, алегендақәа реиҳарак зыхҳәааугьы абри ауп. Аха аҩыра ахьҳамамыз азгьы заҟа ирацәаҩузеишь аҭоурых аӡыблара зыхьӡқәа ҳцәагаз. Егьаҩ ҿырԥшыганы ҳадгьыл иқәын…

Аԥсны аҭоурых ҿыц аҿы зыжәлар рхьаа зхьаау, ирыдгылоу, ирывагылоу рыхьыӡқәа ԥхьаҟатәи аҭоурыхқәа, абиԥарақәа ирзынхоит. Уи насыԥуп зқьышықәса рышьҭахь аԥсуадгьыл иқәынхо аԥсуа изы. Иаашьҭыхны дрыԥхьалап аҩырақәа, дрыхәаԥшлап аҭыхымҭақәа – иеиҵеиааӡалап ихшара иахьатәи ҳауаажәлар рхаҭарнакцәа рҿырԥшала. Ирызҳалап аԥсуаа аԥсуадгьыл аҿы. Еизҳазыӷьалап. Уи ус шакәхо агәра згарц сҭахуп… Мап, агәра згоит! Анцәа ду иџьшьаны ус акәхоит!

Сергеи Багаԥшь... Уи ижәла, ишьҭра аханатә аахыс ахьӡ-аԥша змаз ауаа рылиаауан. Унеишь-уааишь ҳәа рарҳәон адунеи амаа зкыз. Иахьынхацәаз ԥырхагак рнамҭацызт, избанзар акы - анхаҩы Аԥсны еснагь аҳаҭыр ду даԥсан, ҩбагьы – ахшыҩи адырреи ирыҵадырӡуан акыр ихыҭхәыцыз асоциалтә еиҟарамрақәа.

© Foto / из архива семьи Багапш
Аԥсны аҩбатәи ахада Сергеи Багаԥшь

Ибзианы исгәалашәоит ХХ ашәышықәса 80-тәи ашықәсқәа. Ахааназ аӡәы зхы дықәызмыртәацыз аԥсуаа аамҭа-аамҭала усҟантәи аамҭа ирзаанагоз ауадаҩрақәа ирҿагылон, рҟәаҟәа иқәтәарц зҭахызгьы нхьыдыҩруан.

Ибзианы исгәалашәоит 1989-тәи ашықәс. Мҽышан. Аԥсны ахы-аҵыхәа иалаҩит аԥсуааи ақырҭқәеи еиҿагылт ҳәа. Ари аҭагылазаашьахь мышкызны ишкылнагоз зегьы ирдыруан, ирбон, аха еивысырҭак шԥаҟамлари ҳәа игәыӷуан.

Аԥсныҟа амҩа иқәлеит 30 нызқьҩык рҟынӡа зхыԥхьаӡара наӡоз ақырҭцәа, аратәи ақырҭцәа ирыдгыларц, еснагь ргәы иҵхоз нарыгӡарц. Еихышәшәа-еиԥышәшәа Аалӡга аӡиас ахықәаҿ еизеит ашәарыцага шәақьқәа ирыҵагылаз аԥсуаа.

Сергей Васильевич Багапш на охоте.
© Foto / из архива семьи Багапш
Сергеи Багаԥшь ашәарыцараан

Абри аҭагылазаашьаҿы араион аиҳабы иаҳасаб ала, апатриот иаша ишиаҭәаз еиԥш, Сергеи Уасил-иԥа хьаҳәхьачарак ҟамҵакәа ижәлар рыхьчара дгылеит. Усҟантәи аамҭазы уи аҩыза ихымҩаԥгашьа иара изы даара ишәарҭахар алшон. Аха усеиԥш акгьы дазымхәыцӡакәа ақырҭуа шовинизм аҿагылараҿы напхгара ҟаиҵеит. Ари аҭагылазаашьа ахаҵара аарԥшра аҭахын. Уи иара илиршеит. Сергеи Уасил-иԥа иусурҭаҭыԥ, ипартиатә лахәылара рцәыӡра адагьы иԥсҭазаара ахаҭагьы ицәыӡыр алшон… Аха уи иазхәыцтәны имшьеит усҟан азы. Ҳәарада, 1989 шықәсазтәи ахҭысқәа рышьҭахь Сергеи Багаԥшь иусура дамхын.

Ари иԥсҭазаараҟны дзықәшәақәаз рахьтә хҭыс заҵәык ауп, аха инеидкыланы дзакәыз аанарԥшуеит.

26 августа 2008 года - день, когда Россия признала независимость Абхазии. Сергей Багапш пришел на площадь Свободы в Сухуме, где тысячи граждан республики ликовали, узнав о признании.
ВЛАДИМИР ПОПОВ
Сергеи Багаԥшь Аҟәа Ахақәиҭра ашҭаҿы нанҳәа 26, 2008 шықәсазы - Урыстәыла Аԥсны аназханаҵа аҽны

Аԥсны Аџьынџьтәылатә еибашьраан иара дыззырхаз аус аҿы иԥышәа ахархәара аҭаны ашьаарҵәыра илагылаз ижәлар дрыцхраауан. Иҳәатәуп зны-зынла абџьар акра аасҭагьы ла иамбоз аусқәа ирылшоз анеиҳахоз. Иҳәатәуп урҭ аусқәагьы афырхаҵараҵәҟьа шырҭаххалоз.

Сергеи Багаԥшь иԥсҭазаара зегьы иԥсадгьыл амаҵ азура иазкын. Атәыла аԥыза-министрс даныҟаз аума, ахадас даныҟаз аума – иара изы зегьы ирыцкыз Аԥсны аизҳазыӷьара акәын.

Президенты Абхазии, России и Южной Осетии Сергей Багапш, Дмитрий Медведев и Эдуард Кокойты (слева направо). Архивное фото.
© Sputnik / Сергей Гунеев
Сергеи Багаԥшь, Дмитри Медведев, Едуард Какоиты Аԥсни Аахыҵ Уаԥстәылеи рхьыԥшымрақәа разхаҵара ашьҭахь

Дыҟамзар ҟалап аԥсыуак, иажәа ҟәанда змаҳацыз. "Мои золотые" – абар иара зегь раасҭа бзиа ибаны ииҳәоз. Ари баша цәажәарамызт.

Инаԥшьба: Сергеи Багаԥшь Кремль дышрыдыркылаз абара акыр иаԥсан>>

Дыздыруаз, дызгәалашәо зегьы ражәа аҟәандара алыжжуеит иӡбахә анырҳәо. Ари еиҳау иҟоузеи аԥсҭазаараҿы! Ажәлар шамахамзар ус баша рыбзиабара узаахәаӡом, иуоуӡом.

© Foto / Владимир Попов
Аԥсны раԥхьатәи ахада Владислав Арӡынбеи Аԥсны аҩбатәи ахада Сергеи Багаԥшьи

Ихьаауп, даара ихьаауп ҳаԥсуадгьыл иреиӷьӡақәоу ахьацәыӡуа. Заҟа иаҳҭахузеи урҭ иахьа?! Заҟа ҳгәы ҟанаҵарыз Сергеи Багаԥшь иччаԥшь. Заҟа гха ҳрыхдырԥарыз иажәа ҟәышқәа. Заҟантәгьы игәымшәара, ихаҵара ҳаззымиааиқәаз ҳариааиртә еиԥш рылдыршарыз. Заҟантә… Заҟантә…

Изыбымбылыз Џьгьардатәи адгьыл.

Валери Багаԥшь: Сергеи Багаԥшь игәгьы, иԥсгьы, ихгьы Џьгьардоуп иахьыҟаз>>

Ирҳәоит ауаҩытәыҩса дыззыҳәо зегь адунеитә ҵакыра иазцаны адгьыл ахь ихынҳәуеит ҳәа. Ҳиҳәап нас Анцәа ду ҳтәыла ахааназ иагымхаларц Сергеи Багаԥшь иеиԥш зеиԥшу аԥацәа…

Иара убас шәаԥхьар ҟалоит:

33

Урыстәыла уахыки-ҽнаки рыла 8 863 коронавирустә хҭыс ҿыц аарԥшуп

0
(ирҿыцуп 12:03 03.06.2020)
Иахьатәи аамҭазы Урыстәыла иахьаҵанакуа 423 741-ҩык акоронавирустә инфекциа рыхьхьеит арегионқәа 85 рыҟны.

АҞӘА, рашәара 3 - Sputnik. Иҳаҩсыз уахыки-ҽнаки рыла Урыстәыла иаарԥшын 8 863 коронавирустә хҭыс ҿыц 84 регион рыҟны ҳәа аанацҳауеит COVID-19 аҿагыларазы аоперативтә штаб.

Иаарԥшыз апациентцәа рахьтә 41,9% ачымазара шрылоу рызгәамҭакәа имҩасуан.

Уахыки-ҽнаки рыла акоронавирус змаз 182-ҩык рыԥсҭазаара иалҵит, ргәабзиара шьақәгылеит 11 108-ҩык. Апандемиа ааҟалеижьҭеи Урыстәыла иахьаҵанакуа 5 037-ҩык рыԥсҭазаара иалҵит, ргәабзиара ҭышәынтәалеит 186 985-ҩык.

Москва уахыки-ҽнаки рыла иаарԥшуп 2 286 хҭыс ҿыц. Акоронавирус змоу реиҳараҩык рықәра 45 шықәса еиҵоуп. Москва иахьаҵанакуа зынӡа 185 374-ҩык акоронавирус рымоуп.

Аԥсны иахьаҵанакуа акоронавирустә инфекциа рыхьхьеит 28-ҩык ауааԥсыра, урҭ рахьтә 26-ҩык ргәабзиара шьақәгылахьеит, аӡәы лыԥсҭазаара далҵит.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

0
Атемақәа:
Ачымазара ҿкы – акоронавирус Аԥсни адунеи аҿи: иалкаау