Аԥсуа бираҟ

Ажәытәи аҿатәи ахьеилаӡҩо: ҳбираҟ ԥшьа ҳазнықәуа 27 шықәса ахыҵит

166
(ирҿыцуп 12:39 23.07.2019)
1992 шықәса ԥхынгәы 23 рзы, Аԥснытәи АССР Иреиҳаӡоу Асовет аилатәараҟны ишьақәырӷәӷәан ҳаамҭазтәи Аԥсны Аҳәынҭқарратә бираҟ. Иахьа уи амш аахижьҭеи иҵит 27 шықәса.

Аԥсны Аҳәынҭқарратә символқәа ируаку ҳбираҟ рыдыркылеит 1978 шықәсатәи Аԥснытәи АССР Аконституциа аусура аанкыларази 1925 шықәсазтәи Аԥснытәи ССР Аконституциа аиҭашьақәыргыларази аӡбара анрыдыркыла ашьҭахь. Уи ашьаҿа аԥсуа милаҭтә ҭоурыхи ҳахдырреи рзы аҵак ду змоу хҭысны иҟалеит, уи ес-игыло аԥсуа абиԥарақәа азгәыдуны, наунагӡа ԥхьаҟа иргалоит.

Адунеи зегь аҟны иарбанызаалак атәыла иамоуп ахатә бираҟ, агерб, агимн. Аԥсны Аҳәынҭқарра иахьатәи абираҟ х-ԥшшәык рыла еиҿкаауп, адунеи аҟны реиҳа иԥшӡоу абираҟқәа ирылакны аӡбахә рҳәоит.

Ҷыдала сара уи ус шакәу агәра згоит. Иҟалап, аӡынраз асы анлеиуа аԥсабара алакә цәа ахазҵо, иҭазыҳәҳәо, ухәыҷраамҭахь ухьазырԥшуа аԥшшәы шкәакәеи ааԥынра, адунеи аҿыхара ирсимволу аиаҵәара аԥшшәи бзиа иахьызбо акәзар. Аҟаԥшь акәзар, шамахамзар зегьы бзиа еицырбоит. Аиҭаиреи аиҭаҿиареи иршьаноуп.

Абираҟ аҳәынҭқарра, ахьыԥшымра, ахақәиҭра ирсимволуп. Жәытәнатә аахыс иара рхашәыршәыруан аԥсадгьыл ахьчара инеиуаз. Ҳәаҭыхла аибашьрақәа анцоз аамҭақәа раан абираҟ зкыз ауаҩы иалкаан дрыхьчон, хык иқәшәан дкамҳарц, иикыз аԥшьа бираҟ импыҵымҟьарц, иаҭахханы иҟалар, инаиваххны ицааныркыларц. Иԥсыда-инхада ҳәа иахьеилыршьуаз адәаӡа ахи аҵыхәеи рҟынтәи иубарҭан абираҟ. Уи аԥша иаршәыршәыруанаҵы иҟан агәрагара "макьана зегь мыӡӡац", иҟан агәыӷра. Хьаҵрагьы ҟаломызт.

Исгәалашәоит сқәыԥшра аамҭақәа раан сзыԥхьалоз ажәабжьқәа, аиҳарак Аџьынџьтәылатә еибашьра иазкыз рҿы абираҟ аӷа имԥыхьамшәарц азы ргәаҵа иҵаҵәахны ишырыхьчоз атәы заҟа сеилнархуаз. Лабҿабоушәа сыбла ихгылон урҭ афырхацәа. Иагьџьасшьон рылшара. Усҟан иабаздыруаз аамҭақәак рышьҭахь ашәҟәы иану ажәабжь акәымкәа, лабҿаба, аԥсҭазаараҿы усеиԥш ажәабжьқәа ҳадгьыл аҿы иҟалараны ишыҟаз... Иабаздыруаз иреиӷьыз ҳаҷкәынцәеи ҳаӡӷабцәеи зыда ҳамамыз абираҟ лашақәа нарҿаршәны рынарцәымҩа ишықәырҵоз...

Абри адунеи аҿы акгьы аҽаԥсахӡом. Агьаргьаласа ианушәа, еикәшо аамҭагьы ишыҟац иҟоуп, иажәеиҭаҳәоуп.

Аиааира аԥсуаа ишыргаз азы шаҳаҭра ауа Аԥсни Қырҭтәылеи рҳәааҿ иахьа иҳаракӡа иқәгылоуп Аԥсуа Ҳәынҭқарра ҳаамҭазтәи абираҟ, аӡнырцәынтә избо ҳаӷацәа уаҳа аҽазнык цәгьара ргәы иҭадмыршәырц рабжьызго.

Ҳԥышәа иаҳнарбеит: аҳәынҭқарра баагәарас иамоу бџьарла еиқәныху ажәлар роуп>>

Аҵыхәтәантәи аамҭақәа рзы официалла Аԥсны иазгәарҭо иалагеит Абираҟ амш. Уи ажәлар еиднакылоит, аҿар аҭоурых днардыруеит, амшыни аамҭеи еиҟәыргаз ҳажәлар ицҳаны ирызхылоит.

Даараӡа агәыкра аҵаны имҩаԥысуеит ари аныҳәа. Агәадура узҭо акакәны иухугоит. Аду инаиркны ахәыҷы иҟынӡа инапаҿы икуп иԥсадгьыл асимвол. Издыруа идыруеит, иззымдыруагьы идырҵоит иара аҭоурыхи аҵаки.

Иахьатәи абираҟ аҿы автор еилеиӡҩеит ажәытәи аҿатәи. Амаҿа шкәакәа зныз абираҟ ахагылан ҳера ҟалаанӡа VI-V ашәышықәсақәа рзы абырзенцәа ишьаҭадыркыз Диоскуриа (анаҩс, Себастополис, Сан-Себастиан). Аамҭақәак рышьҭахь уи акыр иеиԥшыз абираҟ символны иаман Аԥсуа ҳәынҭқарра. Иахьагьы иаанхеит уи иаарту амаҿа – аԥсуа имилаҭтә ҟазшьа, игәаартра аазырԥшуа.

Абарҭ исҳәақәо зегь рышьҭахь ауаҩы изынхароуп агәадура, аха…

Ажәа "аха" ҳара ҳаԥсҭазаараҿы лассы-лассы ахархәара аиуа иалагеит. Аԥсуаа ҳамшныҳәақәа ируаку абри амш аҽны напымыӡәӡәа иаҳамкыша, ҳҿар рыԥс ԥшьақәа зыхҭнырҵоз абираҟ ақалақь иналга-аалго еимдырҟьоит ациганцәа. Урҭ уи ашьа шахьшу гәаамыкӡакәа аԥара аладырҳауеит, аҳәынҵәа аҿатата, иааԥсаргьы инкарыжьуеит. Иџьоушьаша иара ҳаргьы акгьы ҟамлаӡазшәа ҳалацәажәаӡом.

Аицгәырӷьара анҳалшо сгәы иахәоит>>

Иахьынӡаздыруа ала, аныҳәақәа рыламҭалаз абарҭ абираҟқәа хәыда-ԥсада иҭрыжьуеит. Нас уи аԥара алаҟазҵода? Ациганцәагьы ирызҭо ҳара ҳакәӡами. Ҳара ҳакәӡами иахьахәҭоугьы иахьахәҭамгьы ҳсимволқәа анызҵо: аимаа аҵыршьы инаркны асаани аҵәцеи рҟынӡа. Ухы пату ақәумҵар, аҽаӡәы иақәиҵараны изыҟои.

Иҳаҩсыз ашықәс азы Апарламент аҟны ирыдыркылеит аԥсуа жәлар Рџьынџьтәылатә еибашьраҿы цәыббра 30, 1993 шықәсазы Егры аҳәааҟны ишьақәыргылаз Аиааира Абираҟ ахьчаразы азакәан апроект. Ииашоуп. Еиҳау иарбан ахьчара зҭаху?! Аха абраҟа иацысҵоит Аиааира Абираҟ ахаҭеиԥшҵәҟьа ишыхьчалатәу аҳаҭыр, апату, ишыҳарактәу ари асимвол зныԥшуа зегьы.

Америкатәи ашколқәа рҟны аҵарамш иалагоит абираҟ ашьҭыхреи агимн арҳәаралеи. Мышкы, ҩымш, шықәсык, жәашықәса есыҽны иубо иуаҳауа ушьа-уда иалаӡҩоит. Ауаҩы дхәыҷнаҵоуп ак аниурҵаша. Дхәыҷнаҵоуп уи игәеибафарақәа еиҳа ухы ианаурхәаша.

Иахьа рацәак ҳазмыргәырӷьо ҳҿар рхаҭарнакцәақәак рааӡараҿы абри аҩыза аус ахархәара шамамыз агәра згоит. Хархәагас иҟоу зегьы ҳрыцәхьамҵроуп урҭ рыжәлари рыԥсадгьыли бзиа ирбо еиҵаҳааӡарц.

Урҭ рыбзиабараҿы аҭыԥ ҷыда ааннакылалароуп аԥсуа бираҟ ахь АБЗИАБАРАГЬЫ.

Иара убас шәаԥхьар ҟалоит:

166

Заҟа гха ҳрыхдырԥарыз иажәа ҟәышқәа: Сергеи Багаԥшь игәалашәара иазкны

32
(ирҿыцуп 15:38 29.05.2020)
Аԥсны аҩбатәи ахада Сергеи Уасил-иԥа Багаԥшь иԥсҭазаара далҵижьҭеи иахьа иҵит жәшықәса. Уи игәалашәара аҳаҭыразы ишәыдаагалоит Sputnik аколумнист Светлана Ладариаԥҳа изылкыз анҵамҭа.

Аԥсны, аԥсуа дгьыл, аԥсуа жәлар ахааназгьы ибеиан. Ибеиан ҳәарада ԥсабарала, гала, шьхала… Аха зегь раасҭа ибеиан уаала, доуҳала, ҟәыӷарыла. Жәытә-натә аахыс ара аҳаҭыр дуун ауаҩра, аԥсуа икодекс хада - аламыс. Азқьышықәсақәа, ашәышықәсақәа ирылыхәхәа иаауа ажәабжьқәа, ашәақәа, алегендақәа реиҳарак зыхҳәааугьы абри ауп. Аха аҩыра ахьҳамамыз азгьы заҟа ирацәаҩузеишь аҭоурых аӡыблара зыхьӡқәа ҳцәагаз. Егьаҩ ҿырԥшыганы ҳадгьыл иқәын…

Аԥсны аҭоурых ҿыц аҿы зыжәлар рхьаа зхьаау, ирыдгылоу, ирывагылоу рыхьыӡқәа ԥхьаҟатәи аҭоурыхқәа, абиԥарақәа ирзынхоит. Уи насыԥуп зқьышықәса рышьҭахь аԥсуадгьыл иқәынхо аԥсуа изы. Иаашьҭыхны дрыԥхьалап аҩырақәа, дрыхәаԥшлап аҭыхымҭақәа – иеиҵеиааӡалап ихшара иахьатәи ҳауаажәлар рхаҭарнакцәа рҿырԥшала. Ирызҳалап аԥсуаа аԥсуадгьыл аҿы. Еизҳазыӷьалап. Уи ус шакәхо агәра згарц сҭахуп… Мап, агәра згоит! Анцәа ду иџьшьаны ус акәхоит!

Сергеи Багаԥшь... Уи ижәла, ишьҭра аханатә аахыс ахьӡ-аԥша змаз ауаа рылиаауан. Унеишь-уааишь ҳәа рарҳәон адунеи амаа зкыз. Иахьынхацәаз ԥырхагак рнамҭацызт, избанзар акы - анхаҩы Аԥсны еснагь аҳаҭыр ду даԥсан, ҩбагьы – ахшыҩи адырреи ирыҵадырӡуан акыр ихыҭхәыцыз асоциалтә еиҟарамрақәа.

© Foto / из архива семьи Багапш
Аԥсны аҩбатәи ахада Сергеи Багаԥшь

Ибзианы исгәалашәоит ХХ ашәышықәса 80-тәи ашықәсқәа. Ахааназ аӡәы зхы дықәызмыртәацыз аԥсуаа аамҭа-аамҭала усҟантәи аамҭа ирзаанагоз ауадаҩрақәа ирҿагылон, рҟәаҟәа иқәтәарц зҭахызгьы нхьыдыҩруан.

Ибзианы исгәалашәоит 1989-тәи ашықәс. Мҽышан. Аԥсны ахы-аҵыхәа иалаҩит аԥсуааи ақырҭқәеи еиҿагылт ҳәа. Ари аҭагылазаашьахь мышкызны ишкылнагоз зегьы ирдыруан, ирбон, аха еивысырҭак шԥаҟамлари ҳәа игәыӷуан.

Аԥсныҟа амҩа иқәлеит 30 нызқьҩык рҟынӡа зхыԥхьаӡара наӡоз ақырҭцәа, аратәи ақырҭцәа ирыдгыларц, еснагь ргәы иҵхоз нарыгӡарц. Еихышәшәа-еиԥышәшәа Аалӡга аӡиас ахықәаҿ еизеит ашәарыцага шәақьқәа ирыҵагылаз аԥсуаа.

Сергей Васильевич Багапш на охоте.
© Foto / из архива семьи Багапш
Сергеи Багаԥшь ашәарыцараан

Абри аҭагылазаашьаҿы араион аиҳабы иаҳасаб ала, апатриот иаша ишиаҭәаз еиԥш, Сергеи Уасил-иԥа хьаҳәхьачарак ҟамҵакәа ижәлар рыхьчара дгылеит. Усҟантәи аамҭазы уи аҩыза ихымҩаԥгашьа иара изы даара ишәарҭахар алшон. Аха усеиԥш акгьы дазымхәыцӡакәа ақырҭуа шовинизм аҿагылараҿы напхгара ҟаиҵеит. Ари аҭагылазаашьа ахаҵара аарԥшра аҭахын. Уи иара илиршеит. Сергеи Уасил-иԥа иусурҭаҭыԥ, ипартиатә лахәылара рцәыӡра адагьы иԥсҭазаара ахаҭагьы ицәыӡыр алшон… Аха уи иазхәыцтәны имшьеит усҟан азы. Ҳәарада, 1989 шықәсазтәи ахҭысқәа рышьҭахь Сергеи Багаԥшь иусура дамхын.

Ари иԥсҭазаараҟны дзықәшәақәаз рахьтә хҭыс заҵәык ауп, аха инеидкыланы дзакәыз аанарԥшуеит.

26 августа 2008 года - день, когда Россия признала независимость Абхазии. Сергей Багапш пришел на площадь Свободы в Сухуме, где тысячи граждан республики ликовали, узнав о признании.
ВЛАДИМИР ПОПОВ
Сергеи Багаԥшь Аҟәа Ахақәиҭра ашҭаҿы нанҳәа 26, 2008 шықәсазы - Урыстәыла Аԥсны аназханаҵа аҽны

Аԥсны Аџьынџьтәылатә еибашьраан иара дыззырхаз аус аҿы иԥышәа ахархәара аҭаны ашьаарҵәыра илагылаз ижәлар дрыцхраауан. Иҳәатәуп зны-зынла абџьар акра аасҭагьы ла иамбоз аусқәа ирылшоз анеиҳахоз. Иҳәатәуп урҭ аусқәагьы афырхаҵараҵәҟьа шырҭаххалоз.

Сергеи Багаԥшь иԥсҭазаара зегьы иԥсадгьыл амаҵ азура иазкын. Атәыла аԥыза-министрс даныҟаз аума, ахадас даныҟаз аума – иара изы зегьы ирыцкыз Аԥсны аизҳазыӷьара акәын.

Президенты Абхазии, России и Южной Осетии Сергей Багапш, Дмитрий Медведев и Эдуард Кокойты (слева направо). Архивное фото.
© Sputnik / Сергей Гунеев
Сергеи Багаԥшь, Дмитри Медведев, Едуард Какоиты Аԥсни Аахыҵ Уаԥстәылеи рхьыԥшымрақәа разхаҵара ашьҭахь

Дыҟамзар ҟалап аԥсыуак, иажәа ҟәанда змаҳацыз. "Мои золотые" – абар иара зегь раасҭа бзиа ибаны ииҳәоз. Ари баша цәажәарамызт.

Инаԥшьба: Сергеи Багаԥшь Кремль дышрыдыркылаз абара акыр иаԥсан>>

Дыздыруаз, дызгәалашәо зегьы ражәа аҟәандара алыжжуеит иӡбахә анырҳәо. Ари еиҳау иҟоузеи аԥсҭазаараҿы! Ажәлар шамахамзар ус баша рыбзиабара узаахәаӡом, иуоуӡом.

© Foto / Владимир Попов
Аԥсны раԥхьатәи ахада Владислав Арӡынбеи Аԥсны аҩбатәи ахада Сергеи Багаԥшьи

Ихьаауп, даара ихьаауп ҳаԥсуадгьыл иреиӷьӡақәоу ахьацәыӡуа. Заҟа иаҳҭахузеи урҭ иахьа?! Заҟа ҳгәы ҟанаҵарыз Сергеи Багаԥшь иччаԥшь. Заҟа гха ҳрыхдырԥарыз иажәа ҟәышқәа. Заҟантәгьы игәымшәара, ихаҵара ҳаззымиааиқәаз ҳариааиртә еиԥш рылдыршарыз. Заҟантә… Заҟантә…

Изыбымбылыз Џьгьардатәи адгьыл.

Валери Багаԥшь: Сергеи Багаԥшь игәгьы, иԥсгьы, ихгьы Џьгьардоуп иахьыҟаз>>

Ирҳәоит ауаҩытәыҩса дыззыҳәо зегь адунеитә ҵакыра иазцаны адгьыл ахь ихынҳәуеит ҳәа. Ҳиҳәап нас Анцәа ду ҳтәыла ахааназ иагымхаларц Сергеи Багаԥшь иеиԥш зеиԥшу аԥацәа…

Иара убас шәаԥхьар ҟалоит:

32

Аԥсабара уанеиҷаҳауа: Ерик Џьакониа ԥсаатәла Аԥсны абнара ширбеио

1825
(ирҿыцуп 22:00 25.05.2020)
Ауаҩи аԥсабареи аҵыхәтәантәи аамҭазы рхеибарҭәаара маҷхеит, ауаҩы схы иабасырхәари ҳәа ауп еиҳарак дхәыцуа дшалагаз, дызлахәаша акәымкәа. Аха Саида Жьиԥҳа дызҭааз Лӡаа ақыҭанхаҩы Ерик Џьакониа аԥсабара дацхраауеит - инапала ииааӡо абнакәытқәа Лӡаатәи абнақәа ирылаиҵоит.

Саида Жьиԥҳа, Sputnik

Ауаҩи аԥсабареи шеимадоу атәы ззымдыруада. Аха аҵыхәтәантәи аамҭазы ахеибарҭәаара маҷхеит. Ҳхы иабаҳархәари ҳәа ахәыцра ҳаналага, иаргьы ҳазгәамҵуашәа ҳбо ҳҟалеит. Иахьа зыӡбахә сымоу Лӡаа ақыҭанхаҩы Ерик Џьакониа аԥсабара аҿаԥхьа гәыԥҩык ауаа рхы ҿихит, иара хатәгәаԥхарала хышықәса раахыс икәша-мыкәша абнара ирбеиоит. Инапала иааӡо абнакәытқәа (афазанқәа - аред.) рхатә ԥсҭазаара риҭоит Лӡаатәи ахәыҳаракырақәа рҿы.

Ерик Џьакониа иашьцәеи урҭ рыхшареи бзиа ирбоит ашәарыцара, аԥсыӡкра. Аха убри инаваргыланы, Џьакониаа аԥсабара аҿаԥхьа ирықәу ауалгьы ршәоит.

© Sputnik
Џьакониаа рҭаацәара абнакәытқәа абнара ишыларҵо

Хышықәса раԥхьа, Ерик ҳамҭас изааргеит ҿыц ихыҵыз абнакәытқәа 30 цыра. Урҭ рҭыԥ ҟаҵаны, ҷыдала рыфатә-рыжәтә дацклаԥшуа иааӡеит. Ианрызҳа, ишынҭаацәаз ирыӡбеит аԥшӡара иакны иагоз Кавказтәи абнакәты ахкы ала Лӡаатәи абнақәа дырбеиарц.

"Раԥхьа исыдлаз абнакәытқәа ианрызҳа, акәтаӷь рҵо ианалага, сашьцәеи, ҳхәыҷқәеи иҳаӡбеит аинкубатор аахәаны, аԥшқақәа рхыхра, адуқәа абнахь роужьра. Ус иагьыҟаҳҵеит. Рхы ныҟәыргартә иҟоуп ҳәа анаҳгәахәуа, ақыҭа ахәыҳаракырақәа рахь ҳхаланы ахақәиҭра раҳҭеит. Аиаша шәасҳәап, унапала иааӡаны аԥсабара ҳамҭас ианауҭо - уи гәахәароуп, уал дук уқәны иушәазшәа уҟалоит", - еиҭеиҳәоит Ерик.

Ерик Џьакониа занааҭла декологуп. Аха аԥсабарахь имоу абзиабара уи ихәыҷрантәи иаауеит. Ашәаԥыџьаԥ, аԥстәы, аԥсаатә ҳаҭыр рзақәын ишынҭаацәаз.

Џьакониаа раԥхьатәи абнакәытқәа аноурыжь ашьҭахь, уи аҿы иаангылозма. Хышықәса рыла Ерик илихыз шәцырак рҟынӡа абна иарҭахьеит. Аԥсаатә ахақәиҭра арыҭара - ари ныҳәак ирзаҩызоуп. Уи хәыҷи-дуи алахәны ауп ишымҩаԥысуа.

© Foto / предоставлено Саидой Жиба
Џьакониаа рҭаацәара абнакәытқәа абнара ианыларҵо хәыҷи-дуи алахәуп

Ерик Џьакониа иажәақәа рыла, Кавказтәи абнакәытқәа аҩны ахылара рцәыуадаҩуп, избанзар бжьы ҷыдак раҳар ишәаны ихыҵуеит. Насгьы аҩнатә ԥсаатәқәеи аԥстәқәеи дареи еинаалом. Убри азы, аинкубатор аахәаны ихала иахәҭоу аԥхарреи ацәаакыреи арбаны ихихуеит.

"Абнакәты хыҵырц азы 25 мшы аҭахуп. Иҟалоит урҭ акәтаӷьқәа аҩнатә кәты, мамзаргьы ашәишәи иаҵоуҵар, аха аԥшқақәа анылҵлак, урҭ ҳзышьцылоу акәҷарақәеи ашәишәи хәыҷқәеи иреиԥшым, ршьапы ишаақәгылалак еилҟьа-еилӷәыцәӡа иҟалоит. Нас илызхуеи дареи еинаалом. Убри аҟнытә, аинкубатор еиҳа иманшәалоуп. Иахьынӡаԥшқоу ирҿоуҵар ауеит ахәац жәны, абысҭа алаҵаны, ашәишәиқәа ишруҭо еиԥш. Уажәы ирацәаӡоуп еиуеиԥшым авитаминқәа рыла ибеиоу аԥсаатә рыфатә, уи азы ирҿасҵари ҳәа ухәыцӡом", - иажәа иациҵоит иара.

© Foto / предоставлено Саидой Жиба
Аԥсаатә абна рылаҵара Џьакониаа рҭаацәара ныҳәак ирзаҩызоуп

Абнакәты ажьы акы иаламҩашьозаап, акралцәа рчыс ҳәа иашьҭоуп. Аха Ерик иҳәеит дара рҭаацәараҿы ирыцҳашьаны ишырымфо. Ирааӡогьы ҷыдала аԥсабара аҭара ауп изызку. Абнакәты арбаӷь еиҳа ԥшшәыла иҩычоуп, иԥшӡоуп, арцына ӷроуп.

Иахьазы Ерик Џьакониа имаз абнакәытқәа зегьы абнарахь иоуижьит. Аҳәаа шаадыртуа еиԥш игәы иҭоуп Урыстәылаҟа дцаны акәтаӷь аахәаны, ахк ҿыцқәа рылхра.

Аԥсабара иаҭоу абнакәытқәа лассы-лассы ақыҭауаа рынхарҭақәа рзааигәара ирбоит, иҟалалоит рыкәтыршәырқәа ианырҭало, аха дара урҭ рҭоурых рдыруеит аҟнытә, аԥхасҭа рырҭом. Аҭыԥантәи ашәарыцаҩцәа ракәзаргьы, ршәақь ақәрымкыцт. Уимоу, Ерик иахь аҭел иасны ирҳәоит иахьырбаз аҭыԥқәа. Изныкымкәа Бзыԥҭа аҩхааҟынгьы рылаԥш рықәшәахьеит.

Ерик иашьцәеи иареи рқыҭа иалсуа акәарақәа адыӷаҷиақәа рылагьы идырбеиахьеит. Урҭ ҷыдала Краснодар дцаны иааигеит. Аӡҭачқәа хкааны ирҭарҵахьеит аԥсыӡқәа апҟыш (карп), ақьоуқьад (осетр) хкқәа.

"Ҳара аӡәы дҵас иҳадимҵеит, ԥсаатәума, ԥстәума иааӡаны абнахь роужьра. Уи ҳара ҳхатә гәаԥхара ауп. Ҳазҿу аус иавагылоуп ҳахшарагьы", - инаҵишьит аеколог.

Џьакониаа рҭаацәара рҿырԥштәы иаҳнарбоит ауаҩы иҭаххар аԥсабара аԥсы ахаҵара шилшо. Аха, рыцҳарас иҟалаз, ас еиԥш агә ду зызҭоу ауаа рацәаҩым.

Иара убас шәаԥхьар ҟалоит:

1825

Ҟәбан даҽа 80 коронавирустә хҭыс ҿыц ашәҟәы иҭагалоуп

0
(ирҿыцуп 19:28 31.05.2020)
Иааидкыланы Краснодартәи атәылаҿацә аҟны COVID-19 ахҭысқәа 3824 ашәҟәы иҭагалоуп, урҭ рахьтә 225-ҩык ахәыҷқәа роуп.

АҞӘА, 31 - Sputnik. Краснодартәи атәылаҿацә аҟны даҽа 80 коронавирустә хҭыс ҿыц шьақәыргылоуп ҳәа адырра ҟанаҵоит Ҟәбан администрациа.

"Аҵыхәтәантәи уахыки-ҽнаки рыла Краснодар ачымазара рыдбалоуп 41-ҩык, Армавир – 11-ҩык, Шәача – быжьҩык, хҩык-хҩык егьырҭ араионқәа хәба рҟны. Ичмазаҩхаз рахьтә 52-ҩык аҳәсақәа роуп, 28-ҩык хацәқәоуп. Зегьы иреиҳабу 94 шықәса ихыҵуеит", – аҳәоит адырраҿы.

Ари амш иалагӡаны арегион аҟны иԥсҭазаара далҵит 70 шықәса ирҭагылаз COVID-19 зцәа иалаз ачымазаҩ. Иааидкыланы Краснодартәи атәылаҿацә аҟны ачымазара иахҟьаны иԥсыз рхыԥхьаӡара 32-ҩык рҟынӡа инаӡоит.

Акоронавирус аҟазшьақәа иреиԥшу зхы иадызбалаз 9648-ҩык ауааԥсыра ахәышәтәырҭақәа ирыдҵаалеит, урҭ рахьтә 91-ҩык хәыҷқәоуп. Рыхәышәтәра иацыцоит 2137-ҩык апациентцәа, урҭ рахьтә 214-ҩык зықәра намӡац роуп.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

0
Атемақәа:
Ачымазара ҿкы – акоронавирус Аԥсни адунеи аҿи: иалкаау