Геннади Аламиа

Геннади Аламиа: уԥсҭазаара зқәуҵоз анарха шаиуа агәра ануго - еиҳау акгьы ыҟаӡам

137
(ирҿыцуп 11:09 24.07.2019)
Апоет, ауаажәларратә, аполитикатә усзуҩ, "Ахьӡ-Аԥша" аорден аҩбатәи аҩаӡареи Нафи Џьусоиты ихьӡ зху Нхыҵ-Уаԥстәыла амилаҭтә премиеи занашьоу, Аԥсны аҳәынҭқарра агимн ажәақәа равтор, аԥсуа милаҭ-хақәиҭратә қәԥара акыр иазааԥсахьоу Геннади Аламиа иахьа ихыҵит 70 шықәса. Шәаԥхьарц ишәыдаагалоит Sputnik акорреспондент илиҭаз аинтервиу.

Cырма Ашәԥҳа, Sputnik

- Шәыԥсҭазаара иахьа аихшьаала ҟашәҵозар, иарбан лкаақәоу еиҳа иазгәашәҭо?

— Сыԥсҭазаара зегьы аихшьаала аҟаҵара салагом. Сыԥсҭазаара зегьы ааидкыланы иуҳәозар, схәыҷқәа, смаҭацәа санрызхәыцуа ауп. Насыԥ уадаҩ сыман сҳәарц сылшоит схы агәра зго, сшымаҭәахәу здыруа, уск саҿызар сара сыда уаҩы изыҟамҵошәа ахьысыԥхьаӡоз. Ус саныҟаз аибашьра аламҭалеи, аибашьра аамҭази, уи анаҩси рзы акәын. Уинахыс схы сгәалашәаӡом, ус иҟалеит аҭагылазаашьа. Ауаҩы дмаҭәахәны, даҽаӡә изыҟамҵо иара иус данаҿу, иҟаиҵо агәра аниго, уи агәыӷра анинаҭо ауп. Абзиара ҟаҵаны уажәшьҭан ирҳәап захьӡу акәым агәыӷра ҳәа сызҿу. Унапы злаку аус уанаҿу, уԥсҭазаара зқәуҵоз иахьала ишнымҵәо, уаҵәгьы анарха шаиуа агәра ануго убри еиҳау акгьы ыҟаӡам...

- Шәара аҳәынҭқарратә, ауаажәларратә усзуҩуп, аԥышәа ду шәымоуп, убри инаҷыданы, арҿиара, абаҩхатәра злоу уаҩык иаҳасабала шәаҳдыруеит. Арҿиара шәара шәзы ҭыԥс иааннакылои?

— Досу иара иус инапы алакызар даара ибзиоуп. Ҳара камбашьк ҳаман, ианықәҿаҳҳәалак ашаха акәнаршо, иакәнаршо иаҳцәыԥсхьан. Убри еиԥш, ԥхьаҟа ацара зыҟалаӡом досу иус данаҿым, џьара ҭыԥк аҿы ҳақәгьежьаалоит. Апоет дпоет дузар, уи иаанагаӡом аполитика усс имкааит ҳәа, аха иус хада даҿызар ауп, нас ауп ԥхьацара аныҟало. Арҿиара аганахьала иаҳҳәозар, ашәҟәқәа ҭсыжьхьеит. Исгәалашәоит раԥхьаӡатәи сышәҟәы "На рассвете" анҭыҵ Москва, Аԥсны хынтә иҭыҵхьан, аха уа иҭыҵаанӡа СССР ашәҟәыҩҩцәа ҿарацәа реилацәажәара салахәын, асеминар аҿы еилдыргон, анапхгаҩцәа дуӡӡақәа сыман: Фазиль Искандер, Леменев, Ваншенкин реиԥш иҟаз, убарҭ сышәҟәы ргәаԥхан, иҭыжьтәуп ҳәа азырыԥхьаӡеит. 800-ҩык рҟынӡа ашәҟәыҩҩцәа ҿарацәа еизаны иҟан, ҩыџьа ҳашәҟәқәа ҭыҵуа, СССР ашәҟәыҩҩцәа Реидгыла ҳалало убас иҟарҵеит. Убас иҭыҵхьан сышәҟәқәа, атәым бызшәақәа рахь еиҭаргахьан. Аха исзеиламыгӡо сааиуеит иахьа уажәраанӡагьы, исцәыӡыз рацәаӡоуп, схы иҭагьежьуа иҭаԥсыз рацәоуп, уигь сгәы иалоуп. Апоет ицназго иара идагьы даҽа мчқәак ыҟазар ауп. Аҳәынҭқарра аргылара иаҿыҵәҟьоу, занааҭла, маҵзурала иаҿу рыгәра ганы уара уус уаҿызар убри насыԥуп.

- Ауаҩытәыҩса иҟазшьақәа рахьынтә шәара еиҳа иалышәкаауеи, гәыла-ԥсыла еиҳа ишәзааигәои?

— Сара саншьак иҳәон: "амц саныржьои, ала ансыцҳауеи сцәымӷуп", - ҳәа. Ала сыцҳар еиҳа еиӷьысшьоит, амц саныржьо аасҭа. Уи сара сыржьеит ҳәа акәым, аха амцҳәарала хара неишьа ыҟаӡам. Амцҳәареи ацәгьаҳәареи ҟамлар, усҟан зегь маншәалахоит. Ауаҩытәыҩса иҟазшьа бааԥсқәа зегьы кажьны, зегь рыла ҳмаалықьцәаханы адәы ҳзықәлаӡом, уи иашоуп. Аха зыӡбахә сҳәаз аҩба даара исцәымӷуп.

- Ахатәы бызшәа - аԥсшәа иахышәҳәаауеи, ахархәара абанӡамоу?

— Схәыҷқәа аԥсшәа бзианы ирдыруеит. Смоҭеи сареи аԥсышәала ҳаицәажәо ҳашнеиуаз ԥҳәыск илбан, акыр иџьалшьеит. Аҭел дасны ус салҳәеит: "абас избаз сеигәырӷьаны сҩызак иахьласҳәаз, аҭакс "сыхшара аҽԥныҳәа садыргарц иҟоуп аԥсшәа ахьырзымдыруа", - ҳәа. Ари лара дзызхәыцыз, лхәыҷқәа аԥсшәа ахьырымҳәо азы илоуа аҽԥныҳәа ауп, уи дацәшәеит, ари збызшәа ззымдыруа иуаамкәан ишыҟало акәымкәа. Ахәыҷы данхәыҷу иурҵаз ихашҭӡом. Зегь зыбзоуроу аҭаацәа роуп.

- Шәара Аԥсуа гимн ажәақәа шәравторуп. Ԥхынгәымза 23, ишдыру еиԥш, Аԥсуа бираҟ иамш ныҳәоуп. Иҳашәҳәозеи ас еиԥш иҟоу аҭоурыхтә хҭыс азы?

— Ажәлар иртәу аелементқәа рацәаны иалоуп аԥсуа гимн. Иаҳҳәозар, "Шәнеибац, шәнеибац…" Арӡынба ихаҭа дахылаԥшуан, аҭоурых атәы зҳәо, иахьатәи амш атәы зҳәо, уаҵәтәи аԥеиԥш зегьы аныԥшуа иҟазар акәын, егьыҟалар акәын ус. Анцәа иелементқәагьы уа иҟоуп, зегьы алоуп. Икьаҿны иҟоу ыҟоуп, иауны иҟоу ыҟоуп, еилкаауп нас ус иҟоуп Агимнқәа зегьы. Агербгьы убас, абираҟгьы убас. Абираҟ ҵаҟа иаҵоу, аиаҵәа, ашкәакәа ҳәа ицо, убри Аконфедерациа атәоуп. Ашьхарыуаа Рреспублика 1918 ш. рзы ианыҟаз атәоуп иара, аԥсуаагьы убра ҳалан, убра иалоу ажәларқәа роуп, аполитиказы даҽакала иҳәоуп, аха раԥхьаӡа ишыҟаҵәҟьаз ус ауп. Аидгылара аелементқәа иртәын иара, избанзар абираҟ ахьҭагылоу иаҳзеиԥшны иныжьны, анапы ҳара ҳтәы уа иҭагылоуп, адыгаа дара ртәы ҭадыргыло, ауаԥсқәа дара ртәы ҭадыргыло, ачеченцәа дара ртәы ҭадыргыло, абас ҳахысырц маӡала иӡбаны иҳаман, аха иаҳзыҟамҵаӡеит, иамуит.

Ҳбираҟ ахьынтәиаауа, нас 1200 шықәса раԥхьатәи аҳәынҭқарра иатәыз абираҟ ианыз анапы аума, 18-тәи ашықәс аҟынтәи иаагоу аума, абас иҟоуп. Иҟазҵоз абаҩхатәра ду змаз ауаа ракәын, аханатә аидеиа абас иҟан. Абри зегьы зхысҳәаауа, абираҟқәа зегь раасҭа иԥшӡоуп ҳаԥсуа бираҟ, аха ус икны аныҟәара мацара азхаӡом, ҵакыс иамоу рдыруазароуп ауаа. Ари аҳәынҭқарра иасимволуп, аҳәынҭқарра идеиа хадас иамоу лабҿаба иузырбо шакәу дырны даара ҳаҭыр ақәҵатәуп, ԥсҭазаарас иҳамазароуп.

- Шәара иахьа шәирамшуп. Ишәыдысныҳәалоит, агәабзиареи, арҿиаратә гәацԥыҳәареи шәзеиӷьасшьоит! Шәышԥазыҟоу, ишԥазгәашәҭои ари амш?

— Иҭабуп! Сара сымшира азгәасҭаӡом. Аха, сара сымшира зегь раасҭа ҳаҭыр ақәҵаны бзиа изызбо, хәышықәса раԥхьа ашьыжь шаанӡа аҭел исзасит. Аԥсуа радио ала адырраҭара цон сара исызкны, ишцоз акәымкәа иааҟәыҵын ус рҳәеит: "идаҳныҳәалоит, амоҭа диоуит!" — ҳәа. Диит смоҭа Нариа. Нариа Ламиаԥҳа хәышықәса лхыҵит иахьа. Ари сара сҳамҭа лоуп. Ларгьы ус лҳәоит: "сара уҳамҭа соуп" — ҳәа. "Бара бымир, хыхьынтә Анцәа бааимышьҭыр исыхьуааз" — анысҳәалак, "уԥсуан дадука" — лҳәоит. Сара иџьасшьоит, абри аира амшқәа аназгәарҭо 70-80 шықәса схыҵит ҳәа, уи еиҳа ҿымҭӡакәа убжьы мыргаӡакәа аҩны утәазар еиҳа еиӷьуп. Даара иныҳәа дуны излауԥхьаӡари, уажәит ауп иаанаго уи. Аха сара сеигәырӷьоит, смоҭацәа сахьрылаԥшуа.

Иара убас шәаԥхьар ҟалоит:

137

Заҟа гха ҳрыхдырԥарыз иажәа ҟәышқәа: Сергеи Багаԥшь игәалашәара иазкны

32
(ирҿыцуп 15:38 29.05.2020)
Аԥсны аҩбатәи ахада Сергеи Уасил-иԥа Багаԥшь иԥсҭазаара далҵижьҭеи иахьа иҵит жәшықәса. Уи игәалашәара аҳаҭыразы ишәыдаагалоит Sputnik аколумнист Светлана Ладариаԥҳа изылкыз анҵамҭа.

Аԥсны, аԥсуа дгьыл, аԥсуа жәлар ахааназгьы ибеиан. Ибеиан ҳәарада ԥсабарала, гала, шьхала… Аха зегь раасҭа ибеиан уаала, доуҳала, ҟәыӷарыла. Жәытә-натә аахыс ара аҳаҭыр дуун ауаҩра, аԥсуа икодекс хада - аламыс. Азқьышықәсақәа, ашәышықәсақәа ирылыхәхәа иаауа ажәабжьқәа, ашәақәа, алегендақәа реиҳарак зыхҳәааугьы абри ауп. Аха аҩыра ахьҳамамыз азгьы заҟа ирацәаҩузеишь аҭоурых аӡыблара зыхьӡқәа ҳцәагаз. Егьаҩ ҿырԥшыганы ҳадгьыл иқәын…

Аԥсны аҭоурых ҿыц аҿы зыжәлар рхьаа зхьаау, ирыдгылоу, ирывагылоу рыхьыӡқәа ԥхьаҟатәи аҭоурыхқәа, абиԥарақәа ирзынхоит. Уи насыԥуп зқьышықәса рышьҭахь аԥсуадгьыл иқәынхо аԥсуа изы. Иаашьҭыхны дрыԥхьалап аҩырақәа, дрыхәаԥшлап аҭыхымҭақәа – иеиҵеиааӡалап ихшара иахьатәи ҳауаажәлар рхаҭарнакцәа рҿырԥшала. Ирызҳалап аԥсуаа аԥсуадгьыл аҿы. Еизҳазыӷьалап. Уи ус шакәхо агәра згарц сҭахуп… Мап, агәра згоит! Анцәа ду иџьшьаны ус акәхоит!

Сергеи Багаԥшь... Уи ижәла, ишьҭра аханатә аахыс ахьӡ-аԥша змаз ауаа рылиаауан. Унеишь-уааишь ҳәа рарҳәон адунеи амаа зкыз. Иахьынхацәаз ԥырхагак рнамҭацызт, избанзар акы - анхаҩы Аԥсны еснагь аҳаҭыр ду даԥсан, ҩбагьы – ахшыҩи адырреи ирыҵадырӡуан акыр ихыҭхәыцыз асоциалтә еиҟарамрақәа.

© Foto / из архива семьи Багапш
Аԥсны аҩбатәи ахада Сергеи Багаԥшь

Ибзианы исгәалашәоит ХХ ашәышықәса 80-тәи ашықәсқәа. Ахааназ аӡәы зхы дықәызмыртәацыз аԥсуаа аамҭа-аамҭала усҟантәи аамҭа ирзаанагоз ауадаҩрақәа ирҿагылон, рҟәаҟәа иқәтәарц зҭахызгьы нхьыдыҩруан.

Ибзианы исгәалашәоит 1989-тәи ашықәс. Мҽышан. Аԥсны ахы-аҵыхәа иалаҩит аԥсуааи ақырҭқәеи еиҿагылт ҳәа. Ари аҭагылазаашьахь мышкызны ишкылнагоз зегьы ирдыруан, ирбон, аха еивысырҭак шԥаҟамлари ҳәа игәыӷуан.

Аԥсныҟа амҩа иқәлеит 30 нызқьҩык рҟынӡа зхыԥхьаӡара наӡоз ақырҭцәа, аратәи ақырҭцәа ирыдгыларц, еснагь ргәы иҵхоз нарыгӡарц. Еихышәшәа-еиԥышәшәа Аалӡга аӡиас ахықәаҿ еизеит ашәарыцага шәақьқәа ирыҵагылаз аԥсуаа.

Сергей Васильевич Багапш на охоте.
© Foto / из архива семьи Багапш
Сергеи Багаԥшь ашәарыцараан

Абри аҭагылазаашьаҿы араион аиҳабы иаҳасаб ала, апатриот иаша ишиаҭәаз еиԥш, Сергеи Уасил-иԥа хьаҳәхьачарак ҟамҵакәа ижәлар рыхьчара дгылеит. Усҟантәи аамҭазы уи аҩыза ихымҩаԥгашьа иара изы даара ишәарҭахар алшон. Аха усеиԥш акгьы дазымхәыцӡакәа ақырҭуа шовинизм аҿагылараҿы напхгара ҟаиҵеит. Ари аҭагылазаашьа ахаҵара аарԥшра аҭахын. Уи иара илиршеит. Сергеи Уасил-иԥа иусурҭаҭыԥ, ипартиатә лахәылара рцәыӡра адагьы иԥсҭазаара ахаҭагьы ицәыӡыр алшон… Аха уи иазхәыцтәны имшьеит усҟан азы. Ҳәарада, 1989 шықәсазтәи ахҭысқәа рышьҭахь Сергеи Багаԥшь иусура дамхын.

Ари иԥсҭазаараҟны дзықәшәақәаз рахьтә хҭыс заҵәык ауп, аха инеидкыланы дзакәыз аанарԥшуеит.

26 августа 2008 года - день, когда Россия признала независимость Абхазии. Сергей Багапш пришел на площадь Свободы в Сухуме, где тысячи граждан республики ликовали, узнав о признании.
ВЛАДИМИР ПОПОВ
Сергеи Багаԥшь Аҟәа Ахақәиҭра ашҭаҿы нанҳәа 26, 2008 шықәсазы - Урыстәыла Аԥсны аназханаҵа аҽны

Аԥсны Аџьынџьтәылатә еибашьраан иара дыззырхаз аус аҿы иԥышәа ахархәара аҭаны ашьаарҵәыра илагылаз ижәлар дрыцхраауан. Иҳәатәуп зны-зынла абџьар акра аасҭагьы ла иамбоз аусқәа ирылшоз анеиҳахоз. Иҳәатәуп урҭ аусқәагьы афырхаҵараҵәҟьа шырҭаххалоз.

Сергеи Багаԥшь иԥсҭазаара зегьы иԥсадгьыл амаҵ азура иазкын. Атәыла аԥыза-министрс даныҟаз аума, ахадас даныҟаз аума – иара изы зегьы ирыцкыз Аԥсны аизҳазыӷьара акәын.

Президенты Абхазии, России и Южной Осетии Сергей Багапш, Дмитрий Медведев и Эдуард Кокойты (слева направо). Архивное фото.
© Sputnik / Сергей Гунеев
Сергеи Багаԥшь, Дмитри Медведев, Едуард Какоиты Аԥсни Аахыҵ Уаԥстәылеи рхьыԥшымрақәа разхаҵара ашьҭахь

Дыҟамзар ҟалап аԥсыуак, иажәа ҟәанда змаҳацыз. "Мои золотые" – абар иара зегь раасҭа бзиа ибаны ииҳәоз. Ари баша цәажәарамызт.

Инаԥшьба: Сергеи Багаԥшь Кремль дышрыдыркылаз абара акыр иаԥсан>>

Дыздыруаз, дызгәалашәо зегьы ражәа аҟәандара алыжжуеит иӡбахә анырҳәо. Ари еиҳау иҟоузеи аԥсҭазаараҿы! Ажәлар шамахамзар ус баша рыбзиабара узаахәаӡом, иуоуӡом.

© Foto / Владимир Попов
Аԥсны раԥхьатәи ахада Владислав Арӡынбеи Аԥсны аҩбатәи ахада Сергеи Багаԥшьи

Ихьаауп, даара ихьаауп ҳаԥсуадгьыл иреиӷьӡақәоу ахьацәыӡуа. Заҟа иаҳҭахузеи урҭ иахьа?! Заҟа ҳгәы ҟанаҵарыз Сергеи Багаԥшь иччаԥшь. Заҟа гха ҳрыхдырԥарыз иажәа ҟәышқәа. Заҟантәгьы игәымшәара, ихаҵара ҳаззымиааиқәаз ҳариааиртә еиԥш рылдыршарыз. Заҟантә… Заҟантә…

Изыбымбылыз Џьгьардатәи адгьыл.

Валери Багаԥшь: Сергеи Багаԥшь игәгьы, иԥсгьы, ихгьы Џьгьардоуп иахьыҟаз>>

Ирҳәоит ауаҩытәыҩса дыззыҳәо зегь адунеитә ҵакыра иазцаны адгьыл ахь ихынҳәуеит ҳәа. Ҳиҳәап нас Анцәа ду ҳтәыла ахааназ иагымхаларц Сергеи Багаԥшь иеиԥш зеиԥшу аԥацәа…

Иара убас шәаԥхьар ҟалоит:

32

Аԥсабара уанеиҷаҳауа: Ерик Џьакониа ԥсаатәла Аԥсны абнара ширбеио

1825
(ирҿыцуп 22:00 25.05.2020)
Ауаҩи аԥсабареи аҵыхәтәантәи аамҭазы рхеибарҭәаара маҷхеит, ауаҩы схы иабасырхәари ҳәа ауп еиҳарак дхәыцуа дшалагаз, дызлахәаша акәымкәа. Аха Саида Жьиԥҳа дызҭааз Лӡаа ақыҭанхаҩы Ерик Џьакониа аԥсабара дацхраауеит - инапала ииааӡо абнакәытқәа Лӡаатәи абнақәа ирылаиҵоит.

Саида Жьиԥҳа, Sputnik

Ауаҩи аԥсабареи шеимадоу атәы ззымдыруада. Аха аҵыхәтәантәи аамҭазы ахеибарҭәаара маҷхеит. Ҳхы иабаҳархәари ҳәа ахәыцра ҳаналага, иаргьы ҳазгәамҵуашәа ҳбо ҳҟалеит. Иахьа зыӡбахә сымоу Лӡаа ақыҭанхаҩы Ерик Џьакониа аԥсабара аҿаԥхьа гәыԥҩык ауаа рхы ҿихит, иара хатәгәаԥхарала хышықәса раахыс икәша-мыкәша абнара ирбеиоит. Инапала иааӡо абнакәытқәа (афазанқәа - аред.) рхатә ԥсҭазаара риҭоит Лӡаатәи ахәыҳаракырақәа рҿы.

Ерик Џьакониа иашьцәеи урҭ рыхшареи бзиа ирбоит ашәарыцара, аԥсыӡкра. Аха убри инаваргыланы, Џьакониаа аԥсабара аҿаԥхьа ирықәу ауалгьы ршәоит.

© Sputnik
Џьакониаа рҭаацәара абнакәытқәа абнара ишыларҵо

Хышықәса раԥхьа, Ерик ҳамҭас изааргеит ҿыц ихыҵыз абнакәытқәа 30 цыра. Урҭ рҭыԥ ҟаҵаны, ҷыдала рыфатә-рыжәтә дацклаԥшуа иааӡеит. Ианрызҳа, ишынҭаацәаз ирыӡбеит аԥшӡара иакны иагоз Кавказтәи абнакәты ахкы ала Лӡаатәи абнақәа дырбеиарц.

"Раԥхьа исыдлаз абнакәытқәа ианрызҳа, акәтаӷь рҵо ианалага, сашьцәеи, ҳхәыҷқәеи иҳаӡбеит аинкубатор аахәаны, аԥшқақәа рхыхра, адуқәа абнахь роужьра. Ус иагьыҟаҳҵеит. Рхы ныҟәыргартә иҟоуп ҳәа анаҳгәахәуа, ақыҭа ахәыҳаракырақәа рахь ҳхаланы ахақәиҭра раҳҭеит. Аиаша шәасҳәап, унапала иааӡаны аԥсабара ҳамҭас ианауҭо - уи гәахәароуп, уал дук уқәны иушәазшәа уҟалоит", - еиҭеиҳәоит Ерик.

Ерик Џьакониа занааҭла декологуп. Аха аԥсабарахь имоу абзиабара уи ихәыҷрантәи иаауеит. Ашәаԥыџьаԥ, аԥстәы, аԥсаатә ҳаҭыр рзақәын ишынҭаацәаз.

Џьакониаа раԥхьатәи абнакәытқәа аноурыжь ашьҭахь, уи аҿы иаангылозма. Хышықәса рыла Ерик илихыз шәцырак рҟынӡа абна иарҭахьеит. Аԥсаатә ахақәиҭра арыҭара - ари ныҳәак ирзаҩызоуп. Уи хәыҷи-дуи алахәны ауп ишымҩаԥысуа.

© Foto / предоставлено Саидой Жиба
Џьакониаа рҭаацәара абнакәытқәа абнара ианыларҵо хәыҷи-дуи алахәуп

Ерик Џьакониа иажәақәа рыла, Кавказтәи абнакәытқәа аҩны ахылара рцәыуадаҩуп, избанзар бжьы ҷыдак раҳар ишәаны ихыҵуеит. Насгьы аҩнатә ԥсаатәқәеи аԥстәқәеи дареи еинаалом. Убри азы, аинкубатор аахәаны ихала иахәҭоу аԥхарреи ацәаакыреи арбаны ихихуеит.

"Абнакәты хыҵырц азы 25 мшы аҭахуп. Иҟалоит урҭ акәтаӷьқәа аҩнатә кәты, мамзаргьы ашәишәи иаҵоуҵар, аха аԥшқақәа анылҵлак, урҭ ҳзышьцылоу акәҷарақәеи ашәишәи хәыҷқәеи иреиԥшым, ршьапы ишаақәгылалак еилҟьа-еилӷәыцәӡа иҟалоит. Нас илызхуеи дареи еинаалом. Убри аҟнытә, аинкубатор еиҳа иманшәалоуп. Иахьынӡаԥшқоу ирҿоуҵар ауеит ахәац жәны, абысҭа алаҵаны, ашәишәиқәа ишруҭо еиԥш. Уажәы ирацәаӡоуп еиуеиԥшым авитаминқәа рыла ибеиоу аԥсаатә рыфатә, уи азы ирҿасҵари ҳәа ухәыцӡом", - иажәа иациҵоит иара.

© Foto / предоставлено Саидой Жиба
Аԥсаатә абна рылаҵара Џьакониаа рҭаацәара ныҳәак ирзаҩызоуп

Абнакәты ажьы акы иаламҩашьозаап, акралцәа рчыс ҳәа иашьҭоуп. Аха Ерик иҳәеит дара рҭаацәараҿы ирыцҳашьаны ишырымфо. Ирааӡогьы ҷыдала аԥсабара аҭара ауп изызку. Абнакәты арбаӷь еиҳа ԥшшәыла иҩычоуп, иԥшӡоуп, арцына ӷроуп.

Иахьазы Ерик Џьакониа имаз абнакәытқәа зегьы абнарахь иоуижьит. Аҳәаа шаадыртуа еиԥш игәы иҭоуп Урыстәылаҟа дцаны акәтаӷь аахәаны, ахк ҿыцқәа рылхра.

Аԥсабара иаҭоу абнакәытқәа лассы-лассы ақыҭауаа рынхарҭақәа рзааигәара ирбоит, иҟалалоит рыкәтыршәырқәа ианырҭало, аха дара урҭ рҭоурых рдыруеит аҟнытә, аԥхасҭа рырҭом. Аҭыԥантәи ашәарыцаҩцәа ракәзаргьы, ршәақь ақәрымкыцт. Уимоу, Ерик иахь аҭел иасны ирҳәоит иахьырбаз аҭыԥқәа. Изныкымкәа Бзыԥҭа аҩхааҟынгьы рылаԥш рықәшәахьеит.

Ерик иашьцәеи иареи рқыҭа иалсуа акәарақәа адыӷаҷиақәа рылагьы идырбеиахьеит. Урҭ ҷыдала Краснодар дцаны иааигеит. Аӡҭачқәа хкааны ирҭарҵахьеит аԥсыӡқәа апҟыш (карп), ақьоуқьад (осетр) хкқәа.

"Ҳара аӡәы дҵас иҳадимҵеит, ԥсаатәума, ԥстәума иааӡаны абнахь роужьра. Уи ҳара ҳхатә гәаԥхара ауп. Ҳазҿу аус иавагылоуп ҳахшарагьы", - инаҵишьит аеколог.

Џьакониаа рҭаацәара рҿырԥштәы иаҳнарбоит ауаҩы иҭаххар аԥсабара аԥсы ахаҵара шилшо. Аха, рыцҳарас иҟалаз, ас еиԥш агә ду зызҭоу ауаа рацәаҩым.

Иара убас шәаԥхьар ҟалоит:

1825

Ҟәбан даҽа 80 коронавирустә хҭыс ҿыц ашәҟәы иҭагалоуп

0
(ирҿыцуп 19:28 31.05.2020)
Иааидкыланы Краснодартәи атәылаҿацә аҟны COVID-19 ахҭысқәа 3824 ашәҟәы иҭагалоуп, урҭ рахьтә 225-ҩык ахәыҷқәа роуп.

АҞӘА, 31 - Sputnik. Краснодартәи атәылаҿацә аҟны даҽа 80 коронавирустә хҭыс ҿыц шьақәыргылоуп ҳәа адырра ҟанаҵоит Ҟәбан администрациа.

"Аҵыхәтәантәи уахыки-ҽнаки рыла Краснодар ачымазара рыдбалоуп 41-ҩык, Армавир – 11-ҩык, Шәача – быжьҩык, хҩык-хҩык егьырҭ араионқәа хәба рҟны. Ичмазаҩхаз рахьтә 52-ҩык аҳәсақәа роуп, 28-ҩык хацәқәоуп. Зегьы иреиҳабу 94 шықәса ихыҵуеит", – аҳәоит адырраҿы.

Ари амш иалагӡаны арегион аҟны иԥсҭазаара далҵит 70 шықәса ирҭагылаз COVID-19 зцәа иалаз ачымазаҩ. Иааидкыланы Краснодартәи атәылаҿацә аҟны ачымазара иахҟьаны иԥсыз рхыԥхьаӡара 32-ҩык рҟынӡа инаӡоит.

Акоронавирус аҟазшьақәа иреиԥшу зхы иадызбалаз 9648-ҩык ауааԥсыра ахәышәтәырҭақәа ирыдҵаалеит, урҭ рахьтә 91-ҩык хәыҷқәоуп. Рыхәышәтәра иацыцоит 2137-ҩык апациентцәа, урҭ рахьтә 214-ҩык зықәра намӡац роуп.

Акоронавирус иадҳәалоу ажәабжьқәа зегьы шәрыԥхьар ҟалоит абра>>

0
Атемақәа:
Ачымазара ҿкы – акоронавирус Аԥсни адунеи аҿи: иалкаау