Дырмит Гәлиа иҩны-музеи

Иара ихәышҭаара: Дырмит Гәлиа иҩны-музеи 45 шықәса ахыҵра иазкны

41
(ирҿыцуп 16:48 23.09.2019)
Дырмит Гәлиа иҩны-музеи 45 шықәса ахыҵра аҽны Sputnik акорреспондент Аинар Ҷыҭанаа ҩаԥхьа днеит ари ахәышҭаарахьы. Иара иҳадигалоит амузеи аиҿкаара зыбзоуроу, сасцәа дахьқәас иаҭаахьоу, аҭоурых змоу експонатқәас уа ицәыргоу, насгьы уадаҩрақәас изҭагылоу ртәы.

Аинар Ҷыҭанаа, Sputnik

Харантәи иааиз сасра

"Ара дынхон, аусгьы иуан зфырхаҵара џьашьатәу, збаҩхатәра ҳараку, аԥхарра ду зҵоу ауаҩы… Иара иахьагьы ара дтәаны иҩызцәа дырзыԥшызшәа сгәы иабоит. Урҭ ари аҩнаҿы еснагь ирацәаҩызаауеит – абиԥаралеи милаҭлеи еиуеиԥшымкәа. Дара кыршықәса Дырмит Гәлиа иахь сасра иаалоит", - Константин Симонов абарҭ ицәаҳәақәа рыла иаатуеит Д.И. Гәлиа иҩны-музеи азеиӷьашьарақәа рышәҟәы.

Ара иара убас иуԥылоит Евтушенко, Козакова, Окуџьава реиԥш иҟоу, адунеи зыхьӡ ахыҵәахьоу ашәҟәыҩҩцәа, апоетцәа, ауаажәларратә усзуҩцәа аӡәырҩы рнапынҵамҭақәа. Амузеи анапхгара изларҳәаз ала, кыршықәса раахыс зҭыжьра рҭахыз ари аизга сынтәа акьыԥхь абараны иҟоуп.

Дом-музей Дмитрия Гулиа
© Sputnik / Айнар Читанава
Булат Окуџьава Гәлиа иҩны-музеи азеиӷьашьарақәа рышәҟәаҿы иаанижьыз анҵамҭа

Аԥсуа милаҭтә литература апатриарх, жәлар рпоет Дырмит Гәлиа 1960 шықәсазы иԥсҭазаара даналҵ, 1912 шықәса раахыс дахьынхоз иҩны амузеи алхзарц азыӡбан. Уи азы адгылара ҟалҵеит иԥшәма Елена Бжалаа. Ари аус иадԥхьалан Урыстәылантәи аспециалистцәа: апроект автор - Марк Горелик, асценарист - Инна Наровлианскаиа. 1974 шықәса цәыббрамза 22 аҽны иаартын Д.И. Гәлиа иҩны-музеи.

Амузеи афондқәа рҟны иҟоу аматериал шамахамзар зегьы Дырмит Гәлиа иҭаацәа рҟынтәи ироуз ауп. Урҭ зегьы реидкылара, реихшара знапы алакыз иреиуан: Таҷ Гыцба, Гиви Агрба, Геннади Аламиа, еиуеиԥшым аамҭақәа рзы амузеи напхгара азҭоз Еҭери Коӷониаԥҳа, Наҭелла Џьичоева уҳәа. Д.И. Гәлиа иҩны-музеи аиҳабы Светлана Корсаиаԥҳа лажәақәа рыла, аӡәы ихала арахь данымҩахыҵуагьы, агәаҳәара имазар, аекскурсиа изымҩаԥыргоит.

Амузеи адырра зҭаху уи "аӡәы" иахьала сара шсакәыз анысҳәа, аа-шықәса раахыс аекскурсиа амҩаԥгаҩыс ари ахыбраҿы аус зухьо Елла Ҭаниаԥҳа днасаԥызеит.

Иҭоурых – ажәытәӡа иалоуп

45 шықәса раԥхьатәи ауадақәа рырхиашьа иахьагьы аҩны-музеи аҩнуҵҟа еиқәырхоуп. Апоет ари аҩнаҿы данынхоз аамҭазтәи аҩнымаҭәа досу рҭыԥқәа рҟны ишгылоу ала, иацы акәушәа уааҟалоит аԥшәма инхарҭа анынижьыз.

© Sputnik / Томас Тхайцук
Дом-музей Дмитрия Гулиа

Иван Ҭарба ажәеинраала зхиҳәааз Дырмит Гәлиа иҟәардә дугьы улаԥш нақәшәоит, аҩбатәи аихагылаҟны иҟоу апоет иусурҭатә уада аҩналарҭаҿы.

Дом-музей Дмитрия Гулиа
© Sputnik / Айнар Читанава
Дом-музей Дмитрия Гулиа

Ауада ахаҭа мемориалтә музеиуп, избан акәзар Дырмит Гәлиа аракәын иаамҭа аиҳарак ахьихигоз. Агәҭахьшәа игылоуп апоет ихы иаирхәоз арҿиаратә мыругақәа зқәу астол ду. Ари ауадаҿы имаҷымкәа арҿиаҩы ишәҟәқәа еизгоуп, авторс дызмоу реиԥш, адунеитә литература аҟнытә дзыԥхьоз авторцәа рҩымҭақәагьы.

© Sputnik / Томас Тхайцук
Дом-музей Дмитрия Гулиа

Акәакьахьшәа улаԥш ақәшәоит 1925 шықәсазы Дырмит Гәлиа Қарҭ иҭижьыз "Аԥсны аҭоурых", астол иқәуп Мушьни Лашәриа еиҭаҭыжьны амузеи ҳамҭас иаиҭаз Аԥшьаҩыра ашәҟәы, Дырмит Гәлиа иԥа Гьаргь инапынҵамҭа ацҵаны ҳамҭас ииҭахьаз Гиоте "и-Фауст". Астол азааигәара игылоуп ашәҟәыҩҩы имаҭа хәыҷ изы иааихәахьаз апианино. Уа иқәгылоуп ари аҭаацәара ду афотосахьақәа.

Амемориалтә музеи ааныжьны узыҩнало асасааирҭа еизыхәхәаҿы еизгоуп еиуеиԥшым аамҭақәа рзы Дырмит Гәлиа хыԥхьаӡара рацәала ауаа ирҭоз аҳамҭақәеи агәаларшәагақәеи. Зегь раԥхьагьы улаԥш нақәшәоит апоет, апрозаик Константин Симонов 1954 шықәсазы Дырмит Гәлиа ҳамҭас ииҭаз китаитәи ашәындыҟәра. Иара убас 1967 шықәсазы А.С. Пушкин ихьӡ зху Ленинградтәи амузеи ахьӡала аԥсуа литература ашьаҭаркҩы ҳамҭас ианаишьаз иажәеинраалақәа реизга болгар бызшәала. Иҟоуп афонд иацәыӡыз аҳамҭақәагьы. Иаҳҳәап, ашәҟәыҩҩы Васили Ажаев иҟынтәи Гәлиа иоухьаз аҩыгақәеи ахьтәы ԥсыӡи Аџьынџьтәылатә еибашьраан ибжьаӡит.

© Sputnik / Томас Тхайцук
Дом-музей Дмитрия Гулиа

Аҳамҭақәа руада уаныҩныслакь, уҩналоит асабрада ауада. Аекскурсиамҩаԥгаҩ Елла Ҭаниаԥҳа лажәақәа рыла, амузеи иаҭаауа ашколхәыҷқәа ҷыдала ари ауада иазҿлымҳауп, иазҵаауеит уи аҭоурых.

"Зыжәлар бзиа еицырбоз рнапы дықәыргыланы дшынаскьаргоз зныԥшуа афотосахьақәа адунеитә музеиқәа жәпакы рҟны иалкаау ауада азыркуеит. Ҳаргьы уи ақьабз ҳацныҟәеит", - исеиллыркаауеит Елла Владимир-иԥҳа. Ауада ҭшәоуп, агәҭаҵәҟьа ишкәакәаӡа иааԥшуеит Дырмит Гәлиа ихаҿсахьа, уи ашьапаҟны цырак ашәҭ каршәуп, наҟ-ааҟ аҭыӡқәа рҿы икнаҳауп ҩ-фотосахьак. Ажәакала, аҭааҩ иаҳасабала кыраамҭа асабрада ауадаҿы аанхара уеизгьы-уеизгьы исҭахымхеит.

© Sputnik / Айнар Читанава
Дом-музей Дмитрия Гулиа

Ҳаҩналеит актәи ацәыргақәҵатә уада. Уа ирацәан аԥсуа нхаҩцәа рыбзазашьаҟны, рыкҿаҩраҟны рхы иадырхәоз амаҭәарқәа: амҵәышә, агәыгәым, аирыӡ, аныга, акамбашь атәыҩа иалху амҳаҵәқәа уҳәа. Урҭ рхыԥхьаӡараҟынтә акы-ҩба амузеи аусзуҩцәа ирыцааит, аха реиҳарак аамҭала аҳәынҭқарратә музеи аҟынтәи иааган. Убасгьы актәи ауадаҿы ицәыргақәҵоуп жәлар рмузыкатә рҳәагақәагьы: аԥхьарца, аҩымаа, ахмаҷыр. Аха ихаданы, ара иҟоуп Дырмит Гәлиа инапала ииҩхьаз инысымҩа зну абӷьыц, амҳаџьырра агәаҟрақәа зныԥшуа аҭыхымҭақәа.

Дом-музей Дмитрия Гулиа
© Sputnik / Айнар Читанава
Дом-музей Дмитрия Гулиа

Ари ауадаҿы иҟоуп 1863 шықәсазы Дырмит Гәлиа Ашьхарыуаа рышкол данаанахәаз аамҭазтәи аҭыхымҭа, уа рҵаҩыс иоуз Константин Маҷавариани ифотосахьа, иара убас Дырмит Гәлиа ишколтә хәшьарақәа зну абӷьыц.

Аҩбатәи ацәыргақәҵатә зал, Дырмит Гәлиа иԥацәа ҩыџьеи иԥҳаи рыԥсы ахьыршьоз ауада акәын. Ара избаз аҟнытә зегь раасҭа сылаԥш адхалеит аҳәса ркәадыр. Елла Владимир-иԥҳа лажәақәа рыла, ари аҩыза акәадыр аҽықәтәараан Дырмит Гәлиа иԥшәмаԥҳәыс лхы иалырхәон. Аха уигьы аибашьраан ибжьаӡит аҟнытә, шықәсқәак раԥхьа амузеи анапхгара акәадыр ҿыц ҿаҵаны иаархәар акәхеит.

© Sputnik / Томас Тхайцук
Дом-музей Дмитрия Гулиа

Ахԥатәи ацәыргақәҵатә уадаҿы, егьырҭ зегьы рҟнеиԥш аекспонатқәа рацәоуп, аха зегьы ирылкаатәуп 1912 шықәсазы Дырмит Гәлиа Қарҭ иҭижьыз "Ажәеинраалақәеи ахьӡыртәрақәеи". Ара ицәыргақәҵоуп Дырмит Гәлиа еиҳа иаликаауаз аҳәаанырцәтәи авторцәа рышәҟәқәагьы. Урҭ рхыԥхьаӡараҿы: Жуковски, Короленко, Кольцов уҳәа. Аҩны-музеи аҩнуҵҟа аекскурсиа актәи аихагылаҿы иҟоу аилатәаратә уадаҿы инҵәоит.

Дом-музей Дмитрия Гулиа
© Sputnik / Айнар Читанава
Дом-музей Дмитрия Гулиа

Уаҵәтәи аԥеиԥш

Москватәи ахәаахәҭра-цәыргақәҵатә центр "Манеж" аҟны сынтәа имҩаԥгаз жәларбжьаратәи амузеитә цәыргақәҵа иалахәын Д.И.Гәлиа ихьӡ зху аҩны-амузеигьы. Амузеи анапхгаҩы Светлана Корсаиаԥҳа лажәақәа рыла, ацәыргақәҵа Дырмит Гәлиа 145 шықәса ихыҵреи амузеи 45 шықәса ахыҵреи ирызкын.

Иара убас, Светлана Винор-иԥҳа иазгәалҭеит амузеи ахыбра аиҭарҿыцра аҭахны иҟоижьҭеи акыр шааҵуа, аха шықәсырацәала ари апроблема қәнагала хырҩа шаҭам. Лара илҳәеит амузеи акәша-мыкәша акультуратә хыбра иақәнагоу ашәарҭадаратә ҭагылазаашьа ишацклаԥштәу, амашәыр ҟамларазы.

© Sputnik / Томас Тхайцук
Д.И. Гәлиа иҩны-музеи шьаҭанкыла аиҭарҿыцра аҭахыижьҭеи акыр ҵуеит

"Зегь раԥхьаӡа иргыланы ҳара гәҭыхас иҳамоу аҩны-музеи уаҵәтәи аԥеиԥш ауп. Ара иҟоуп жәашықәсала амузеи зџьабаа адызҵо аусзуҩцәа, Дырмит Гәлиа иԥсҭазаареи ирҿиаратә мҩеи инагӡаҵәҟьаны, инарҵауланы издыруа, зус иазҟазоу ауаа. Ажәакала, акадрқәа рганахьала еилахара ҳамаӡам, аҿарацәа ҳадаҳкылозаргьы, урҭ идзырҵаша ауаа ыҟоуп. Акызаҵәык ҳгәы иҵхо – амузеи шықәсырацәала иазымхо аиҭашьақәыргыларатә усқәа иахьанӡагьы иахьзалыршамхаз ауп", - ҳәа азгәалҭеит Корсаиаԥҳа.

Иара убас шәаԥхьар ҟалоит:

41

Аҟәантәи Калдахәаранӡа, ма акоронавирус агәра гара шаҳҭахым

192
(ирҿыцуп 13:28 27.10.2020)
Аԥсуаа акоронавирус гьангьаш ҳашҭа иҭалаанӡа аԥсы шҭоу агәра агара ҳҭахым ҳәа агәаанагара лызцәырҵит Sputnik аколумнист Елеонора Коӷониаԥҳа, Аҟәантәи Калдахәараҟа дцан данааи ашьҭахь.
Аҟәантәи Калдахәаранӡа, ма акоронавирус агәра гара шаҳҭахым

Ҽаҩраҭагалан иаҳнаҭаз аԥхарра лшара бзиоуп еимҟьарак аныҟоу ақыҭа аҭааразы. Ачымазара ҿкы анеилагьежьуа аамҭазы, амҩа ақәлара гәаӷьыуацәагәышьоуп, аха ус акәзаргьы, аԥкра амҩаԥгаразы иҟоу ахархәагақәа ҳасаб рзыуны, ахәаша амҩа ҳақәлеит ҳқыҭахь сыԥшәмеи сареи. Аидарагьы ҳаман азы атакси ҳаԥхьеит авокзал аҟынӡа ҳцарц. Иааит атакси, аха амашьынарныҟәцаҩ асабрада захьӡу ихамызт. Ҳанҭатәеит ҳара сабрадала ҳаиқәных. Авокзал аҿы, игәасҭеит аԥсуа аруаа гәыԥҩык шеицыз, урҭ зегьы асабрадақәа рхан. Авокзал аҿы игылаз Аҟәа-Ԥсоу ҳәа зныз амаршруттә такси ҳанҭалеит. Арныҟәцаҩ, Анцәа иҟәырхуп усгьы акгьы ихамызт, аха амашьына иҭатәаз рахьтә аӡәы-ҩыџьа ракәын асабрадақәа ныҟәызгоз. Акарантин шыҟоу здыруа, асабрада зҿаз ԥҳәыск сынлыдтәалеит.

Амашьынарныҟәцаҩ қәрала 60-ҟа шықәса дрықәзаргьы ҟаларын, аха ихымҩаԥгашьала Ковид-19 адунеи ишықәу имаҳацзаргьы ҟалап угәахәуан. "Зегь шәтәама?" иҳәан имашьына аус наируит, "асабрадақәа шәхашәҵа" ҳәа дҵакгьы ҟаимҵеит. Амҩа ҳақәлеит. Зегь реиҳа ишәарҭахаз, аԥсҟы зкыз амашьына ширныҟәоз акәын. Исыватәазгьы саргьы ҳгәы нҭыԥсаауан, иаалырҟьан аџыхҳәа иаангылон зныҟәашәа ццакыз амашьына. Дабаццакуеи ҳныҟәызго уҳәарын, убас аҽыҩқәа аныҵдырҟьо еиԥш имашьына анааирҭрыслак.

Амҩан иҳаԥхьагылоз аидарамҩангага машьынақәа амҩа анирымҭалакгьы, ишшәарҭазгьы дрывсыр иҭахны амҩа егьи аганахь ихы аарихалон. Ишамуаз анибалакгьы, аџыхҳәа даангылон. Амҩан иҳавсуаз амашьынақәа ирҭатәаз рахьтә сабрадала еиқәшәазгьы ыҟан, аха шамаха ауаа рацәа зҭатәаз амашьынақәа рпассаџьырцәа зегьы иныҟәыргомызт, иахьа ҳаԥсҭазаара иахәҭакхаз -асабрада.

Аҟәа инаркны Калдахәаранӡа ҳнеиаанӡа адәахьы ахәаахәҭра иаҿыз ауаа ракәзар, акарантин акашәа имбакәа адунеи ишықәу убаратәы иҟан. Ашәыр, ақәыр уҳәа реиԥш иҟоу адәахьы иқәыргылан изҭиуа анапҭарԥагьы асабрадагьы рааигәара ишнарымго иаразнак иубоит.

Схәыцуан, абырсҟак аԥсыҭбара аныҟоу абарҭ мшәаӡо ҳәа. Мап, имшәозар акәхап, мамзар ас ҟалашьас иамоузеи? Иаҳаулакгьы амҩатә машәыр ҳақәымшәакәа Калдахәара аангыларҭаҿы ҳнеит. "Уныҟәашәа бааԥсуп амашьынарныҟәцаҩ, ухаҵкы", сҳәеит ҳанҭыҵуаз. "Ибҳәо закәи?", иааџьеишьеит иара.

Ҳахьынҭыҵыз игәаҳҭеит аангылараҭаҿы игылоу адәқьан шарку. Ашьҭахь излеилаҳкааз ала, уаҟа аус зуаз ачымазара рхьысит. Ковид-19 ари ақыҭаҿгьы иаагәышьеит сгәахәит "анхәа лыбз" еиԥшу Калдахәаратәи архәра ҳаҿаланы ҳаҩныҟа ҳҿанынаҳха.

Ақыҭараҿы ҭынчроуп, амҩа шамаха уаҩ данны убомызт. Ачымазара ҿкы аҽацәыхьчаразы ҳара ҳахьынхо аҭыԥ даара иманшәалоуп. Аԥкрақәа инарықәыршәаны, агәылара, азлара џьаргьы ҳамнеит, ҳара ҳахьгьы уаҩ дмааит. Ақыҭауаа рӷьырак Гагра аус руеит, хәылбыҽхала рыҩныҟақәа рахь ихынҳәуеит, убри аҟынтә, ҳазқәынхо ахәы ҳаракы ачымазра халар ауеит аԥкрақәа ирықәымныҟәар ҳуааԥсыра.

Амҽышаҽны Аҟәаҟа ҳдәықәлеит. Аангылараҭаҿы ҳанааи адәқьан шаркыц иаркын. Дук хара имгакәа атакси аангылт "амаршрутка ахәала шәызгоит" аниҳәа, ҳанҭалеит ҳсабрадақәа наҳҿаршәны. Араҟагьы, амашьынарныҟәцаҩгьы, иватәазгьы аԥкра амԥангьы иҟамызт, амала амашьына арныҟәцаҩ ашьшьыҳәа даауан, сгәы мыҭрыскәа Аҟәанӡа ҳааигеит.

Аҟәа санналаԥш асабрадақәа шырацәаз иаразнак иаагәасҭеит. Ақалақь транспорт аныҟәцаҩцәа аԥҟарақәа ишрықәныҟәо иаразнак иубоит. Атроллеибус иҭаз реиҳараҩык сабрадала еибыҭан.

Авирус абҵара анҵәамҭазы аҽаӡар алшоит рҳәоит, аха сныҟәара ишыснарбаз ала, еиҳарак аҳҭнықалақьуаа роуп арҭ аԥҟарақәа ирықәныҟәо, егьырахь амҩан избақәоз рыла, акарантин ирылаҳәо ашьҭахь, ачымазара ацәаара ԥсыҽхоит аҳәара уадаҩуп.

Калдахәара саныҟаз Гагра инхо сыуацәа ҭелла исарҳәеит "Гагрыԥшь" ачара мҩаԥыргон ҳәа. Абас ҳаҟоуп ҳарҭ аԥсуаа, авирус гьангьаш ҳашҭа иҭалаанӡа аԥсы шҭоу агәра агара ҳҭахым.

Автори аредакциеи ргәаанагарақәа еиқәымшәозар ҟалоит.

Иара убас шәаԥхьар ҟалоит:

192

Кьасоу Ҳагба: ауаҩы иԥсҭазаара аҵакы аиуеит, ихы мжьакәа, иус ишахәҭоу дазнеир

38
(ирҿыцуп 14:02 24.10.2020)
Иахьа имшира азгәеиҭоит Самсон Ҷанба ихьӡ зху Аԥсуа ҳәынҭқарратә драматә театр актиор, Аԥсны акинемотографцәа реидгыла ахантәаҩы, ауаажәларратәи аҳәынҭқарратәи усзуҩы Кьасоу Ҳагба.

Аԥсны Акинематографистцәа реидгыла ахантәаҩы, актиор Кьасоу Ҳагба Sputnik акорреспондент аинтервиу лыҭо, дазааҭгылеит ихәыҷра ашықәсқәеи, ирҿиаратә мҩа шалагази, иаликаауа аспектакльқәеи, инаигӡахьо арольқәеи ртәы.

Наала Гәымԥҳа, Sputnik.

Кьасоу Ҳагба аиицәажәара анхациркыз, гәыблыла ихәыҷратәи ашықәсқәа игәаларшәеит.

"45 шықәса инарзынаҧшуа ақалақь аҟны сшынхогьы, ҧхыӡла ақыҭа ауп избо. Схәыҷреи сқәыҧшреи зегьы сқыҭа иадҳәалоуп. Саныхәыҷыз саб дҳаҧхеит, сан хҩык ахшара ааӡатәыс ҳлоуит. Есымшааира Анцәа диҳәон, игәра лгон. Аџьабаа ӷәӷәаны илбеит ҳааӡараҿы", - иҳәеит иара

Кьасоу Ҳагба қәҿиарала дҭалоит, дагьалгоит Ш. Русҭавели ихьӡ зху Қырҭтәылатәи Аҳәынҭқарратә Атеатралтә Институт.

© Foto / из личного архива Кьасоу Хагба
Кьасоу Хагба

"Афбатәи акласс ааныжьны сҭалеит уахынлатәи ашкол. Ажәабатәи акласс саналга, исыӡбеит сактиорхарц, сҭаларц Атеатралтә институт. Акино, атеатр, акультура рахь агәыблыра сзыркыз ҳәа исыҧхьаӡо, сызхәаҧшуаз акиносахьақәа, актиорцәа уаҟа рыхәмаршьа атәы ауп. Уи аҩыза алшара ҳаман, лассы-лассы ҳқыҭа иаҭааны афильмқәа ҳдырбон. Раҧхьаӡакәны актиорк иаҳасабала асценахь сцәырҵит Аинститут аҭаларазы аҧышәара анасҭоз амш аҽны. Аҧышәара лыдылкылон Нелли Ешҧҳа. Исыдылҵеит аетиуд ақәыргылара. Мчыбжьык ашьҭахь сааины, ашәарыцараҟны слеи сареи ҳзыниаз ахҭыс ала илыдызгалеит. Уи даара ахәшьара бзиа алҭеит, убас сҭалеит Қарҭтәи Атеатралтә институт", - ҳәа игәалаиршәоит.

Актиор Ҳагба: сзыхьӡаз ахәыҷы намысла, уаҩышәала, ԥсыуала иҟасҵон>>

Кьасоу Ҳагба имаҷымкәан инаигӡахьеит асценатә рольқәа, ихадароу ахаҿсахьақәа. Урҭ рахьтә: Молчалин ("Зыхшыҩ зызрыцҳароу" А. Грибоедов), Аԥсҳа Леон ("Аԥсҳа Леон" А. Агрба), Цезарь ("Иули Цезарь" У. Шекспир), Махаз ("Махаз" Ф. Искандера, ареж. В. Ақаҩба), Тартиуф ("Тартиуф" Мольер, ареж. К. Хачегогу), Лаимен ("Ашьха Морган аҟынтәи хланҵы" А. Миллер, ареж. В. Ақаҩба), Џьонни Паттинмаик ("Адгьылбжьаха Кинишмаҟынтәи ахымхәа" Макдонаха, ареж. В. Ақаҩба). "Кьоџьаа рҭыӡшәа" Гольдони (Исидоро), "Брисбенынтәи аемигрант" Шехаде (Ашькылкҩы, ареж. В. Ақаҩба), "Аӡыцәа шкәакәа" В. Касланӡиа (Зафас, ареж. В. Ақаҩба), "Ацынҵәарах" Б. Шьынқәба (Хамыҭбеи Чачба).

© Foto / из личного архива Кьасоу Хагба
Кьасоу Хагба

"Раҧхьаӡакәны ихадоу ароль сыхәмарит Вампилов ипиеса ала иқәыргылаз аспекталь "Аҭӡамц" аҟны. Уаҟа ихадароу апрокурор ироль насыгӡон. Ари ақәгылара сдипломтә усумҭа акәын, ибзианы ирыдыркылеит. Анаҩс Аҧсны ирацәаны ақыҭақәа ҳарҭааны идҳарбеит", - ҳәа азгәеиҭоит Кьасоу Ҳагба.

1978 шықәса раахыс С. Ҷанба ихьӡ зху Аҧсуа аҳәынҭқарратә драматә театр аҟны иҟаз афольклортә ансамбль "Уарада" дасолистын. 1999 шықәса инаркны 2000 шықәсанӡа Аҧсны Акультура Аминистрс дыҟан. 2002 шықәсазы Аҧсны Аҳәынҭқарра Апарламент адепутатс дыҟан. Кьасоу Ҳагба С. Ҷанба ихьӡ зху Аҧсуа ҳәынҭқарратә драматә театр иаҧхьагылоу актиоруп.

© Foto / из личного архива Кьасоу Хагба
Кьасоу Хагба

Актиор ихаҿы иаанхаз, еиҳа игәалашәарақәа иаарылыҳәҳәо иҟоу Швеицариа иқәдыргылаз аспектакль ауп. Уи атәы ҳзеиҭеиҳәеит актиор.

"Аҧсны Аџьынџьтәылатә еибашьра алагара мызқәак шагыз, Швеицариа атәылаҟны агастрольқәа ҳаман. Уи иреиӷьу агастрольқәа ируакуп сара сзын. Гиульден ипиесала иқәыргылан "Кьоџьаа рҭыӡшәа" заыхьӡыс аспектакль. Иқәиргылеит Валери Михаил-иҧа Ақаҩба. Ари раҧхьаӡатәи Аҧсуа театр аҳәаанырцә ақәгылара акәын. Аспектакль ахы инаркны аҵыхәанӡа аҧсышәала имҩасит. Ахәаҧшцәа аспектакль алагаанӡа ирзеиҭарҳәеит уи аҵакы зызкыз, аҭоурых. Иџьоушьаша, абызшәа шырзеилымкаауазгьы, ахыбра зегьы ҭәын, ҭыҧк ҭацәны усгьы иубомызт. Аспектакль ашьҭахь ахәаҧшцәа зегьы ҳадеизаланы ҳнапынҵамҭа иаҳәон", - ҳәа игәалаиршәоит актиор.

Асцена Кьасоу Ҳагба изыҳәан ҧсҭазаароуп, идунеи шьаҟа ӷәӷәаны иаҵагылоуп.

"Асцена уанықәгыла нахыс, ахәаҧшҩи уареи шәеимадара ацәажәара уалагаанӡа,уҩнуҵҟатәи уҧсҭазаара иахылҵуа ацәанырреи дареи еиқәшәаны ианеилаҵәалак, нас ауп амшын иху аӷбеиҧш уаманы аҿанынанахо. Уроль нагӡаны уаналгалак, ахәаҧшҩы ибла ихубаало аҧхарра иабзоураны, еиҭах сыхәмарындаз ҳәа агәаҳәара узцәырҵуеит. Зегь реиҳа ихадароу, ауаҩы ихы мжьакәа, дызҿу аус ишақәнагоу даназнеиуа, убасҟан ауп иҧсҭазаара аҵакы анаанахәо, алҵшәа анаиуа. Амилаҭ ҟазара - уи ҳара ҳӡырызго, ҳхаҿра, ҳдунеи зегьы идзырбо акакәны иҟоуп", - ҳәа азиҧхьаӡоит иара.

Кьасоу Ҳагба бзиа ибаны, имч-илшара зегьы изанааҭ иазкны, иахьа уажәраанӡа мааҧсарада аус иуеит.

38

Уахыки-ҽнаки рыла 106-ҩык акоронавирус шрылаз аадырԥшит Аԥсны

15
Аепидемиа иалагеижьҭеи Аԥсны акоронавирус зцәа иаланы иаадырԥшыз ауаа рхыԥхьаӡара 4058-ҩык ыҟоуп. Урҭ рахьтә ргәы бзиахеит 2071-ҩык, рыԥсҭазаара иалҵит 36-ҩык.

АҞӘА, жьҭаара 28 - Sputnik. Иҳаҩсыз уахыки-ҽнаки рыла COVID-19 зцәа иалоу реилкааразы атестқәа 458 ҟаҵан, урҭ рахьтә акоронавирус аарԥшын 106 тест рҟны ҳәа аанацҳауеит Ауааԥсыра COVID-19 рацәыхьчаразы аоперативтә штаб.

Абыржәтәи аамҭазы Гәдоуҭатәи араионтә хәышәтәырҭа хадаҿы ишьҭоуп 137-ҩык ауааԥсыра, урҭ рахьтә 118-ҩык акоронавирус адиагноз рзышьақәырӷәӷәоуп, рҭагылазаашьа бааԥсуп 26-ҩык, ибжьаратәуп - 40-ҩык, илҩаауп 15-ҩык апациентцәа. Гәдоуҭатәи агоспиталь иҭашәеит жәҩык ачымазцәа.

Аҟәа асасааирҭа "Аиҭар" ашҭаҿы иаадыртыз амобилтә госпиталь аҟны ишьҭоуп акоронавирус зыдбалоу 51-ҩык апациентцәа. 47-ҩык рҭагылазаашьа бжьаратәуп ҳәа иԥхьаӡоуп, ԥшьҩык рҭагылазаашьа бааԥсуп. Амобилтә госпиталь аҟынтәи илҩаауп быжьҩык.

Ауааԥсыра COVID-19 рацәыхьчаразы аоперативтә штаб ажәлар рахь ааԥхьара ҟанаҵоит ачымазара ҿкы рымкырц азы иахәҭоу аԥҟарақәа зегьы ирықәныҟәаларц.

Акоронавирус иазку ажәабжьқәа зегьы шәрыԥхьар ҟалоит абра>>

15
Атемақәа:
Ачымазара ҿкы – акоронавирус Аԥсни адунеи аҿи: иалкаау