Руслан Бганба

Sputnik Аԥсны анапхгаҩы иинтервиу: шьаҿа-шьаҿала еиҳау аихьӡарақәа рахь

109
(ирҿыцуп 21:31 09.12.2019)
Аинформациатә маҵзура аиҳабы Руслан Бганба Sputnik Аԥсны хәышықәса ахыҵра амш аҽны дрылацәажәеит уи аусура апринципқәа, ирықәҿиаз апроектқәа, иара убас ирымақәаз агхақәагьы.

Ԥхынҷкәын 8, 2014 шықәса рзы Аԥсны аусура хацнаркит аинформациатә маҵзура Sputnik апортал. Абарҭ ашықәсқәа ирылагӡаны асаит аҟны иҭыҵит 56 000 материал аԥсуа бызшәеи аурыс бызшәеи рыла, 1746 фотонҵамҭеи, 794 инфографикеи.

2016 шықәса рзы аусура иалагеит амультимедиатә пресс-центр. Хышықәса рыҩнуҵҟа Sputnik апресс-центр аҿы имҩаԥган 237 еиԥылара. 2017 шықәса рзы Sputnik Аԥсны ихацнаркит Аԥсны ауаа ахьықәынхо аҵакыра зегьы зымҽхазкуа арадиодырраҭарақәа. Хәышықәса рыҩнуҵҟа ианҵан 9 818 аудио, аефир 4160 сааҭ ицон.

Sputnik

- Сынтәа аинформациатә маҵзура Sputnik Аԥсны хәышықәса ахыҵит. Шәгәаанагарала, еиҳа ишәықәҿиаз арбан, иара убас еиҳа аус здулатәны шәызхәаԥшуазеи?

- Хәышықәса ганкахьала - ҿҳәара дууп, аха даҽа ганкахьалагьы еимгеимцарак иаҩызоуп. Сара исҭахым иалыскаарц иҳақәҿиаз ма иҳақәымҿиаз ҳәа, избанзар ҳара есыҽны, маҷ-маҷ аихьӡарақәа ааҳарԥшуеит, ҳаԥхьаҟа алҵшәа дуқәа ҳаурц азы.

Хәышықәса раԥхьа ҳара ҳколлектив ааҩык рҟынӡа инаӡоз интернет-портал хәыҷык акәын. Уи аахижьҭеи еиҳа-еиҳа ҳколлектив еизҳаит, аусура аформат аҽарҭбааит. Иахьа ҳаилазаараҿ аус руеит 40-ҩык. Апортал адагьы, аус руеит апресс-центри арадиои. Арҭ зегь ахьҳамоу алзыршаз убарҭ есҽнытәи ҳаихьӡара хәыҷқәа роуп.

Еиҳа иналукааша апроектқәа ртәы уҳәозар, иалыскаауеит "413 мшы"  - Аԥсны жәлар Рџьынџьтәылатә еибашьраҟны Аиааира 25 шықәса ахыҵра иазкыз. Сгәы иаанагоит иааиуа ашықәсқәа раангьы даҽа форматк ала ари аҩыза апроект аусура алҳаршап ҳәа. Ауаа уи аҭоурых лассы-лассы ираҳалар рҭахуп, шьаҿа-шьаҿала рыжәлар знысыз амҩа еилыркаар рҭахуп.

- Амаҵзура аредакциатә политикаҿы аԥыжәара зышәҭо арбану?

- Ҳара хықәкы хадас иҳамоуп адунеи Аԥсны аӡбахә арҳареи адунеи аҿы иҟоу Аԥсны ауааԥсыра дырдырреи. Абри ауп ҳусура гәыцәс иамоу. Ҳара ҳҽазаҳшәоит адунеи аҟны иахьа имҩаԥысуа ахҭысқәа ҳаԥхьаҩцәа рызнагара, иара убасгьы аҳәаанырцә ҳанхашьа-ҳанҵышьа дырҳара.

- Sputnik аҳәынҭқарратә усбарҭақәа ишԥарыдыркылеи, аинформациа аиуразы уадаҩра ыҟоума?

- Сара сгәаанагарала, аҳәынҭқарра еиҳа иаартызар ҟалон. Аинформациа аиуразы азакәан инақәыршәаны, аҳәынҭқарратә усбарҭақәа акрызҵазкуа адокументқәа рыҭара алдыршозароуп, русуразы аҳасабырба ркьыԥхьуазароуп. Ҳара ҳҿы ус иҟам. Иҟоуп ачынуаа, аинформациа хра алоу иаламу зхала изыӡбарц иаҿу. Зны-зынла дара рхатәы интересқәа ирхьырԥшны, ма даҽа џьоукы ринтересқәа ирхьырԥшны ирыӡбоит ирзатәуи ирзатәыми.

- Аԥсны АИХқәа рконкуренциатә ҭагылазаашьа хәшьарас иашәҭарц ишәылшозеи?

- Сара исызҳәом егьырҭ АИХқәеи ҳареи аконкуренциа ҳабжьоуп ҳәа. Ҳара ҳаиҩызцәоуп. Досу ихатәы ԥхьаҩы димоуп. Еиҳагьы ҳхеибарҭәаауа џьысшьоит. Аконкуренциа ҟаларгьы, уи еиҳагьы ҳусура иацхраауан.

- Sputnik иҭнажьыз аматериалқәа иашамызт ҳәа рыхҳәаара шәықәшәахьоума?

- Ҳрежим еиԥш иҟоу арежим ала аус анууа, ма абриаҟара аинформациа унапы ианыҵужьуа, агха ҟамлар алшаӡом. Еиуеиԥшым амзызқәа ирхырҟьаны ҳаргьы агха анҳацәцо ҟалоит. Иҟалоит ииашам аинформациа анҳарҭо. Иҟалоит ҳаццакразы агха анҳацәцо. Ус шакәугьы, оперативла азхьаԥшра рыҭаны иҳариашоит. Официалла ираҳҭаз аинформациа мап ацәкра ҳақәымшәацт, аха ҳагхақәа ҳариашоит, аинформациа цҵа ҟаҳҵоит, ианаҭаххало.

- Sputnik адунеи атәылақәа рҿы 33 бызшәа рыла иҭыҵуеит. Егьырҭ ахабқәа рыгәҭа Sputnik Аԥсны ареитинг шәаҳзалацәажәар ҳҭахын.

- Еиндаҭлара дук шҳабжьамгьы, ҳәарада, ҳаишьклаԥшуеит. Аҩнуҵҟатә реитинггьы ыҟоуп. Ауаҩытәыҩса илшарақәа зхьыԥшу рацәоуп. Аԥсынгьы ирацәаҩуп акреативтә ус ззыҟаҵо, егьырҭ атәылақәа рҿы иҟоу апроектқәа иреицәамкәа апроект дуқәа аус рыдулара зылшо. Ари ззысҳәо Sputnik Аԥсны мацаразы акәӡам, егьырҭ аилахәырақәа рҿгьы усеиԥш аус зуа рацәаҩуп.

- Напхгаҩык иаҳасаб ала шәҿаԥхьа иарбан дҵақәоу иқәшәыргыло?

- Иреиҳау  проблеманы иҟоу – акадрқәа разымхароуп. Сгәы иаанагоит ҳара ҳҟны адагьы, ари апроблема Аԥсны зегьы аҭыԥ амоуп ҳәа. Уи зыхҟьо ауаа разымхара мацара акәым, ҳҵараиурҭақәа ҳаамҭа еиҳа иақәшәо адыррақәа ахьрызрымҭогьы акәым, аҳәаанырцәынтә аҿар рҵараҵара ашьҭахь Аԥсныҟа иахьыхнымҳәуагьы акәым. Акадрқәа ҿыц аҵара дырҵара аҭахуп. Аҵараиурҭа бзиақәа ирылгаз адырра ҳаракқәа шрымоугьы, аилахәыраҿы аусура иазыҟаҵам. Урҭ ҩаԥхьа аҵара дҳарҵароуп аусурҭаҟны.

Ҽааны инаркны ҳара иацаҳҵараны ҳаҟоуп апроект SputnikPro. Уи аҳәаақәа ирҭагӡаны амастер-классқәеи атренингқәеи мҩаԥыргалоит урыстәылатәи амедиа-менеџьерцәеи ажурналистцәеи. Уажәы ҳгәы иҭоуп ари апроект ырҭбааны ажурналистика ашкол аԥҵара. Уа рдыррақәа еиздырҳалоит ҿыц аусура иалагаз ажурналистцәа реиԥш, аусуратә ԥышәа змоугьы.

Иара убас шәаԥхьар ҟалоит:

109

Акаҳуеи аҳаҵлеи: аилазаара "Ашацкыра апоетцәа" шеиҿкаахаз

3
Алитературатә еилазаара "Ашацкыра апоетцәа" арҿиара знапы алаку аҿар еиднакылоит. Уи аиҿкаараҿы акаҳуа рольс инанагӡаз, насгьы аҳаҵла зеиҭаҳатәхаз дазааҭгылоит ажурналист Аинар Ҷыҭанаа.

Аинар Ҷыҭанаа, Sputnik

Дуӡӡак аҟынтәи ҳаауеит

Ҭагалантәи амш ԥхақәа руак азы ҩыџьа апоетцәа – Дырмит Габалиеи Абзагә Аҟалӷьбеи, аҽнышьыбжьон, амшын аԥшаҳәаҿы каҳуажәра ишаҿыз снарыхҭыгәлеит.

Мышқәак рышьҭахь ажурналист Девид Гобечиа дҳацны, мрагыларахь ҳхы рханы амҩа ҳанылахьан. Ҳарҭ ҳахҩык иҳацын "ҳҵәаӷәамҭақәа", Девид – "ифото-видео-блаҭыхга".

Крааҵуан жәеинраалақәак ҳармыԥхьеижьҭеи – абас иҟан ҳныҟәара аҿыҵга. Зегь раԥхьа уи ахшыҩзцара ихаҿы иааит Дырмит, иара убасҟан, аԥшаҳәаҿы акаҳуа анаҳжәуаз аамҭазы.

Аҽны ҳаҭааит Басариа ихьӡ зху Очамчыратәи ашкол-интернат. Уи аамҭазы "коронавирус" ҳцәагьы ҳацәагьы макьана иаламшәацызт аҟнытә ҳрыдыркылеит ҳаргәыдыҳәҳәаланы. Имаацызт адистанциа-мистанциақәа "рмодагьы".

Апоетцәа рҭеиҭыԥш ашколхәыҷқәа рхаҿы ишааиуа ҳашьашәалон ҳәа сгәы иаанагом, аха а-Пушкинхареи а-Шьынқәбахареи аҽны ҳаргьы хықәкыс иҳамаӡамызт. Сааҭк аҟара иргәарԥханы иӡырҩуан аҵаҩцәагьы. Рнапеинҟьабжь еиҳа-еиҳа иӷәӷәахо ианалага – иазҳархеит. Избанзар зны-зынла уи агәыԥҵәарагьы иадыргоуп.

Ԥыҭк ҳагәқәа (анаҩс ҳлымҳақәагьы) анҳарда, аԥшәмацәа адиреқтор иуадаҟны пату ҳақәырҵар рҭаххеит. Ашкол уанҭо ари ауадахь анагарақәа бзиарак иазҳәам, џьаракы аҩнагалара-аҩныгараҿы уаныцхырааҩу алаҳамҵозар. Аха уажәазы сасра ҳуеит, ҳзыцәшәо егьыҟам.

Дук мырҵыкәа ашкол анапхгареи арҵаҩцәеи иҭабуп ҳәа нараҳәаны, аԥсуа шәақәа ҳәо, мамзаргьы ирӷызуа, ҳазлааз ала ашьшьыҳәа ҳанҿынаҳхеит. Ҳаԥхьаҟа Аҟәанӡа ишьҭоу амҩа хароуп, арҿиара мҩа акәзар – нҵәара ақәӡам.

– Ҳзусҭцәоу жәдыруама? – ҳәа ҿааиҭит Дырмит, Очамчыра ҳаналсуаз аамҭазы.

– Ыы? – ҳҳәеит ҳаргьы, иҵаашьа џьашьаны.

– "Ашацкыра апоетцәа" ҳауп.

Арҿиаратә шәырҵла

Ари машәыршақә иҳәаз ажәақәамызт, анаҩстәи ҳныҟәарахьгьы "Ашацкыра апоетцәа" раҳасабала амҩа ҳақәлеит. Жьҭаарамза 24 рзы ҳара ҳаҭааит Ҷыҷыкәа Хьиба ихьӡ зху Баслахәтәи абжьаратә школ.

Аԥсуаа рҳәашьа, сара истәуп ҳәа акәым изысҳәо, аха ари ашкол аҵас бзиақәеи аҳаҭыри змоу ҵараиурҭоуп. Аԥсуа шәҟәыҩҩцәеи апоетцәеи ирызку, ашкол ашҭа ҭбааҭыцә ҭзырҭәаауа абаҳча мацара абанӡанеиуеи. Дара рнапала еиҭарҳаз аҵлақәа еиламҩашьарц азы досу анҩыларақәа рымоуп. Аԥсуара иазку ауадаҿы еизгоуп ибеиаӡоу аҭоурыхтә материал.

Акыр жәашықәса раԥхьа ари ашкол аҟны ашәҟәыҩҩцәеи ашколхәыҷқәеи рыбжьара асалам шәыҟәқәа реимдара хацыркын. Уи аҵас бзиа еиқәырханы иаагоуп иахьанӡагьы, асалам шәҟәқәа зегьы еиҷаҳарыла иҵәахуп хыхь зызбахә ҳәаз ауадаҿы.

Ашацкыра апоетцәагьы ари абаҳча ссир аҟны ҳахьӡ зҳәо ҵлак ыҟазарц ҳҭаххан, аҳаҵла ааганы еиҭаҳҳаит. Хәыҷык-хәыҷык баҳала аус анаҳуы, ҳаиасит ажәеинраалақәа рыԥхьарахьгьы.

© Foto / предоставлено Аинаром Читанаа
Ашацкыра апоетцәа аҳаҵла еиҭарҳаит Баслахәтәи абжьаратә школ ашҭаҟны

Анаҩстәи ахҭысқәа еиҭаҳәаратә формала иаасырԥшуеит, аԥхьаҩ ажәа дасмыршьразы.

Иҭәы-иԥха имҩаҧысыз ари аиԥылара ашьҭахь ашацкыраа анаҩстәи ҳаиқәшәара шықәсыбжак еиҳаны иахырԥатәхеит. Уи зыхҟьаз аҭагылазаашьақәа рацәоуп.

Инҵәеит 2019-тәи ашықәс. 2020-тәи алагамҭа акәзар аибабарақәеи аиқәшәарақәеи рзин ааҳамнахын, "zoom" ала авидео еимадара мацара ҳҽалаҳагӡар акәхеит. Ари аамҭа иалагӡаны ҳаилазаара иацлеит: Алмас Шьалашьаа, Шьазина Бганԥҳа, Ҳаџьараҭ Џьыкьырба, Адгәыр Амԥар.

Акарантин ашьҭахь

Ачымазара иадҳәалаз агәыҭҟьарақәа маҷк ианеихсыӷь, ԥхынгәымза 23 аҽны, Дырмит Гәлиа илитературатә-мемориалтә музеи аҟны ицәыргахеит алитературатә еилазаара "Ашацкыра апоетцәа". Уи алахәылацәа досу ҳҩымҭақәа акы-ҩба ҳрыԥхьеит, иара убас инеимда-ааимдо ҳаԥхьеит "Ашацкыра апоетцәа Рҭоуба".

Аҭӡаҿы икыдын асахьаҭыхҩы Баҭал Џьапуа ҳаилазаара иазирхиаз адыргаҷагьы.

Апоет, ажурнал "Алашара" аредактор хада Анатоли Лагәлаа, аилазаара ҿыц иазкны игәаанагара ҳәо, иазгәеиҭеит:

"Аамҭа аҿахәы шаҟа иҳазҳәо, шаҟа аҵакы ҳзеилкаауа – уброуп ҳпоезиагьы аԥсы ахьҭало. Иагьа ирԥшӡаны иуҩыргьы, агәы аҵамзар, агәаӷь амамзар, аԥсуара ыҟамзар – уи алҩа иаҩызоуп. Избанзар, иахьа узыԥхьо алитература убри аҟара ирацәоуп, уи иалкааны ахатә бжьы ацәыргара мариаӡам. Аха абаҩхатәра змоу уи амаҵ иуроуп. Даара узызхьаауа, угәы иаҭаху зегьы аанужьыр ауп, иулоу наугӡарц азы, имца хааны уаблырц азы. Изгәаԥхо ҟалоит, изгәамԥхогьы ҟалоит, аха сара исҭахыз сҳәеит, са сыдагьы аӡәгьы изҳәомызт ҳәа агәаанагара ануоулак – убасҟан ауп ажәеинраала аныуҩыз".

Адгәыр Амԥар аҭоубаҭара адырхаҽны ҳаилазаара даналҵ, Гәлиа иҩны-амузеи аҟны Даур Наҷҟьебиа иҳаиҳәаз ажәақәа атыхҳәа иааҳгәалашәеит. Ашәҟәыҩҩы ҳгәыԥ алахәылацәа зегьы шнымхо, мышкы зны аӡәы ишынижьуа ҳгәы ҳҽаниҵахьан, аха уи амш ас лассы иаауеит ҳәа ҳгәы иаанагомызт.

Ааигәазы акы-ҩба усмҩаԥгатә азԥхьагәаҭаны иҳамоуп. Аԥсуа политикцәа ражәақәа рыла иуҳәозар "иҟаҵатәу рацәоуп", аха урҭ зегьы раԥхьа игылоуп арҿиара.

Алитературатә еилазаара "Ашацкыра апоетцәа" адаҟьақәа феисбуки инстаграми рҟны иаԥҵоуп. Уаҟа агәыԥ алахәылацәа рырҿиамҭа ҿыцқәеи аилазаара аԥсҭазаашьа атәы зҳәо ажәабжьқәеи лассы-лассы ишәыдаагалалоит.

3

Адипломатиа иаамысҭашәоу занааҭуп

109
(ирҿыцуп 17:48 13.08.2020)
Адәныҟатәи аусқәа рзы Аԥсны ахада ицхырааҩ ааигәа аԥсуа-аурыс ҳәааҿы аҭыԥ змаз ихымҩаԥгашьеи уи иаиуз ареакциеи дырзааҭгылоит Sputnik аколумнист Елеонора Коӷониаԥҳа.

Ауаажәларра амчра аԥсахразы апротесттә қәгыларақәа зымҩаԥырго анапхгара ҳазҭо русуразы агәынамӡара рымоуп азоуп. Ареволиуциақәа мҩаԥысуеит асоциалтә платформа уи азы иахьыманшәалоу атәылақәа рҿы.

Иаҳхысыз ашықәси ҳазҭалази ҳтәылаҿы аполитикатә еибарххарақәа рацәан, урҭ реиҭаҳәарагьы иаԥсам, зегь ибзианы ижәдыруа ауп. Усҟан оппозициа иҟаз, иахьа амчраҿы иҟоу анапхгара рриторика "азакәан аҳра ауа, еиҵыху ачынуаа рыштатқәа реиҵатәра, ауаа рсоциалтә бзазара ашьҭыхра" ҳәа, ԥхьатәара ирышьҭыз атәыла ахада иаамҭазы иҟаз ауашәшәырарақәа акыр иӡырганы, уи шьаҭанкыла ишеиҭаркуа агәра ҳдыргон. Аҳәара мариоуп, аха анагӡара уадаҩуп. Иҳаҩсхьоу ашықәсқәа ҳрыԥшны иаҳҳәозар, ҳтәыла ахадацәа амчрахь анеиразы аҳәаҭыхла  ирзықәԥо, анаҩс урҭ рхаҭа азакәанқәа еиларгарагьы ирылакьысуам, избанзар, рус иахазыргылаз раҳаҭыр рбароуп.

Еидыз аоппозициатә блок ахада Аслан Бжьаниа иахьа амчраҿы дыҟоуп, ҳазҭоу ашықәс алагамҭазтәи аполиткатә кризис алҵшәақәа ирыбзоураны. Абар зеиӷьыҟам аҭагылазаашьа, азакәан аҳра ауа, акоррупциа маҷхо, ачынуаа рхыԥхьаӡара еиҵахо аҟаҵаразы. Макьаназы, агәыргьынчмазара аиаара раԥхьатәи ацәаҳәаҿы иазлаҟоу ала, егьырҭ зыӡбахә ҳәаз ареформақәа кьыс рымам, ачынуаа реиҵатәра акәзар, аизырҳара амҩоуп изну.

Иахьатәи Аԥсны ахада икадртә политика макьаназы иреформатәу аҟазшьа амоуп ҳазҳәом, дамеигӡакәа ацхырааҩцәеи абжьгаҩцәеи иадминистрациа иадигалоит, уаанӡатәи икритикатә згәаҭақәа ихаршҭны. Иахьатәи санҵамҭа зызку "афырхаҵаратә" темагьы сазааиуеит уажәы.

Ажьырныҳәатәи аполитикатә хҭысқәа ираԥхьагылаз Ахра Аҩӡба алхрақәа рышьҭахь "адәныҟатәи аусқәа рзы Аԥсны ахада ицхырааҩ" ҳәа дшьақәырӷәӷәоуп. Даҽакала иаҳҳәозар, ахада иадминистрациа ианақәлоз, асаркьақәа ԥыххааны амҩа аазыртуаз иаалырҟьаны ддипломатхеит. Ишыжәдыруа еиԥш, адипломатиа – акыр иаамысҭашәоу занааҭуп, уи иаднакылаӡом аӷьалпал. Рацәак аԥшрагьы аҭахымхеит.

© Sputnik / Томас Тхайцук

Ҳазҭоу амза быжьба рзы асоциалтә ҳақәа рҿы иаацәырҵит "адәныҟатәи аусқәа рзы Аԥсны ахада иабжьгаҩ Ахра Аҩӡба "Урыстәылеи Аԥсни рҳәааҿы ибжьагылоу аихатә гәашә и-Toyota Land Cruiser алаӡара ду змоу абапмер ала днажәлан, ҳара ҳҳәаа дышҭалаз узырбо асахьаныҟәа. Абри алагьы аԥсуа дипломатиа ахаҿра ҿыц шьақәыргылоуп. Аиашазы, асоциалтә ҳақәа рҿы ицәырҵыз авидео ала, Toyota Land Cruiser аԥсҟы зку дшумбогьы, дук мырҵыкәа Ахра Аҩӡба иҳәеит уи иара шиакәу, изыҟаиҵазгьы "хә-сааҭк аҳәааҿы даанкыланы дахьрымаз" азы шакәу.

Ишеилкаахаз ала, ҳдипломат акоммуналтә, иара убас егьырҭ ашәахтәшәаратә ҟазшьа змоу аусқәа рзы миллионк иаадҩыло ауал иқәын, уи имшәакәан Урыстәылатәи аҳәаа ахысра азин имамызт. Ахра Аҩӡба иҟаиҵаз ахҳәааҿы иазгәеиҭеит "аҳәааҿы иҟоу аҭагылазаашьа хшыҩзышьҭра аҭатәуп" ҳәа. Адипломат иҟаиҵаз аҳәамҭаҿы иара убас иазгәеиҭоит ҳауаажәлар аҳәаа ахысраҿы ауадаҩрақәа шрымоу, сааҭла уа агылара шрықәшәо азы.

Ауадаҩрақәа ануԥыло ыҟаҵәҟьоуп, аха апрезидент иабжьгаҩ дышдипломатыз ихашҭит, адипломатиа ззыҟоу, аиҿцәажәарақәа рыбзоурала ауадаҩрақәа раԥырҟәҟәааразоуп. Авидео уахәаԥшыр иубоит еиқәаҵәасамсалуа иҟоу адипломат имашьына, акашәа имбакәа, амҽыӷра аҟазшьа аманы Аԥсны аҳәаа еихызшо агәашә инажәланы ҳтәыла ишҭалаз. Шәазхәыц, ари ҟазҵо апрезидент ицхырааҩ иоуп, баша хархьуаҩым.

Схаҿгьы исзаагом, уаанӡатәи Аԥсны ахада ицхырааҩ иакәызҭгьы, аоппозиционер Аслан Бжьаниа идгылаҩцәеи иареи иахырҳәаараны иҟаз ари ахҭыс, аха "дара ртәы" ианыҟаиҵа, хымшҟа рыԥсы ӡаны итәан. Аинформациатә хархәагақәа рҿы ари атема анцәырҵ, акыр зыбжьы цәгьахаз хҭысны ианыҟала, нанҳәа 10 рзы апрезидент ипресс-маҵзура аҟынтә ицәырҵит аҳәамҭа "Ҳазҭагылоу аамҭазы аҭагылазаашьа аҭҵаара мҩаԥысуеит" ҳәа. Аҳәамҭа ишҳаҵанаҳәо ала, Аԥсны анапхгара ари азҵаатәы азы, агәаҭарақәа анымҩаԥыслак ашьҭахь алкаақәа ҟарҵоит. Ари ахҭыс азы, иҳәынҭқарратәу аинформациатә хархәагақәа уамак рҽырымҟьеит, апресс-маҵзура иҳаланаҳәаз аинформациа аздырхеит, иҷыдоу аҭыжьымҭақәагьы азырымкит. Иҳәынҭқарратәым ирҳәази ирымҳәази ахәшьара аҭара хықәкыс исымаӡам уажәы абра, урҭ уеизгьы-уеизгьы "рхы иақәиҭуп".

Хымԥада, уаанӡа акәызҭгьы, Бжьаниа идгылоз аоппозициатә информациатә хархәагақәа ирҳәашаз рдыррын, адипломат Аԥсны агәашә иҭалашьа ҳзырбоз авидео иахьеи-уахеи идырҵәирын, аха уажәы амчрахь ианааи "ажәа ахақәиҭра" ҳәа ззырҳәоз аԥсы ахьҭоугьы ргәаламшәеит, имашьына аҳәааҿы "ианжәылозгьы" цәыррымгеит.

Ари ахҭыс Урыстәылеи Аԥсни реизыҟазаашьазы узхыҽхәаша акәым. Ҳтәыла ахада ицхырааҩцәеи иабжьгаҩцәеи узвамлаша ахымҩаԥгашьа аадырԥшлароуп. Ихадоу ҳастратегиатә ҳәынҭқарра ҳәа Урыстәыла ианазаҳҳәо, ҳдипломат ихымҩаԥгашьа ҳаизыҟазаашьақәа ирмыхәарашәа сыҟоуп. Анаҩсан иҳауз ажәабжьқәа рыла, Ахра Аҩӡба иқәыз ауал ишәеит, ахҭыс азы Урыстәыла аганахьала аусҭҵаара нап аркуп. Абри  аныҟала, асоциалтә ҳақәа рҿы ацәажәарақәа цәырҵуа иалагеит Аҩӡба иусура дамырхуамашь ҳәа. Сара схәыцрақәа ртәы сҳәозар, дамырх сыздыруам, аха Аҩӡба дара рхаҭақәа рамхра азҵаатәы ықәимыргылааит…

Автори аредакциеи ргәаанагарақәа еиқәымшәозар ҟалоит.

109